گۆڕستانا میرێن بەهدینان دێ هێتە نووژەنكرن
ئامێدیێ، مەحمود نهێلی:
ژ بۆ پتر گرنگیدان و پاراستنا جهێن شوونواری و مفا ژێ وەرگرتن ژ لایێ گەشتوگوزاری ڤە، بڕیارە ل سەر بودجەیا پارێزگەها دهۆكێ، گۆڕستانا میرێن بەهدینان ل ئامێدیێ دێ هێتە نووژەنكرن و گورانكاری ل دەوروبەران دێ هێنە كرن.
عەلی رێكانی ژ راگەهاندنا لقێ 18 یێ پارتی بۆ رۆژناما ئەڤرۆ دیار كر، ژ بۆ پتر بەرچاڤكرنا شوونوارێن گۆڕستانا میرێن ئامێدیێ بڕیارا نووژەنكرنا وێ گۆڕستانێ هاتەدان و گۆت: «گۆڕستان ب رەنگەكێ هەژی و شارستانی و ل دووڤ رێنمایێن شوونواری دێ هێتە رێكخستن و پاراستن و نووژەنكرن، سنوورێن گۆڕستانێ ژی دێ هێنە بەرفرەهكرن، ئاڤاهیێن دەروبەران، ب تایبەت یانەیا ل پشت ببیتە باخچەك سەر ب گۆڕستانێ ڤە».
گۆتژی: «پەرتووكخانا ئامێدیێ یا ل تەنشت گۆڕستانێ، دووبارە ب دیزاینەكی دێ هێتە ئاڤاكرن، كو دەربڕینێ ژ دیرۆك و كەلتۆرێ ئامێدیێ و دەڤەرێ بكەت».
گۆڕستنا میرێن بەهدینان ئێكە ژ شوونوارێن دێرینێن كوردستانێ و ئامێدیێ و دكەڤیتە رۆژهەلاتا باژێری و گورێن میرێن ئامێدیێ بخوەڤە دگریت.
