گۆنده‌ك هاته ئازادكرن و سێ ژى هاتنه ئابلۆقه‌دان
ئه‌ڤرۆ نيوز:
ئه‌ڤرۆ سپێدێ پرۆسا رزگاركرنا 9 گۆندان ب درێژاهيا 40 كيلۆمه‌تران ل سنورێ ده‌ڤه‌رێن خازر بۆ چيايێ زه‌ركى ده‌سپێكر و هێزێن پێشمه‌رگه‌ى يێ د پێشڤه‌چوونێ دا.
هێزێن پێشمه‌رگێ كوردستانێ شيان گۆندێ باسه‌خره ل ميحورێ خازر كۆنترۆلكر و هه‌ردو گۆندێن شێخ ئه‌مير و به‌ده‌نه يێ مه‌زن ژ لايێ پێشمه‌رگه‌ى ڤه هاتينه ئابلۆقه دان.
فه‌رماندا گشتى يا هێزێن چه‌كدارێن هه‌رێما كوردستانێ به‌ياننامه‌ك به‌لاڤكر و تێدا راگه‌هاند كو نێزيكى ده‌مژمێر 6:00ى 17ى چريا ئێكێ 2016، پرۆه‌سه‌يه‌كا به‌رفره‌ها هێزا پێشمه‌رگه‌ى ل خازرى ل رۆژهه‌لاتا مووسل، ب هه‌ڤكاريا هێزێن سۆپايێ عيراقێ ل گوێر و گه‌ياره ل باشوورێ مووسل ده‌سپێكر وه‌كو قووناغا ئێكێ يا رزگاركرنا مووسل ژ ده‌ستێ تيرۆرستێن داعش.
دايه زانين ژى كو د ڤێ ئۆپه‌راسيۆنێ دا زێده‌تر ژ چار هزار پێشمه‌رگه دێ رابن ب پاقژكرنا گۆندێن ده‌وروبه‌رێن ده‌ڤه‌را خازرى ژ تيرۆرستێن داعش ب گۆره‌ى وێ رێكه‌فتنا د ناڤبه‌را حوكمه‌تا هه‌رێما و حوكمه‌تا عيراقا فيدرال دا هه‌ى.
هه‌ر د ڤێ به‌ياننامێ دا ئاماژه دايه وێ چه‌ندێ ل 16ى چريا ئێكێ هێزێن هه‌ڤپه‌يمانان بۆردۆمانا وان ده‌ڤه‌ران كريه و بڕياره د به‌رده‌وام بن د هاريكاريكرنا هێزێن پێشمه‌رگه‌ى دا.
