ھندەک دەولەمەند یێ مال و سەروەتێ خوە ڤەدگوھێزن
ئەڤرۆ نیوز:
پارێزەرەکێ دادگەھا دھۆکێ راگەھاند، کو پشتی سەروکی بریارا چاکسازیێ دای ھندەک دەولەمەند ژ ترسادا یێ مال و سەروەتێ خوە ڤەدگوھێزنە ل سەر ناڤێ کەس و کارێن خوە یێن دوور، کو ژلایێ قانوونیڤە چ کارتێکرن ل سەر وان نەبیت و ئەڤ بریارا چاکسازیێ ژێ نەگریت.
پارێزەر عەلی حسێن گەرگەری ل دادگەھا دھۆکێ بۆ ئەڤرۆ دیارکر کو دام و دەزگەھێن ھەرێمێ کێشە و ئاریشە تێدا ھەنە و گۆت: ھەر بریارەکا دھێتەدان دڤێت ب شێوەکێ رێکخستی و ب ھێز چاکسازی بھێتەکرن، تشتێ ژ ھەموویا فەرتر دوڤچوون و رۆلەکێ زێدە بدەنە دادگەھا دەستپاکیێ، دەستھەلاتەکا زێدە بدەنێ کو ھەر کێشەکا ل رێڤەبەریەکێ ببینن بێ ترس و ھزر ڤەکۆلین و لێپرسینێ ل گەل بکەن، گۆتژی راستە مە ئەڤ دادگەھە یا ھەی و مە دادوەرێن زیرەک ھەنە ل گەل رێزێن من بۆ وان، بەلێ چ ھێزا وەسا نینە پالپشتی نینە کو بشێن لێپرسینێ ل گەل گەندەلکاری بکەن، ئەم ھەموو یێ دڤی جڤاکی دا و دزانین ھندەک کەس ھەنە ل گۆرەی 10 ھەتا 15 سالان ژ ڤی دەستی چووینە ڤی دەستی وەسا زەنگین بووینە کو عەقل باوەرناکەت، ئایا ب رێیەکا شەرعی ئەڤ مالە بۆ ھاتیە ؟! ئەڤ بریارا چاکسازیێ پیچەکێ ژلایێ مەعنەوی ڤە وەلاتی گەشبین بووینە کو دبیت تشتەکی ببینن سەرەدانا دادگەھا دەستپاکیێ بکەن، بەلێ ھێش باوەری 100% ێ بۆ وەلاتیان چێ نەبوویە کو کێشەک دیت قەبیل نەکەت، ترسەک ھەیە ھووشیاری لنک پەیدا نەبوویە کو ڤێ پێنگاڤێ پاڤێژیت دێ خزمەتا پرۆژێ چاکسازیێ کەت.
زێدەتر گۆت: وان پێزانینێن دروست ھەنە و پشت راستن کو ھندەک دەولەمەند ژ ترسادا یێ مال و سەروەتێ خوە ڤەدگوھێزنە سەر ناڤێن کەس و کارێن خوە یێن دوور، پشتی ڤێ پێنگاڤا سەروکی ھاڤێتی کو ژلایێ قانوونیڤە چ کارتێکرن ل سەر وان نەبیت و ئەڤ بریارا چاکسازیێ ژێ نەگریت، پارێزەری ئاشکراکر ژی کو لێژنا نەزاھێ ل سالا 2011 ێ ھاتیە پێکئینان و رۆلێ وێ یێ بەرزەیە خوە زارۆیێن بچیک ژی یێ بەحسێ گەندەلیێ دکەن، ئەگەرێ پەیدابوونا ڤێ قەیرانێ گەندەلیێ ژ ھەموو لایاڤە مە داھاتی ھەیە بەلێ گەندەلی ناھێلیت دڤێت چارەسەر بیت، ل دەسپێکێ کارەکێ رێکخستی بھێتەکرن، مە گەلەک کەسێن گەندەل ل دھۆکێ ھەنە، خەلکێ مە یێ بەرنیاسە ژ لایەکیڤە ترسن و ژلایەکیڤە مرۆڤانی و عەشائیری ناھێلیت خەلکێ مە ب رژدی سەرەدانا دادگەھێ بکەت، دڤێت ھێزا ھەرە مەزن دادوەری ھەبیت بۆ بەرسینگگرتنا گەندەلکاران داکو بەرەبابێن پشتی مە ژی نەھێنە سەر ڤی کەتوارێ وەسا.
