گۆمەلگەها وەرزشی وەبەرهێنان و ژێرخانەیەكا مۆدرێن
ئیحسان حەسەن
ئەز باوەرم دەمێ دەنگوباسێ رازیبوونا رێزدار مەسرور بارزانی سەرۆك وەزیرێ حكومەتا هەرێما كوردستانێ لسەر دروستكرنا كۆمەلگەهەكا وەرزشی ل پارێزگەها دهۆكێ بەلاڤ بووی، كەیفخوشییەكا مەزن كەڤتە ددلێ هەموو كەسەكێ خەمخورێ ڤێ دەڤەرێ ب تایبەتی كەرتێ وەرزشی، ئەڤ مژدەیا خۆش تیشكەكا هیڤییێ دا پاشەرۆژا گەنجێن وەرزشڤان و نیشانا ئیرادەیا راستەقینە یا حكومەتێ بوو بۆ پێشخستنا ژێرخانەیا دەڤەرێ، ژبەركو ئاڤاكرنا كۆمەلگەهەكا پێشكەڤتی نەك بتنێ پرۆژەیەكێ ئاڤادانكرنێ یە، بەلكو وەبەرهێنانەكە د سەرمایێ مرۆڤی و پاشەرۆژا جڤاكی دا، ژبەركو هزر یا روونە، دیزاینێن مۆدرێن ژ هۆل و یاریگەهێن وەرزشی یێن جودا، مەلەڤانگە، هۆلێن جێمێ و سەنتەرێن نۆشداریا وەرزشی لبەر دەستن و پشتەڤانییا سەرۆكێ حكومەتێ ژی یا دیارە، پێدڤییە كارێن مەیدانی و دادانا بەرێ بنیاتی ب زووترین دەم دەستپێبكەن، ئێك ژ خالێن هەرە گرنگ یێن دروستكرنا كۆمەلگەها وەرزشی ل دووڤ ستانداردێن دەولەتی كو ببیتە ئەركەكێ بلەز و ستراتیجی، تایبەتمەندیا كەشو هەوایێ كوردستانێ یە، سەقایێ فێنك و دلگیرێ كوردستانێ دێ بیتە جهەكێ نموونە بۆ دانانا كەمپێن راهێنانێ نە تنێ بۆ تیمێن ئیراقێ بەلكو بۆ یێن دەرڤە ژی، دیسان دێ بیتە رێكخوشكەرەك كو دهۆك بشێت ل پاشەرۆژێ مێڤانداریا قارەمانییان لسەر هەردو ئاستان بكەت، ئەڤە دێ ناڤێ كوردستانێ و نەخشەیێ وەرزشا وێ بلند كەت، یا دیتر دێ بیتە دەرگەهەكێ باش یێ ئابوری دیسان یێ گەشتیاری و بازرگانی، دیسان ڤەكرنا سەدان دەرفەتێن كاری بۆگەنجان دبوراێن راهێنان، كارگێری و خزمەتگوزارییان، هەروەسا دێ بیتە جهەك بۆ كۆمكرنا خێزانان و پێكڤەژیانا جڤاكی، ژبلی هندێ رێكخستنا یاریان و كەمپێن راهێنانێ دێ بیتە ئەگەرێ ڤەژاندنا ئوتێل، خوارنگەهان و بازارێن هەرێمێ، دیسان ئەڤ كۆمەلگەهە دێ وەكەت كەنجێن مە بهێنە پاراستن ژ دیاردەیێن نەخوازراو ودووركەڤن ژكارێن مەترسیدار و بێ مفا ژبەركو چالاكیێن جەستەیی بەربەستەكێ گرنگە بەرامبەر نەخوشیێن درێژخایەن دیسان یێن دەروونی، ژبلی دیاركرنا بەهرمەندێن نوو كو بشێن ل پاشەرۆژێ هەڤركییێ دەولەتی بكەن، یا ژهەموویان گرنكتر دەمێ وەرزشڤانێن مە لبن سیبەرا ناڤەندەكا وەرزشی یا پێشگەڤتی راهێنانان دكەن و دكەڤنە دناڤا هەڤركییان دا، دێ زاخ ووەفاداریا وان بۆ وەلاتێ وان و هەستا وان یا نەتەوەیی بهێزتر لێ كەت، ژبیر نەكەین ئەڤە كۆمەلگە دێ بیتە ئێك ژ پرۆژەیێن شارستانی بۆ پارێزگەهێ و هەرێما كوردستانێ كو هەر كوردستانیەك ل هەر جهەكێ جیهانێ دێ شانازیێ پێ بەت، یا من دڤێت بێژم كو جڤاكێ وەرزشی و خەمخورێن دەڤەرێ، هووسا دبینن كو زوو كاركرن لسەر ڤی پرۆژەی ب پێدڤییەكا نیشتمانی دبینین، ژبەر كو هەموو ئامادەكاری هاتینە كرن، دانانا بەرێ بنیاتی دێ رامانا ڤەگوهاستنا تیۆری بۆ پراكتیكی هەبیت، دلسۆزیا سەرۆكێ حكومەتێ دێ خەونا هەموو وەرزشڤانان كەتە راستی و ناسنامەیا پارێزگەها دهۆكێ و هەرێما كوردستانێ لسەر نەخشەیێ وەرزشا دەڤەرێ و نێفدەولەتی بهێزتر لێ كەت.