گۆمانا ھەیی ئەڤ گیانەوەرە ڤایرۆسێ ئیبۆلا بیننە کوردستانێ
ئه‌ڤرۆ:
شارەزایەکێ سامانێن ئاژەلی راگەھاند کو دیاربوویە چیچکێن شەڤێ و مەیموونان گۆمان ژێ دھێتەکرن ببنە ئەگەرێ بەلاڤبوونا نەخۆشیا ئیبۆلا ل ھەرێما کوردستانێ و رێکارێن تایبەت ھاتینە وەرگرتن، ھەروەسا دیارکر کو ھژمارەکا بسپۆران بۆ ڤێ مەرەمێ ژ بەغدا گەھشتینە ھەرێما کوردستانێ.
دکتۆر ئازاد سابر نۆشدارێ ڤێتێرنەری بۆ رۆژناما ئەڤرۆ گۆت پشتی بەلاڤبوونا ڤایرۆسێ ئیبۆلا حوکمەتا ھەرێما کوردستانێ بزاڤێن خوە خۆرت کرینە بۆ رێگرتن ل بەلاڤبوونا ڤێ نەخۆشیێ ل ھەرێمێ، ژ بەر کو ل ھژمارەکا وەلاتێن جیھانێ یا بەر بەلاڤە و چەندین وەلاتیان ب ئەگەرێ ڤێ نەخۆشیێ گیانێ خوە ژ دەست دایە، نەخۆشیەکا کوژەکە و ب رێیا ئاژەلان بۆ مرۆڤی دھێتە ڤەگوھاستن.
گۆت ژی بەری نوکە نۆشدارەکێ کورد ب ناڤێ میقداد سەلماندیە کو گۆمان دھێتە کرن ئەڤ نەخۆشیە ب رێیا چیچکێن شەڤێ و مەیموومانان ل ھەرێما کوردستانێ بەلاڤ ببیت، بۆ ڤێ مەرەمێ ل خالێن سنووری بەرھەڤی ھاتینە کرن و لایەنێن پەیوەندیدار ھاتینە ئاگەھدار کرن، ل رێڤەبەریا گشتیا سامانێن ئاژەلی بزاڤ دھێنە کرن ھەرێما کوردستانێ ژ ڤێ نەخۆشیا کوژەک بھێتە پاراستن، ھەر بۆ ڤێ مەرەمێ ھژمارەکا بسپۆران ژ بەغدا ھاتینە ھەرێما کوردستانێ و دوھی کۆنفڕانسەک ھاتبوو گرێدان.
