گەڤێن دەرخستنا کوردان ل گوندێن دوروبەرێن کەرکووکێ دھێتە کرن
ئه‌ڤرۆ نيوز:
پەیڤدارێ جڤاتا سەرکردایەتیا پارتی ل پارێزگەھا کەرکووکێ ئەشکرەکر، کو پێلەکا تەعریبکرنێ پارێزگەھا کەرکووکێ ڤەگرتیە و دیارکر، ژلایێ سەرکردایەتیا ئۆپەڕاسیۆنێن پارێزگەھا سەلاحەدین ھژمارەکا زۆرا عەرەبێن کەڤنە ھاتینە ڤەگەڕاندن بۆ پارێزگەھا کەرکووکێ و ژلایێ پارێزگارێ کەرکووکێ ڤە دھێنە ئاکنجیکرن لسەر گوندێن کوردان.
عەدنان کەرکووکی، پەیڤدارێ جڤاتا سەرکردایەتیا پارتی دیموکراتی کوردستان لپارێزگەھا کەرکووکێ بۆ رۆژناما ئەڤرۆ گۆت” پێدڤیە لایەنێن نێڤدەولەتی و نەتەوێن ئێکگرتی دگەل رێکخراوێن بیانی بھێنە ئاگەھدارکرن و ھەلویست ھەبیت لدۆر ئەڤا پێلا ب تەعریبێ بۆسەر کەرکووکێ و دەرکرنا وەلاتیێن کورد لڤێ پارێزگەھێ، چونکی پشتی روویدانێن 16ی ئۆکتۆبەرێ ھژمارەکا زۆرا عەرەبێن شوڤێنی ھاتینە ڤەگەڕاندن بۆ کەرکووکێ ل ھەردوو قەزایێن دوبز و داقووق سوپایێ عێراقێ گەفێن دەرکرنا کوردان لسەر زەڤیێن وانا دکەت و ھەتا نوکە ھژمارەکا گوندیان ھاتینە ئاگەھدارکرن گوندێن خوە ژبۆ عەرەبا بجە پێلا بەرۆڤاژی دێ ب زۆری ھێنە دەرکرن و خانیێن وان دێ ھێنە سووتن، ھەموو ئەف عەرەبێن ب مەرەما تەعریبێ تێنە ڤەگوھاستن بۆکەرکووکێ و دەڤەرێن کوردی ژلایێ سەرکردایەتیا ئۆپەڕاسیۆنێن پارێزگەھا سەلاحەدینڤەیە ب ھەڤکاریا ئیدارەیا پارێزگەھا کەرکووکێ کو پتریا وان ل سنورێ پارێزگەھا سەلاحەدین بووینە.
عەدنان کەرکووکی گۆتژی” ژبلی ئەڤێ پێلا تەعریبێ کەرکووک یا دھێتە ب شیعەکرنژی، ژبەرکو بدەھان بارەگایێن شیعەیان ل سەنتەرێ باژێڕێ کەرکووکێ ھاتینە ڤەکرن و لبن ناڤێن جودا یێ کار بۆ شیعەکرنا کەرکووکێ دکەن، ئەز ھەرێما کوردستانێ ھشیار دکەم ژڤێ پێلا ب عەرەبکرنا کەرکووکێ کو مەرەم ئەڤە رێژەیا کوردان بھێتە کێمکرن و ھەمبەردا عەرەب زێدەببن، چونکە ئەگەر ئەف پیلانە سەربگریت ل کەرکووکێ ئەڤە دێ تەعریب بگەھیتە ناحیا پردێ یا نێزیک ھەولێرێ ژی.
ژلایێ خۆڤەژی کامەران رەحمان بەرپرسێ لیژنا پارتی دیموکراتی کوردستان ل ناحیا سەرگەران بۆ رۆژناما ئەڤرۆ گۆت” ھەتا نوکە حەڤدە گوندێن کوردا ل ناحیا سەرگەران ھاتینە ئاگەھدارکرن گوندێن خوە چۆلبکەن و عەرەبێن شوڤێنی دێ ھێنە ناڤا گوندێن وانا، ئەڤەژی پیلانەکە و ژلایێ دەزگەھێ ھەوالگەریا عێراق و پۆلیسێن فیدڕاڵی دھێتە بجە ئینان، چونکە پۆلیسێن عێراقێ گەڤێن دەرکرنێ ل وەلاتیێن ئەڤان گوندان کرینە کو ھەگەر ب خۆشی دەرنەکەڤن دێ بزۆری ھێنە دەرکرن و سۆزنامە ب گوندیان ھاتینە ئیمزەکرن ل ھەمبەر چۆلکرنا گوندێن وان، چەندە بزاڤێن زۆر یێ تێنەکرن ئەف پیلان سەرنەگریت، بەلێ عەرەب ھەر یێ دھێنە دەڤەرێ و زەڤیێن کوردا داگیر دکەن.
