ھزار 500 خانویێن پلاستيکی تایبەت ب خیاران ل دھوکێ ھەنە
ئەڤرۆ نیوز ، نەوزاد ھلۆری:
جوتیارێن سنوورێ پارێزگەھا دھۆکێ ل وێ ھزرێ بوون کو ب کونترولکرنا موسل ئەو دێ کارن بەرھەمێن خوە فروشن ژبەرڤێ دەست ب ھەموو جورێن چاندنێ ب شێوەیەکێ بەفرەھکر ، رێڤەبەرێ گشتیێ چاندنێ ل پارێزگەھا دھوکێ ژی ددەتن دیارکرن کو ڤێ یەکێ مەزنترین زیان گەھاندنە جوتیاران.
ئەندازیار لەزگین حاجی رێڤەبەرێ گشتیێ چاندنێ ل پارێزگەھا دھۆکێ بۆ ئەڤرۆ نیوز گۆت: (جوتیارێن پارێزگەھا دھۆکێ ل وێ نیەتێ بوون کو دێ موسل زویکا ھێتە کونترولکرن ژ بەرڤێ ب شێوەیەکێ زور بەفرەە دەست ب چاندنێ کر ب تایبەتی ژی خیار نھا پارێزگەھا دھوکێ دوو جاران ھندی پێدڤیا پارێزگەھا دھۆک بتنێ خیار یێن چاندین و ژبلی بازارێن ھەرێما کوردستانێ چوو بازارێن دن نینن ببەن و ئاریشەیا فروتنێ نەک تنێ بو خیاران بەلکو بو ھەموو بەرھەمان ل پارێزگەھا دھوکێ درۆست بوویە )
زێدەتر گۆت: ( نھا ل سنوورێ پارێزگەھا دھۆکێ ھزار 500 خانویێن پلاستیکی تایبەت ب خیاران ڤە ھاتینە چاندن ئەڤە ژبلی کو زەڤی و پرۆژێن دن یێن خیاران ، ب رەنگەکێ گشتی نھا کیلویا خیاران ل خوار 200 دیناران دھێتە فروتن )
رێڤەبەرێ گشتیێ چاندنێ ل پارێزگەھا دھوکێ دیارکر ژی کو ئەو رێکێ نادەن ب ھیچ شێوەیەکێ خیار و بەرھەمێن ل ناڤا پارێزگەھا دھوکێ ھەیی ژ دەرڤە بھێن و گۆت ژی : ( پارێزگەھا دھوکێ بەراورد ل گەل پارێزگەھێن دن کێمترین رێژەیا چاندنێ ھەیە ھەر بوو نموونە ل سلێمانیێ زێدەتری ھەشت ھزار 500 خیارێن پلاسیتکی ھەنە بەلێ دھۆکێ ئەڤ رێژا چاندنا خیاران نینە)
