گۆڕان یا پەشێمانە لێ پارتی بریارا خوە یا دای
ئەڤرۆ نیوز:
ئەندامەکێ پەرلەمانێ عیراقێ ل سەر لیستا پارتی و جێگرێ سەرۆکێ کوربەندێ ئیسلامیێ کوردی د دیدارەکێ دا ل گەل رۆژناما ئەڤرۆ دبێژیت، ھەکە سەحکەینە بنەمایێ دروستبوونا گۆڕان، دێ بۆمە ئاشکرا بیت کو ئەڤ سیاسەتا نوکە گۆڕان بکاردئینیت بۆچیە و دێ باش تێگەھین و دیار دکەت ھەکە پارتی بریارا لادانا یوسف محەمەد و وەزیرێن گۆڕان نەدابا، دا ئاژاوەگیری ھێتە ھەولێرێ ژی.
د . عەرەفات کەرەم بۆ ئەڤرۆ گوت” ئەم دزانین گۆڕان پشکەک بوو ژ ئێکەتیێ و ئێک ژ فاکتەرێ سەرەکی کو گۆڕان جودابووی ژ ئێکەتیێ ئەبوو کو ئێکەتی گەلەک نێزیکی پارتی ببوو، لەوما دروستبوونا گۆڕان ل سەر وی بنەمایی بوو ھەر کەسەکێ ژ پارتی نەرازی و ئەو کەسێن دژی پارتی ھەموویان دەنگێ خوە دا گۆڕان، نموونەکا دی ژی مە یا ھەی، ئەوێن کو ددەمێ خوەدا ئیسلامی نەشیان دناڤ ئیسلاما سیاسی دا پێگەھێ خوە خورت بکەن و زانی کو ب مانا وان دناڤ ئیسلاما سیاسی دا ئێدی ناچنە پێش و ئەوێن ژناڤ ئێکگرتووی ژی چووینە دناڤ گۆڕان دا ئەگەر ئەوبوو چونکی ژلایێ ھزری و مەعرفی و فەلسەفا ئیسلامی دبێ ئاست و لاواز بوون و وان ھزرکر کو ب مانا وان دناڤ ئیسلاما سیاسی دا پێشناکەڤن، لەوما خوە گەھاندە گۆڕان ھەتاکو بشێن پێشکەڤن و بەرژەوەندیێن خوە یێن تایبەت بدەست خوە بێخن و مە دیت ئەوێن ژ ئیسلاما سیاسی گەھشتینە گۆڕان، ھەموو زوو بوونە خودان پۆست و بوونە پەرلەمانتار و سەرۆکێ بەرێ یێ پەرلەمانی (یوسف محەمەد) ئێک ژوان بوو”.
د . عەرەفاتی گوت ژی” دەمێ گۆڕان د ھەوێن ھەلبژارتناندا گەلەک سۆز و پەیمان داینە خەلکی و د راستی دا نەشیا وان کاران بکەت و ب ھاتنا گۆڕان بۆ ناڤ حوکمەتێ چەندین قەیران دروست بوون، قەیرانا ئابووری دروست بوو و وەزیرێ دارایی و ئابووری ژ گۆڕان بوو و قەیرانا داعش کو وەزیرێن پێشمەرگە و ئەوقاف ژ گۆڕان بوون، ئەوان گوت ب راستی ئەڤ دەستھەلاتا مەزن یا ھزری کو (ئەوقافە) یا شەڕی کو (پێشمەرگەیە) و یا ئابووری کو (دارایی یە) کەفتە دەستێ مە و مە چو نەکر، بۆ ھەلبژارتنێن داھاتی دێ دەنگێن مە ژ دەستێن مە چن، ژبەر ڤێ چەندێ گۆڕان خەلک پالدا ھەتاکو خوەنیشادانان بکەن، لەوما سەرکردێن وان ژی د خوەپیشادانان دا پشکدار بوون و ل ڤێرێ پرسیارەک سەرھلددەت، ئەرێ بۆچی ھەکە ئاریشەک ل پارێزگەھا سلێمانیێ دروست دبیت، ئێکسەر ھێرش دچنە سەر بارەگایێن پارتی، ئەم ھەموو دزانین ژی پارتی دەستھەلاتدار نینە ل وێ دەڤەرێ، لەوما یا دیارە ئەو پلانەک بوو دژی پارتی ھاتیە دارشتن”.