زێدەتر گۆت: بەری چەند سالەکێن کێم ھندەک کەسێن گەندەلی کری و ب رێیێن جودا چەند پرۆژە و پارچێن عەردی ب مساتەحە وەرگرتینە کو چەندین گرۆڤێن ب ھێز ژی ل سەر ھاتنە دیتن نەدانە دادگەھێ چۆنکو یێ ب ناڤ و دەنگ بۆ وەختەکی خزمەتا کری ئەڤە نە بھانەیە! ل گەل رێزێن مە بۆ پێشمەرگەی، باب و باپیر و سەروکێ مە و رەحمەتی مەلا مستەفا بارزانی ژی پێشمەرگە بوون، بەلێ رۆژەکێ دەست نەکرە حەرامی چۆنکو دڤێت ئێکەم جار رێزێ ل ناڤێ خوە بگریت، ھەکە نە ئەو نە ھەژی ھندێ یە رێز لێ بھێتەگرتن، گۆتژی ب تنێ سزایێ وان ژ پوستێ وان ئینانە خوار ڤێجا چ ل پارێزگەھێ دەوام بکەت یان ھەر جھەکێ دیتر و بەردەوامە ژی، خانەنشین کرن و مووچێ خوە وەردگریت، خەلکی ھند باوەری ب دادگەھێ ژی نەمایە.
پارێزەر عەلی خویاکر ژی کو قانوونێ ھێزەکا مەزن دایە داواکارێ گشتی ھەر ل سالا 1979 ێ و ھەتا نوکە ھەرێم ژی ل سەر دچیت، دشێت وەکو ھەڤکارەکا سەرەکی بیت بۆ لێژنا دەستپاکیێ چۆنکو داواکارێ گشتی پارێزەرێ مافێ خەلکیێ ئانکو مافێ گشتی مالێ جڤاکی د پارێزیت، ئانکو ھەر ئاریشەک و کێشەکا ل جھەکی بینیت مافێ ھەی ئێکسەر مایێ خوە تێبکەت و سکالایێ تومارکەت، دبیت وەلاتیان پێزانینێن قانوونی نەبن و ھند بەرپێن خوە نەبینیت ڤێ کێشێ بگەھینتە دادگەھێ، ئەڤ داواکارە ل گەل دادگەھێ دشێن مافێ خەلکی یێ بەرزە ب دەست خوەڤەبینن، ھەکە ھاتوو حوکم ژی ل سەردا، داواکارێ گشتی دشێت نەرازیبوونا خوە دیارکەت داکو مافێ وەلاتیان گەرەنتی بکەت، گۆتژی چاڤدێریا دارایی ژی چ رۆلێ وێ مە نەدیتیە و نەھاتیە بەرچاڤکرن، ئەڤ گەندەلیێ ھەموو دھاتەکرن، رۆژەکێ مە نەدیت ڤێ چاڤدێریێ گەندەلکارەک رەوانەی دادگەھێ کری و سزایێ خوە وەرگرتی، قانوونێ مافێ دایە ڤێ چاڤدێریێ کو ب کارێ خوە رابیت، لێ ھەتا رادەکێ مەزن ژ کارکەفتیە.
