ھۆشداریێ ددەتە کوردان
ئه‌ڤرۆ نيوز:
جیگری سەرۆکێ لژنا ناڤخوە و ئاسایشێ ل پەرلەمانێ کوردستانێ بۆ رۆژناما ئەڤرۆ دیارکرکو وەزیری بەرگریا عیراقی ژبەر دانانا پلانا رزگارکرنا نەینەوا سەرا ھەرێمێ دا و پێدڤیە کورد بیێ مەرج پێشکداریی د رزگارکرنا پارێزگەھا نەینەوا دا نەکەن وباشترە کورد ڕێککەڤتنەکا ئیمزاکری دبواری ئیداری و لەشکری دا ل گەل بەغدا بکەن بۆ ئازادکرنا مووسلێ.
نازم کەبیر ھەرکێ جێگری سەرۆکێ لژنا ناڤخوە و ئاسایشی ل پەرلەمانێ کوردستانێ بۆ ئەڤرۆ گوت” ھاتنا وەزیری بەرگریا عیراقێ بۆ ھەرێمێ ژبەر دانانا پلانا ئازادکرنا مووسلێ بوو و پشتی شنگال ھاتیە ئازادکرن ل سەر دەستین پێشمەرگەی، دەلیڤە خوەشتر بوویە بۆ ئازادکرنا مووسلێ، لەورا ژێ عیراق ھەولددەت پێشمەرگە ل گەل لەشکەرێ عیراقێ مووسلێ ئازادبکەن، ھەر چەند ئازادکرنا مووسلێ بۆ ھەرێما کوردستانی گەلەک یا گرنگە ومەترسیا تیرۆرێ ل سەر ھەرێمێ ناھێلیت، بەلێ پێدڤیە ھەرێم ب مەرج پشکداری وێ پرۆسێ بیت، چونکی عیراق ھەردەم کوردان پشت گوە دھاڤیژیت دبواری ئیداری و لەشکری دا وگرنگە پلانا پشتی ئازادکرنا مووسلێ ژێ بھێتە دانان” .
نازم ھەرکێ ئەوژی دیارکرکو عیراق نەشێت بیێ کوردان مووسلێ ئازاد بکەت وھەبوونا ناڤێ پێشمەرگەی ل گەل لەشکەری عیراقێ دێ بیتە فاکتەرێ ژناڤچوونا تیرۆرستان ل مووسل، حوکمەتا عیراقی ژی د وێ باوەریێ دایە کو بێی کوردان ئازادکرنا مووسلێ بۆ ئەستەمە.
خویاکر ژی” ھەکە ئازادکرنا مووسلێ ب سەرپەرشتیا راستەوخوە یا سەرۆک بارزانی بیت، د دەمەکێ نێزیکدا ب تەمامی دێ ھێتە ئازادکرن و نوکە گەلەک جھێن ستراتیژی و گرنگ یێن ددەستێن پێشمەرگەی دا وپشتی شنگال ژی ھاتیە ئازادکرن، ڕێ یا خوەش بووی بۆ ئازادکرنا مووسلێ”.
ناڤبری ئاماژە دا کو پێدڤیە ھەرێما کوردستانێ پێشوەخت ڕێککەفتنەکا ئیمزاکری دبوارێن ئیداری و لەشکری دا ل گەل بەغدا بھێتە ئیکلاکرن و نوکە وەزیرێ بەرگریا عیراقێ ھەولددەت پلانا ئازادکرنا مووسلێ ب تەمامی ل گەل ھەرێمێ بدانیت، بەلێ ئەم دبینین دانانا مەرجێن ئیکلاکەر ژلایێ کوردان ڤە بۆ ئازادکرنا مووسلێ کارەکێ باش و پێدڤیە بۆ پاشەرۆژا کوردێن ل مووسلێ دژین، چونکی بەردەوام زۆرداری ل کوردێن مووسلێ دھێتە کرن .
پەرلەمانتار نازم کەبیر دیارکر دانانا مەرجێن پێشوەخت ژلایێ کوردان ڤە دێ بیتە ئەگەر کو ھیزەکا ھەڤپشک د ناڤبەرا ھەرێمیچ و بەغدا ل مووسلێ ھەبیت و ئەڤە دێ بیتە فاکتەر کو ئێدی مەترسیا تیرۆرستان ل سەر مووسلێ نەمینیت، عیراقَ ژی ئەو شیان نێنن تیرۆرستان ل مووسلێ ژ ناڤ ببەت بێی ھێزێن پێشمەرگەی.