ل دۆر ئەگەرێن وێ چەندێ کو ھەرێما کوردستانێ خوە ل بەر ڤان ھەموو قەیرانان گرتی چیە ، د . عەرەفات کەرەم دبێژیت” ھەکە ھەر دەولەتەکا ب ل شوینا ھەرێما کوردستانێ کو د ڤان ئاریشێن مەزن دابا، شەڕێ داعشێ و نەبوونا پاران و دو ملیۆن ئاوارە، نوکە ئەو دەولەتە ھەرفتبا، بەلێ ھەرێما کوردستانێ شیا خوە راگریت و ئەڤ چەندە ژی بۆ حیکمەتا سەرۆکێ ھەرێمێ و سەرۆک وەزیرێن ھەرێمێ دزڤریت و حنێرەکە بۆ پارتی دیموکراتی کوردستان کو وەکو دەولەتەکێ خوە راگرتی و شیایە بەرەڤانیێ بکەت و شەڕی بکەت”.
ناڤبری دیارکر کو روودانێن ڤێ دووماھیێ پەیدابووین ئەم ھەموو دلتەنگ کرین و گوت” پارتی یا ب سەبرە، بەلێ یا ب زەبرە، پارتی گەلەک خوە راگرت و گەلەک ھێرش ھاتنە سەر و جەمەدانیا سور و وێنێن سەرۆکی ھاتنە سۆتن و راگەھاندنا وان ھێرش کرنە سەر سەرۆکی و ئەم وەکو پارتی ژی گەلەک دلتەنگ بووین کو ئاریشا سەرۆکاتیا ھەرێمێ ھند درێژ بووی، لەوما درێژکرنا کۆمبوونێن تایبەت ل دۆر پرسا سەرۆکاتیا ھەرێما کوردستانێ ئەوژی پلانەکا دارشتی یا گۆڕان بوو ھەتاکو خەلک گەلەک بێزار ببیت، ئەو بریارا پارتی دای یا لادانا سەرۆکێ پەرلەمانی و ھەر چار وەزیران، نە جەماوەرێ پارتی و نە گۆڕان پێشبینی بۆ نەدکر و سروشتێ پارتی ئەوە ھەتاکو دووماھی قۆناغ دێ خوە راگریت و تەحەمولێ کەت، بەلێ دەمێ گەھشتە سەر ھەستی، دێ پارتی بریارەکا وەسا دەت کو جیھان پێ مەندەھوش دبیت، ئەڤرۆ ژی گۆڕان و ئێکەتی و لایەنێن سیاسی یێن مەندەھوش بووین ژ وێ بریارا پارتی و جەماوەرێ پارتی ژی ژ کەیفان دا باوەر ناکەت ئەو بریارە یا ھاتیە دان”.
ب دیتنا د. عەرەفات کەرەمی” جۆرە پەشێمانیەک ل دەڤ گۆڕان یا دیاربووی، چونکی ھەتاکو بەیانناما خوە بۆ دەزگەھێن راگەھاندنێ نەخواند، بەلکو ب نڤیسین دا دەزگەھێن راگەھاندنێ، ئەڤە ژی بەلگەیە کو ھند گرنگی ب بەیاننامێ نەدا و گۆڕان یا پەشێمانە، لێ ئەز د وێ باوەرێ دامە کو پارتی بریارا خوە یا دای و گەلەک یا ب زەحمەتە جارەکادی گۆڕان بھێتە دناڤ پرۆسا سیاسی دا ب وی شێوازێ وێ دڤێت، چونکی نەشیێ ل ڤێ قەیرانا دارایی و شەڕێ داعشێ و ھەبوونا ئاواران، وەلاتەکی ب ڤی شێوازی ب رێڤەببەی”.
ل دۆر رۆلێ راگەھاندنا گۆڕان ددروستکرنا ئاژاوەگیریێ دا دبێژیت” شەڕ بۆ جارا ئێکێ ب ئاخڤتنێ دەست پێدکەت، بەری وان روودانان، من بەردەوام سەحدکرە کەنالێ KNN و من دگوت (خودێ خێر کەت) وی کەنالی پێشکێشکارەکێ ھەی دەمێ ل سەر وی کەنالی د ئاخڤیت، بێھنا کوشتنێ و خوینێ لێ دھێت، من ھزرکر کو دێ تشتەک روودەت و ھەر جارا شەڕ ل جھەکی روو ددەت، بۆ جارا ئێکێ ژ راگەھاندنێ دەست پێدکەت، گۆڕان ب راگەھاندنەکا بێ سنۆر ھێرش کرە سەر پارتی و سەرکردایەتیا وێ، لەوما راگەھاندنا گۆڕان کاریگەریا خوە ھەبوو د ئاژاوەگیریێ دا و بەردەوام راپۆرتێن نە دروست ل سەر پەترۆلێ بەلاڤدکرن، نێچیرڤان بارزانی سەرۆکێ حوکمەتا ھەرێمێ ب رۆھن و ئاشکرا گوت ھەموو بادەکا پەترۆلێ و غازێ مە من دابوو دەستێ جێگرێ سەرۆکێ حوکمەتێ د کابینا بۆری دا ( عیماد ئەحمەد) و مە راپۆرت ددانە پەرلەمانی ژی و ل سەر پەیچێ وەزارەتا سامانێن سروشتی ل سەر تۆرا ئەنترنیتێ دھێتە بەلاڤکرن”.
