ھژمارەکا قوتابیان سەرا فرۆتنا گازا پشکێن ناڤخۆ ھاتنە دەستەسەرکرن
ئەڤرۆ نیوز:
د راپۆرتەکێ دا بۆ رۆژناما ئەڤرۆ کو ئەمیر ئەترووشی بەرھەڤکریە ئاماژە دایە وێ چەندێ کو ھەر ژوورەکا قوتابیێن پشکێن ناڤخۆیی ل زانکۆیا دھۆک حەفتیانە ٢٥ لیترێن گازا سپی ژ حوکمەتا ھەرێما کوردستانێ بۆ خوە گەرمکرنێ وەردگرن، بەلێ ھندەک قوتابی ب رێیێن نەرەوا وێ گازێ دفرۆشن، زانکۆیا دھۆک ژی نھا دووڤچوونەکا توند ل سەر ڤێ چەندێ کریە و ھەتا نھا ل گۆرەی داخویانیا وان سێ قوتابی ل سەر ڤێ کێشێ ل دەمێ فرۆتنا گازا سپی دەستەسەرکرینە و ھاریکارێ سەرۆکێ زانکۆیا دھۆک بۆ کاروبارێن کارگێری راگەھاند، بۆ ھەموو قوتابیێن پشکێن ناڤخۆیی ھاتینە کرێ گرتن و چو قوتابی بێ پشکێن ناڤخۆیی نامینن.
قوتابیەکێ پشکێن ناڤخۆیی بۆ ئەڤرۆ دبێژیت: ئەز و سێ ھەڤال د ژوورەکا پشکێن ناڤخۆیی دا سەرب زانکۆیا دھۆک ڤە دئاکنجی نە و حەفتیانە ٤٠ لیترێن گازا سپی بۆ ژوورا مە ئانکو بۆ مە ھەر سێ قوتابیان دھێتە دابینکرن و گۆت: ئەڤ رێژا گازێ پتریا جاران تێرا مە دکەن، لێ ھندەک قوتابی ھەنە ب تنێ بۆ ناڤ پشکێن ناڤخۆیی وەرگرتینە و حەفتیێ ب تنێ دو رۆژان ل پشکان دنڤن و پشتی ھینگی وێ گازێ دفرۆشن.
ڤی قوتابی کو نەڤیا ناڤێ وی دیاربکەین ئاشکرا کر کو ئەو گازا ل سەر قوتابیان دھێتە دابەشکرن گەلەک یا پیس و بکێر کارئینانێ ناھێت، ھەر ل دەستپێکێ دەمێ مە گاز وەرگرتی پەتیلێن سۆپا سۆتن و نەشێین چو مفای ژ وێ گازێ وەربگرین و گۆت: ئەم دبێژینە زانکۆیێ یان دێ گازێ فرۆشین یان ژی دێ رێژین، بەلێ ب ھەموو رەنگان فرۆتنا گازێ ژ قوتابیان ھاتیە قەدەغەکرن.
د. لوقمان محەمەد سالح، ھاریکارێ سەرۆکێ زانکۆیا دھۆک بۆ کاروبارێن کارگێری بۆ رۆژناما ئەڤرۆ دیار کر، نھا زانکۆیا دھک ١٤ ئاڤاھیێن پشکێن ناڤخۆیی ھەنە کو مولکێ زانکۆیێ نە بەلێ ئەڤ ئاڤاھیە تێرا ھەموو قوتابیان ناکەن و ناچارین ھندەک ئاڤاھیان ب کرێ بگرین بۆ ھندێ قوتابی ل کولانا نەمینن و گۆت: بۆ ئەڤ سالە ٦٠ ئاڤاھی بۆ قوتابیێن پشکێن ناڤخۆیی ب کرێ ھاتینە گرتن.
