ھێلەکا شەمەندەفەرا ئیرانێ دێ باژێرێن ھەرێمێ پێکڤە گرێدەت
ئەڤرۆ نیوز:
رێڤەبەرێ گشتی یێ پەیوەندیێن حوکمەتا ھەرێما کوردستانێ ل گەل وەلاتێ ئیرانێ ئاشکرا کر کو پرۆژێ کێشانا ھێلا شەمەندەفەرێ دێ ژ وەلاتێ ئیرانێ ھێتە پارێزگەھا سلێمانیێ و ئیدارا گەرمیان و پارێزگەھا ھەولێرێ و پاش ژ ھەولێرێ دێ ھێتە پارێزگەھا دھۆکێ و ل دووماھیێ دێ چیتە وەلاتێ سووریا”.
عەبدوللا ئاکرەیی، رێڤەبەرێ گشتی یێ پەیوەندیێن حوکمەتا ھەرێما کوردستانێ ل گەل وەلاتێ ئیرانێ دیار کر کو ھەر دەمێ ئەڤ پرۆژە کەتە د وارێ بجھئینانێ دا دێ ب ھاریکاریا کومپانیێن ھەرێما کوردستانێ و وەلاتێ ئیرانێ ھێتە چێکرن و بۆ باسنیۆز گۆت: ” بڕیارە دەرگەھەکێ دی یێ سنووری دناڤبەرا ھەرێما کوردستانێ و وەلاتێ ئیرانێ دا بھێتە ڤەکرن و بۆ ڤێ مەرەمێ ژی ل ھەیاما بۆری شاندەکێ حوکمەتا ھەرێمی ل گەل پارێزگەرێ ئورمیە رێککەفتن کو ھەرێم ٤٠ کابینان بۆ دەرگەھێ نوو یێ سنووری ببەت و وەلاتێ ئیرانێ ژی ئاڤ و کارەبێ دابین بکەت دا کو ئەڤ دەرگەھێ نوو بشێت کارێ خوە بکەت”.
ناڤھاتی ئاماژە دا وێ چەندێ ژی کو گەلەک کۆمپانیێن ئیرانی ل ھەرێما کوردستانێ ھەنە، بەلێ یێن باوەرپێکری بتنێ ١٤ کۆمپانینە و گۆت: ” ھەر کەسەکێ ئیرانی ژ خالا سنووری یان ب رێیا فرۆکخانێ بھێتە ھەرێما کوردستانێ، ل دەسپێکێ ئەم ڤیزێ بۆ دەمێ ١٥ رۆژان بێ بەرانبەر ددەینێ و ئاسانکاری ژی بۆ دھێتە کرن کو ب ترۆمبێلین خوە یێن تایبەت ژی سەرەدانا ھەرێمێ بکەن، بەلێ خەلکێ ھەرێما کوردستانێ ب ڤیزە دچنە وەلاتێ ئیرانێ و بھایێ وەرگرتنا ڤیزا وان ٤٥ ھزار دینارن و ھەکە ب ترۆمبێلێن خوە ژی بچن دڤێت ٢٥٠ دۆلاران بدەن”.