ئاماژە دا وێ چەندێ ژی”ئەم دژی خوەپیشادانان نینین و مافەکێ دستووری و قانوونی یێ وەلاتیانە خوەپیشادانان بکەن، بەلێ ل بەغدا ژی خوەپیشادان یێن ھەین، بەلێ کەس چو ھێرشان ناکەنە سەر بارەگایێن حزبان و دەزگەھێن حوکمەتێ، بەلێ ھندەک سەرکردێن گۆڕان خوەپیشاندەرێن پارێزگەھا سلێمانیێ پالدان ھێرشێ بکەنە سەر بارەگایێن پارتی و ئەڤ ب چو شێوەکی جھێ قەبوولکرنێ نەبوو ل دەڤ پارتی، بەلێ ھندەک ئەندامێن جڤاتا نیشتمانی یا گۆڕان و ھندەک پەرلەمانتارێن گۆڕان ژی پێنەخوەش بوو ئەو چەندە روودای و ھەر چار وەزیرێن گۆڕان ئەوێن ژ حوکمەتی ھاتینە دەرکرن وان ژی پێنەخوەش بوو”.
خویاکر ژی” پارتی ئەو بریارا ب زەحمەت دا ھەتاکو ببیتە وانەک بۆ ھەر لایەنەکی کو د خەیالان وان دابیت رۆژەکێ ھێرشێ بکەنە سەر بارەگایەکێ پارتی و ھەکە یوسف محەمەد ھاتبا ھەولێرێ، ئانکو سەرکەفتنا ئاژاوەگیریێ ل سەر ئاشتیێ و ئارامیێ بوو”.
سەبارەت ھەلویستێ پەرلەمانتارێن لیستێن سیاسی یێن عیراقی ل سەر وان روودانێن ھەرێما کوردستانێ، ڤی پەرلەمانتارێ پارتی گوت” گەلەک جاران پەرلەمانتارێن عیراقی ھەتا یێن دەولەتا قانوونێ ژی یا گوتیە مە ھیڤیدارین باژێرێ ھەولێرێ پایتەختێ کوردستانێ یێ ئارام بیت چونکی ئەم شانازیێ پێ دکەین، ئانکو عەرەبان پێ نەخوەشە ئەڤ ئاریشە ل ھەرێما کوردستانێ روو ددەن، مە کۆمبوون ل گەل گەلەک لیستێن سیاسی ل پەرلەمانێ عیراقێ یێن کرین و مە بگەتیە ھەڤدو چاوان ل ھەولێرێ کو ھندەک کونسلگەریێن بیانی لێ ھەین و پایتەختێ کوردستانێ یە، چەند کەسەک بھێن و نەخوەشیێ بێخنە د ھەولێرێ دا جھێ قەبوولکرنێ نینە”.
ل دووڤ بۆچوونا د . عەرەفات کەرەمی، ھەکە یوسف محەمەد ھاتبا ھەولێرێ و پارتی ئەو بریارا خوە نەدابا، نوکە ھەولێر ژی دا وەکو سلێمانیێ لێ ھێت کو ئەو چەندە دا بیتە مەترسی ل سەر ئاسایشا نەتەوی و ل سەر پاشەرۆژا ھەرێما کوردستانێ و ھەکە ھات و پرسەک ببیتە مەترسی ل سەر ئاسایشا نەتەوی یا کوردستانێ، پارتی یا بەرھەڤە ھەر تشتەکی بکەتە قوربانی ھەتاکو بەرژەوەندیا نەتەوی و ئاسایشا نەتەوی تێکنچیت.
ئاماژە دا وێ چەندێ ژی کو د ھەلبژارتنێن داھاتی دا، دێ دەنگێن گۆڕان گەلەک کێمبن و لایەنگرێن وێ دێ کێم بن و نوکە خەلکێ کوردستانێ ب شێوەکێ باش رەوشا کوردستانێ ھەلسەنگاندیە و گەلەک دەنگ دێ بۆ پارتی چن، چونکی پارتی بارەگایێن گۆڕان و ھەموو حزبێن دی ل ھەولێرێ و دھۆکێ و سۆران پاراستن و دشێم بێژن دەنگێن پارتی ل سلێمانیێ ژی دێ زێدەبن.
