ھشیار زێباری: پارتی ھەڤپشکێ خەلکێ زومار بوویە د ستەما ل دەڤەرێ ھاتیەکرن
ئەڤرۆ نیوز، نەوزاد ھلۆری:
ئەندامەکێ سەرکرداتیا پارتی دیموکراتی کوردستان دچارچوڤێ پروپاکندێن ھەلبژاردنان ل دەڤەرا زووممار دیارکر کو ھەلبژاردنێن جڤاتا نوونەرێن عیراقێ بو کوردان و پارتی گرنگە و پێدڤی یە خەلک ب ھوشیاری بچنە سەر سندوقێن دەنگدانێ.
ھوشیار زێباری زێدەتر گۆت: (دەنگدانا وەلاتیان بۆ سەربخوەی یا کوردستانێ ل رێکەفتی 25ێ ئیلونا سالا بوری کو تێدا 93% وەلاتیان دەنگ ب بەلێ دابوویە، چو جوداھی د ناڤبەرا وێ و ھەلبژارتنێن نھا یێن عیراقێ کو دێ ل رێکەفتی 12ێ ئایارێ دا ھێنەکرن نینە ژ بەر کو د ھەردو حالەتان دا ئەم وەکو کورد مێھڤانین، ریفراندوم کارتەک و بەلگەنامەکا دیروکی بوویە و دێ ھەر ل گەل مە مینیت و ئەم چو جاران دەولەتبوونا کوردی و سەربخوەی یا کوردستانێ دوور نابینین و ئەڤرۆ یان سوبەھی دێ ھەر ھێتە درۆستکرن).
زێباری د درێژاھیا ئاخفتنێن خودا کو پروسا دامەزراندنا دەولەتا کوردی کارەک جودایە و گەلێ کوردستانێ دخواست کو دەولەتبوونا کوردی بھێتە درۆستکرن و زێدەتر گۆت: (مە ئەرک و ماف ل عیراقێ ھەیە و ئەگەر راستە عیراق کوردستانێ ب پشکەک ژ عیراقێ دبینیت و جوداھیێ ناکەت مە چوو کێشە نینن ،و دەستوور نسبەتی ھەرێما کوردستانێ گرێبەستەکا جڤاکی یە و گرنگە کو بھێتە بجھکرن و پێدڤی یە مافێن مە ئەوێن کو ھاتینە دەستنیشانکرن د وی دەستووری دا بھێنەدان).
زێباری دیارکر ژی کو لاینێن سیاسێن کوردستانێ رازی نەبوون کو ھەلبژاردنێن کوردستانێ ل گەل یێن عیراقێ بھێنەکرن و وان دڤیا سەنگا خوە بزانن و گۆت ژی: (جوداھیەکا زۆر د ناڤبەرا ھەلبژارتنێن ڤێجارێ و جارێن چووی یێن عیراقێ دا ھەیە، ژبەرڤێ ھەر دەنگەک زور گرنگە، ھندی دەنگێن پارتی ل عیراقێ زێدەبن بو کوردان و پارتی ژی گرنگترە، خەلکێ دەڤەرا زوممار گەلەک زوم لسەر دەستێ رژێمێن عیراقێ دیتیە و پارتی ل گەل خەلکێ دەڤەرێ ھەڤپشک بوویە ژ وێ زولمێ و دەنگدانا وان بو پارتی پێدڤی یە داکو حسابەک بو دەنگێ وان بھێتەکرن، پارتی بەرنامەیەکێ ستراتیجی و گرنگ بو وان دەڤەران دانایە تایبەتی بو دووبارە ئاڤەدانکرنا دەڤەرێ و دابینکرنا خزمەتگوزاریان).