پارێزەری دو چارە ھەنە بۆ چاکسازیێ یا ئێکێ دڤێت ھێلەکا ڤەکری ھەبیت دناڤبەرا سەروکی و دناڤبەرا دادوەر و دادگەھان ب گشتی کو سەروکی ئیرادەکا وەسا ل ڤێ دووماھیێ نیشا مەدا دلێ ھەموو خەلکی ساخکر، د دەمەکی دا ئەم ھەموو ل ھیڤییا ڤێ بریارێ بووین و سنوورەک بھێتە دانان، خالا دیتردادگەھەکا ناوەندی بھێتەکرن ئانکو ل ھەولێرێ بیت یا تایبەت بیت ب کێشێن چاکسازیێ ڤە و شەش دادوەر ھەبن و تایبەتمەندیا وان ئەڤە بیت ژ زاخۆ ھەتا خانەقین و مەندەلی، داکو بۆ بەرپرسێن مە ئەڤێن حەز ھەبیت وەلاتیان ژ ڤێ قەیرانێ خلاس بکەن سەرەدانا ڤێ دادگەھێ بکەن چۆنکو ئەو کەسێ بۆ ماوێ چەند سالەکا شیای ڤی مالی ب دەست خوە بێخیت ئەوی گەلەک ھێز و رێ ھەنە دبیت دگەھیتە رادێ ھندێ ئیزعاجا دادوەران دکەت ب گەفکرنێ.
زێدەتر گۆت: دڤێت سەرپەرشتیەکا ئەکتیڤ یا ئێکسەر ھەبیت ژ سەروکی دا کەمتەر خەمی ل سەر ڤان کێشان نەبیت کو دەمێ گرۆڤەک ژلایێ دادوەرەکی دھێتە پێشکێشکرن، سباھی ب ھەر رێیەکا ھەبیت ب گۆھورن یان بەرزەکەن، داکو گەندەلکار نەگەھیتە سزایێ خوە.
پارێزەری دا زانین ژی کو قانوون ل گەل ھندێ یە مادەم سەروکی بریاردایە و دەست ب چاکسازیێ ھاتەکرن ژ وێ مێژوویێ و وێڤە برگەک ژێ بگریت کو ڤەگوھاستن و کرین و فروتن نابیت بھێتەکرن چۆنکو ھندەک مال و سەروەت ھەنە جھێ گومانێنە، وەلاتی ژێدەرەکێ ب ھێزە کو بشێن بزانن ئەڤە ب رێیەکا نە دروست دەولەمەند بوویە، گۆتژی قەیران ب گشتی ئەگەرێ وێ ئەڤە بوو خەلکەکێ ھەتا رادەکێ زۆر دەستھەلاتا ددەستێ ویدا و پوستێ خوە ب دەرفەت بۆ خوە زانی تشتی بۆ خوە و زارۆیێن خوە ب دەست خوەڤە بینیت، ژ ئەو مێژوویا وی ئەو پوستە وەرگرتی و ھەتا نکە دوڤچوون بھێتەکرن و داوا ل لێژنا دەستپاکیێ بھێتە تومارکرن کو کرین و فروتن و ڤەگوھاستنا تشتی نەبیت چۆنکو راستیەکە دیار دبیت کو وی کەسی دڤێت تشتێ خوە بەرزە کەت.
زێدەتر گۆت: دڤێت بریارەکا فەرمی ھەبیت و ل دووڤ زنجیرا پوستێن حوکمەتێ بیت، ئەگەر ئیرادە ھەبیت رێ ھەنە قانوونێ ژی دەرفەت دایە، ئەڤ ھەر چوار لایەنە داواکارێ گشتی و لێژنا دەستپاکیێ و چاڤدێریا دارایی و دادگەھێ دەرفەت ھەیە و ئێک تمامکەری یێ دیە، گۆتژی ئیرادا سیاسی ژی گەلەک یا گرنگە ھەبیت.
پارێزەر عەلی دیارکر کو دەزگەھێن راگەھاندنێ ژی رۆلەکێ ئێکجار مەزن ھەیە ئەگەر ئیرادە ھەبیت چاکسازیا گەندەلیێ بھێتەکرن، بەرنامە ھەبن وەلاتی چەوان یێ ھاریکار بیت ژ کیڤە دەست پێ بکەت و سەرەدانا چ جە بکەت کو ناسناما وی بھێتە ڤەشارتن و ھەموو ئێک دەست و دەنگ بن بۆ بنبرکرنا گەندەلیێ.
