گەلەک ماموستایان مالێن خوە یێن کرینە بنگەھێن گوتنا وانێن تایبەت
ئەڤرۆ:
د راپۆرته‌كێ دا بۆ رۆژناما ئه‌ڤرۆ كو ناجى به‌ده‌ل به‌رهه‌ڤكريه دياركريه كو بەرپرسەکا بنگەھێ بھێزکرن و فێرکرنا قوتابیان بۆ ئەڤرۆ دیار دکەت کو گەلەک ماموستا یێن ھەین مالێن خوە یێن کرینە بنگەھێن گوتنا وانێن تایبەت و گۆت” قوتابی یێ ھەی چوویە د بازنەیەکێ دا کو ب چوار ھزار دولاران وانە بۆ ھاتیە گوتن”.
ھاڤین ئەحمەد بەرپرسا بنگەھێ ئالا یێ وانەیێن ب ھێزکرن و فێرکرنێ بۆ ئەڤرۆ ل سەر چاانیا ڤەکرنا بنگەھـ و پەیمانگەھان گۆت” بو ڤەکرنا ھەر بنگەھەکێ بڤی جوری گەلەک جھـ د پێکڤە گرێداینە و ئێک پەروەردەیە و بەشا پلاندانانێ لیژنەیەک ھەیە بۆ ئەڤی بابەتی و پشتی مەرج و رێنمایێن وان د ڤی بنگەھی دا ھەبن و ھەڤپێچ مولەتا باژێرڤانیێ و ساخلەمیێ ژ لایەنێ ساخلەمی و چەوانیا مەرجێن ساخلەمێ و لایەنێ ئەمنی ژی دڤێت رازی بیت داکو چ ئاریشەیێن ئێمناھیێ دروست نەبن.
ھاڤینێ گوت ژی: ئارمانج ژ ڤەکرنا بنگەھێن بھێزکرنا شیانێن قوتابیان و دور ئێخستنا وی ژ ئیستغلالێ و گەلەک ماموستایێن وانەیێن تایبەت دبێژن و گەلەک ژ وان مالێن خوە کرینە بنگەە و جھـ داکو قوتابی بچنە دەڤ بۆ وانەگوتنێ ل ھەمان دەم ئیستغلالکرنا قوتابی ژلایێ مادی ڤە دھێتە کرن بۆ نموونە قوتابی یێ ھەی چوویە د بازنەیەکێ دا کو ب چوار ھزار دولاران وانە بۆ ھاتیە گوتن و زێدەباری نە دووڤچوونا ساخلەمیێ و پەروەردەێ و بیاڤێ ئێمناھیێ و دڤێت دووڤچوون ھەبیت.
ھاڤینێ دەربارێ ئیستغلالکرنا قوتابیان، کانێ ئەرێ پەیمانگەە ژی وە ناکەن د بەرسڤێ دا گۆت: ل بنگەھێن فەرمی وانە دیاریکرینە و ب بھاێ ١٢٠ ھەزار دیناران بۆ ھەر بابەتەکی و ھەر قوتابیەکی د دەمێ ھەیڤەکێ دا بۆ د ھێتەگوتن و ل بنگەھێ ئالا ل سەر ئەوێ چەندێ چوویە و کێم قوتابی دھێنە وەرگرتن داکو باشتر فێربیت و بەشداربیت ل گەل ماموستایی ب شێوەیەکێ نورمال و ئەڤە ژی ل گوری مەرج و رێنمایێن وەزارەتا پەروەردێ یە.
ھاڤینێ دیارکر کو ڤەکرنا بنگەھێن فێرکرنێ دڤێت ب فەرمی بن داکو پتر د خزمەتا قوتابیان دا بیت و نەبیتە ئارمانجەکا بازرگانی.
بەرپرسا بنگەھێ ئالا یێ وانەیێن ب ھێزکرن و فێرکرنێ گوت ژی : مە یا دیتی و گوە لێ بووی، گەلەک رێخکراوێن حزبی و لایەنێن دی بۆ سەرنج راکێشانا قوتابی دەست ھاڤێتی یە ڤەکرنا خولان بەس پێدڤیە کو چەوا من بو بنگەھێ خو کارێن فەرمی کرینە دڤێت ئەو لایەن ژی ڤەکەت و بو ڤەکرنا ئەڤان جورێن خولان و پێداچونەکا باش ل سەر بھێتەکرن.
ھاڤین ئەحمەد رێڤەبەرا بنگەھێ ئالا دیارکر ژی دڤیا د ناڤا قوتابخانێ دا ئەڤ خولە ھاتبانە ڤەکرن نەک بناڤێ پەیمانگەھـ و سەنتەران لێ قوتابخانێن مە نە بەرھەڤن ژ ئەگەرێ زوریا قوتابیان و چەند دەوامیا ل قوتابخانەیان و دەرفەت نەبوویە.
پەروین عەبدولستار بەرپرسا قوتابخانە و سەنتەران ل پارێزگەھا دھۆکێ ل پشکا پلاندانانێ ل رێڤەبەریا گشتی یا پەروەردا پارێزگەھا دھۆکێ بۆ ئەڤرۆ گوت: وەرگرتنا مولەتێ ب نڤیسارەکا فەرمی پێشکێشی رێڤەبەرێ گشتی دھێتە کرن و پشتی دووڤچوون و پێداچون و رازیبوونا لیژنەیا رێڤەبەراتیا گشتی یا پەروەردێ ل سەر دئێنە کرن ھەڤپێچ ل گەر لایەنێن پەیوەندیدار مینا ساخلەمی و باژێرڤانی و جھەتێن ئەمنی پاشی بۆ وەزارەتێ بو رازیبوونا وان پاشی دێ دەست بکارێن خوە کەن.
ناڤبریێ دیارکر ژی کو لیژنەیاکا تایبەت دێ سەحکەتە چەوانی و ھزرا ڤەکرنا ئەڤی بنگەھی، دڤێت ٢٢ مەرجێن وەزارەتێ تێدا بھێنە بەرچاڤکرن پشتی ئەم رازی دبین دڤێت ئەو رێڤەبەراتیێن پەیوەندیدار ب بابەتی ڤە ژی رەزامەند بن ل سەر.
لگوری ئاخفتنا پەروین عەبدولستار ھەر کەسێ دڤێت دشێت داخازا مولەتا سەنتەرە یان پەیمانگەھێ بکەت، بەلێ دڤێت ئەو کەسێ وانە بێژ بیت و ماموستایێ تایبەتمەند بیت و ھەر پەیمانگەھەکا مولەتا وەرگرتنا فێرکاریێ ھەبیت بتنێ و بێ ڤەکرنا خولان دڤێت ب رەزامەندیا مە بیت و ھەتا دشێت ڤەکەت ل گورەی ئەو مەرجێن وەزارەتێ دیارکرین و راستڤەکرین.
ھەروەسا پەروین عەبدولستار بەرپرسا قوتابخانە و سەنتەران ل پارێزگەھا دھۆکێ دیارکر کو لیژنەیەک ھەیە بو دووڤچوونا ئەوان یێن مولەت وەرگرتین و گۆت: ھەر جە و سەنتەرەک و بنگەھەک مولەتا ڤەکرنا خۆلان نەبیت دێ دووڤچوونا وان کەین و سەرپێچیکار دھێنە سزادان.