ناڤبری ئاماژە دا وێ چەندێ کو ل قوناغێن دویێ، سیێ و چارێ نێزیکی ٤٣٠٠ قوتابیان ل پشکێن ناڤخۆیی ھاتینە ئاکنجیکرن، ژ ڤی سەرجەمی ژی ٣٢٠٠ کورن و ١٢٥٠ ژێ کچن، ھەروەسا نێزیکی ١٥ پشکێن ناڤخۆیی بۆ قوتابیێن قوناغا ئێکێ ماینە. ھەکە ئەڤ ھژمارە بھێنە لێکدان دێ دیاربیت کو نێزیکی ٢٥% ژ قوتابیێن پشکێن ناڤخۆیی کچن.
د. لوقمان محەمەد سالح ئاشکرا کر کو وان چو ئاریشە د کرێ گرتنا پشکێن ناڤخۆی دا نینە، ب تنێ ئاریشە د سەرەدەریکرنا پشکان دا ھەیە، چونکو گەلەک قوتابی ھەنە ب شێوەیێن نە ئاسایی رەفتارێ ل گە مالێ حوکمەتێ دکەن و گازا حوکمەتێ یا بۆ پێدڤیێن قوتابیان دھێتە دابینکرن دفرۆشن و گۆت: بۆ ھەر ژوورەکا قوتابیان حەفتیێ ٢٥ ھەتا ٤٠ لیتران دھێتە دابەشکرن و ئەڤە ژی دووڤ وەرزێ سەرمایێ یە.
زێدەتر گۆت: گەلەک قوتابی ھەنە پێگیریێ ب رێنمایێن مە ناکەن و دێ ڤێ گازێ بەن فرۆشن و مە بەلگە ل سەر ڤێ چەندێ ھەنە و ھندک قوتابی ل دەمێ فرۆتن گازێ وێنەکرینە و ھەتا نوکە سێ ژ وان قوتابیان ژی ژ لایێ زانکۆیا دھۆک ڤە ھاتینە دەستەسەرکرن و ل گۆرەی رێنمایێن زانکۆیێ دێ ھێنە سزادان.
خویاژی کر کو پشتی بانگێ مەغرەب دەرگەھێ پشکێن ناڤخۆیی یێن کچان دھێنە گرتن و نابیت چو کچ ژ پشکان دەرکەڤن و نابیت ژ پشکێ دەرکەڤیت خوە ھەکە خێزانا وێ ژی بھێتە ب دووڤرا، ھەر چەندە ل دەستپێکێ ھندەک ئاریشە د ڤی واری دا پەیدابوون، بەلێ ئەو ژی ھەر زوو ھاتنە چارەکرن.
ھاریکارێ سەرۆکێ زانکۆیا دھۆک بۆ کاروبارێن کارگێری دیار کر کو دیارەدەکا کرێت د ناڤ قوتابیێن پشکێن ناڤخۆیی دا پەیدابوویە، ئەو ژی ھەردەمێ کارەبا گشتی چوو دێ ھێنە سەرجادا و کەنە قەلەبالغ و خونیشادان، ئەڤە ژی ب چو رەنگان ژ قوتابیان ناھێتە پەسەندکرن و گۆت: نڤیسارەک ژ وەزارەتا ناڤخۆ گەھشتیە کو نابیت چو خونیشادان بێ رازەمەندیا پارێزگەھا دھۆکێ بھێنە کرن.
ل دور وێ پرسیارێ کو ئەڤە نێزیکی ٢٢ سالانە زانکۆیا دھۆک ھاتیە دانان و ھەتا نوکە ب تنێ ١٤ پشکێن ناڤخۆ ھەنە و سالا سێ جارکی تەمەت وان ب کرێ دھێنە گرتن، د. لوقمان گۆت: ھەر سال ل دەستپێکا وەرزێ خواندنێ ئەم نڤیسارکێ ددەینە وەزارەتا خواندنا بلند بۆ ھندێ ئەو پارێ ل کرێ گرتنا پشکێن ناڤخۆ دھێتە مەزاختن کو سالانە نێزیکی چار ملیار دینارنە یێ چار سالان ل سەر ئێک بۆ زانکۆیێ بھێتە مەزاختن دێ ھژمارەکا مەزن یا پشکێن ناڤخۆیێ د ناڤ حەرەمێ زانکۆیێ دا ھێتە و زانکۆیا دھۆک پێدڤی ب کرێ گرتنا پشکان نابیت، بەلێ ژ بەر نەبوونا پارەی ئەڤ داخوازیە ناھێتە بجھئینان.
