گەفێن کوشتنێ ل کوردا دھێنە کرن
ئەڤرۆ نیوز:
ئەڤە دەمەکە گەفێن کوشتنێ کوردێن ئاکنجی ل بەغدا دھێنە کرن و رۆژ بۆ رۆژێ د زێدەبوونێ دانە، د سێ چار رۆژێن بۆری دا گەف ل 150 مالێن کوردان ھاتینە کرن، کو د دەمێ ھەیڤەکێ دا ژ بەغدا دەربکەڤن، ھەکەر نە دێ ھێنە کوشتن.
ئیسماعیل سایەمیر، جێگرێ بەرپرسێ لقێ پارتی دیموکراتی کوردستان ل بەغدا دیار کر، د دەمێ سێ چار رۆژانە ب رەنگەکێ زێدە گەف ل کوردێن ئاکنجی ل بەغدا دھێنە کرن، گەھشتیە وی ڕدەی گەف ل مە ژی دھێنە کرن، داخوازێ دکەن د دەمێ ھەیڤەکێ دا کورد ژ بەغدا دەرکەڤن، ھەکە نە دێ ھێنە کوشتن و بۆ مالپەرێ فەرمیێ پارتی دیموکراتی کوردستان گۆت: “ئەم ڤێ بەرپرسیارەتیا ڤان گەفان دئێخینە ستوویێ حوکمەتا عیراقێ، چونکو ئەڤە دەمەکێ درێژە گەفێن کوشتنێ ل کوردێن بەغدا دھێنە کرن و حوکمەت ژی یا بێدەنگ و بێ ھەلویستە”.
ئاشکرا کر، ئەوێن گەفێن کوشتنێ ل کوردان دکەن، بەحسێ وێ چەندێ دکەن کو ئەم لایەنگرێن (سەرۆک بارزانی)نە و گۆت: “ئەڤە بۆ مە شانازیە، چونکو ئەم دزانین ھەلویستێن وی نەتەوینە و کار بۆ سەربخویێ و دانانا دەولەتا کوردی دکەت و نوکە سەرۆک بارزانی یێ بوویە رەمزێ ھەموو کوردان”.
ئیسماعیل سایەمیر خویا کر، ب تنێ د دەمێ سێ رۆژان دا گەفێن کوشتنێ ل پتری 150 خێزانێن کورد یێن بەغدا ھاتینە کرن، حوکمەتا عیراقێ ژی ھەمبەر ڤان گەفان یا بێدەنگە و گۆت: “ئەم دخوازین حوکمەت و پەرلەمانێ کوردستانێ ھەلویست بۆ ڤێ چەندێ ھەبیت و بێدەنگ نەمینن”.
