گۆڕان: حوكمه‌تا ناڤه‌ندى هێشتا چه‌كێ گران نه‌دايه هه‌رێمێ
ئه‌ڤرۆ نيوز
ئه‌ندامه‌كێ بزاڤا گۆڕان راگه‌هاند كو حوكمه‌تا ناڤه‌نداى هێشتا داخوازيێن پێشمه‌رگه‌ى د ده‌رباره‌يى هنارتنا چه‌كێ ناڤه‌ندى و گران بۆ دژاتيكرنا داعش بجهـ نه‌ئيناينه، سه‌ره‌رايى وێ چه‌ندێ كو هه‌رێم ل دووڤ سيسته‌مێ له‌شكرى يێ ناڤه‌ندى دچيت.
ئه‌مين به‌كر، ئه‌ندامێ بزاڤا گۆڕان ل جڤاتا نوونه‌ران بۆ شه‌فه‌ق نيوز دياركر كو هێزێن پێشمه‌رگه‌ى ده‌ست ب سه‌ر چه‌كێ گران دا نه‌گرتيه ل ده‌مێ له‌شكرێ عيراقێ ژ هنده‌ك جهێن عيراقێ خوه ڤه‌كێشايى ل ده‌ڤه‌رێن سه‌لاحه‌دين و نه‌ينه‌وا و كه‌ركووك و چه‌كێ پێشمه‌رگه‌يى هه‌موو يێ سڤك و ناڤه‌ندى يه.
ئه‌مين به‌كر گۆت: “ل شوونا هنده‌ك ژ سياسيان بێژنه هه‌رێما كوردستانێ پێديڤه چه‌كێ له‌شكرێ عيراقێ ئه‌وێ نوكه د ده‌ستێ پێشمه‌رگه‌ى دا و ل شه‌رێ داعش ل گه‌ل ميحوه‌ران بكار دئينيت ب ڤه‌گه‌ريتيت، پێدڤيه بێژنه حوكمه‌تا ناڤه‌ندى چه‌كێ گران بده‌نه پێشمه‌رگه‌ى”.
ئاشكه‌را ژى كر كو هێزێن پێشمه‌رگه‌يى نوكه پێدڤى ب چه‌كێ گرانه دا كو ل شه‌رێ دژى داعش بكاربينيت چونكو داعش چه‌كێ گه‌له‌ك پێشكه‌فتى و گران د ده‌ست دايه ئه‌وێ ل ده‌مێ ڤه‌كێشانا هێزێن عيراقى ب ده‌ست كه‌فتى.
ئه‌ڤه چه‌ندين ساله حوكمه‌تا فيدرال رێ نه‌دايه هه‌رێما كوردستانێ چه‌كێ گران ب ده‌ست خوه بێخيت ژ چو وه‌لاتان ب به‌هانه‌يا وێ چه‌ندێ كو پێدڤيه ب چه‌ككرنا پێشمه‌رگه‌يى د رێيا وه‌زاره‌تا به‌ره‌ڤانيا عيراقێ دا بيت و ب وێ رێ ژى چه‌ك ناگه‌هيته پێشمه‌رگه‌يى.