ئەو یەک ژی نە ڤەشارت کو ب تنێ ل سالا بووری نێزیکی چار ملیار و ٣٠٠ ملیون دیناران ل کرێ گرتنا پشکان ھاتیە مەزاختن و ب ڤی کوژمەی دێ ئاڤاھیەکێ مەزن بۆ پشکان ھێتە ئاڤاکرن.
د. لوقمان ئاشکرا کر کو زانکۆیا دھۆک یا ئێکانەیە شیایە سیستەمێ نێت یێ (Wifi) ل ھەموو پشکێن ناڤخۆیی یێن زانکۆیا دھۆکێ بدانیت، بۆ ھندێ قوتابی بشێن مفای ژ تەکنولوژیایێ وەربگریت و ئەو ژێدەر و پێزانینێن وی دڤێت ب ساناھی ب دەستخۆڤە بینیت و گۆت: بۆ ئەڤ سالە ژ بەر قەیرانا ئابووری یا ھەرێمێ، ھەتا نوکە ئەڤ سیستەمە نەکەفتیە کاری و ھەردەمێ بوارێ ئابووری باش بوو دێ جارەکا دی ئەڤ سیستەمە کارکەتەڤە و قوتابی مفای ژ وایفی بینن.
ئەو یەک ژی نە ڤەشارت کو زانکۆیا دھۆکێ ھژمارەکا ئاڤاھیێن پشکێن ناڤخۆیی ل ڤێ دووماھیێ ئاڤاکرینە، بەلێ ئەڤە نابیتە ئەگەر کو پێدڤی ب چو ئاڤاھیێن دی نەبیت، چونکو ھژمارا قوتابیان ژ شیانێن ئاڤاھیێن وان پترە، لەوما ب تنێ د سالا بووری دا چار ملیار و ٢٠٠ ملیون دینار ل کرێکرنا پشکێن ناڤخۆیی ھاتبوو مەزاختن و گۆت: سالانە نێزیکی چار ملیار دیناران دھێتە مەزاختن.
ھاریکارێ سەرۆکێ زانکۆیا دھۆک بۆ کاروبارێن کارگێری خویاژی کر، پتریا ئەو قوتابیێن ل پشکێن ناڤخۆیی دنڤن کورن و ھژمارا کچان کێمترە، ھەروەسا قوتابیێن کور ل وان پشکێن ناڤخۆیی کۆمڤە دبن یێن د ناڤ گوندێ زانکۆ دا و قوتابیێن کچ پتر دچنە دەروروبەرێن بازاری و ل ناڤ سەنتەرێ قەزایێ دا، دا کو ب ساناھیتر بشێن کاروبارێن خوە برێڤە ببەن و گۆت ژی: ژ بەر سیستەمێ مە یێ عەشیرەتگەری، کەس قەبوول ناکەت پشکێن ناڤخۆیی یێن کور و کچان د ناڤ ئێک دابن.
د. لوقمان نە ڤەشارت کو ئەڤە چەندین جاران مە ژ وەزارەتا خواندنا بلند داخواز کریە کو ئەڤ پارێ ل کرێکرنا پشکێن ناڤخۆیی دھێتە مەزاختن، ل شوونا وێ ئاڤاھی بھێنە ئاڤاکرن و گۆت: ھەکە پارێ کریا چار سالان بگەھیتە بەردەستێ مە، دێ ھند پشکێن ناڤخۆیی ل ناڤ گوندێ زانکۆیێ ئاڤاکەین کو چو جاران زانکۆیا دھۆک پێدڤی ب کرێکرنا ئاڤاھیێن پشکێن ناڤخۆیی نەبیت و مخابنە، چونکو ئەڤ پارە ھەموو ب ھەروە دچیت.