ھێزەک ژ گەنجێن زومار بۆ پاراستنا ناحیێ دھێتە پێکئینان
دھۆک، لەزگین جۆقی:
ئەندامەکێ پەرلەمانی خولا بۆری ل پەرلەمانی عیراقی دیار کر کو ھێزەک ژ گەنجێن ناحیا زومار بۆ پاراستنا دەڤەرا زومار دێ ھێتە دروستکرن و ھێزەک ژ چار ھزار گەنجان بۆ پاراستنا دەڤەرا شنگال ژی دێ ھێتە پێکئینان.
مەحما خەلیل مەحم بۆ ئەڤرۆ خویا کر کو پشتی پێشمەرگێ کوردستانێ کونترۆل ل سەر ناحیا زومار کری ھزرا د پێکئینانا ھێزەکێ دا ھاتیە کرن کو ھێزەک ژ گەنجێن زومار ب خوە بۆ پاراستنا ئێمناھیا دەڤەرێ دگەل ھێزێن پێشمەرگەی بێتە پێکئینان، ھەروەسا پشتی شنگال ژی بھێتە رزگارکرن دێ ھێزەک ژ چار ھزار گەنجان بۆ پاراستنا دەڤەرێ ھێتە پیکئینان و دێ مل ب ملێ پێشمەرگەھێ کوردستانێ ڤە کارکەن بۆ پاراستنا شنگالێ.
ناڤبری ئەو ژی خویا کر کو دۆرێن ١٥ کیلومەتران ماینە کو ھێزێن پێشمەرگەی بگەھنە ناڤ ناحیا سنوونێ و ب ئێکجاری ژ دەستێن چەکدارێن داعش بھێتە رزگارکرن و گۆت “جەنابێ سەرۆک بارزانی ب شەڤ و رۆژ کار دکەت بۆ ئازادکرنا شنگالێ و ھەموو دەڤەرێن دی یێن کوردستانێ”.
مەحما خەلیل ئاشکرا ژی کر کو پشتی ناحیا زومار و رەبیعە ھاتینە رزگارکرن ترسەکا مەزن بۆ داعش دروست بوویە و ھێدی ھێدی یێ درەڤن و بەر ب مووسلێ دچن گۆت “رۆژ بۆ رۆژێ گەنجێن دگەھنە ناڤ رێزێن پێشمەرگەی و خۆبەخش شەڕی دکەن و بەرھەڤیێن مەزن بۆ ئازادکرنا شنگالێ دھێنە کرن، ب تنێ چاڤەرێی فەرمانا سەرۆک بارزانی دکەن داکو دەست ب ھێرشێ بکەن بۆ ئازادکرنا شنگال و سنوونێ و ھەموو دەڤەرێن دی یێن کوردستانێ و ئەم ب ھیڤینە وەختەکێ نێزیک مزگینیا ئازادکرنا شنگالێ بھێتە راگەھاندن”.