ھێزەکا 10 ھزار کەسی ژ ئێزدیان بۆ رزگارکرنا شنگالێ دھێتە بەرھەڤکرن
دھۆک، لەزگین جۆقی:
فەرماندێ مەیدانێ ل چیایێ شنگال بۆ ئەڤرۆ دیار کر کو ب سەرپەرشتیا وەزارەتا پێشمەرگێ حوکمەتا ھەرێما کوردستانێ پێنج ھزار چەکدارێن ئێزدی ب چەکێ ئەلمانی مەشق و راھینان دکەن و ژ بۆ بەرەڤانی و رزگارکرنا قەزا شنگالێ د پلانێ دایە پێنج ھزار گەنجێن دی ژ کوردێن ئێزدی بھێنە وەرگرتن و دێ ژمارا گەنجێن ئێزدی بۆ بەرەڤانی و رزگارکرنا شنگالێ گەھتە دەە ھزار پێشمەرگەھان.
مەحما خەلیل فەرماندێ مەیدانێ ل چیایێ شنگالێ و پەرلەمانتارێ خۆلا بۆری یێ جڤاتا نوونەرێن عیراقێ دیار کر کو د قووناغا ئێکێ دا پێنج ھزار گەنجێن کوردێن ئێزدی گەھشتنە د ناڤ رێزێن فەرماندێ دا و بووینە پێشمەرگە بۆ بەرەڤانی و رزگارکرنا شنگالێ و گۆت “نوکە ئەم چاڤەرێی فەرمانا سەرۆک بارزانی نە بۆ رزگارکرنا شنگالێ و ئەو خۆبەخشێن بەری نوکە ل چیایێ شنگالێ بەرەڤانی دکرن پتریا وان بووینە پێشمەرگە و کەفتینە سەر ب وەزارەتا پێشمەرگێ کوردستانێ ڤە و دێ ل دووڤ فەرمانا سەرۆک بارزانی و وەزارەتا پێشمەرگەی چن”.
فەرماندێ مەیدانی ل چیایێ شنگالێ ئەو ژی دیار کر کو د دو قووناغان دا دێ دەە ھزار گەنجێن ئێزدی ھێنە مەشقدان و نوکە قووناغەک یا ھاتیە وەرگرتن و ل بەرە قووناغەکا دی ژی د ئایندەیێ دا بھێتە وەرگرتن و ب چەکێ ئەلمانی مەشق و راھینان بکەن و ھەموو کارێن فەرماندا کوردێن ئێزدێ دی ب سەرپەرشتیا وەزارەتا پێشمەرگێ کوردستانێ بیت.