ھێمن ھەورامی: گوران گەلەک گڤاشتن کرن ئێکگرتوو و کومەل ژ حوکمەتێ دەرکەڤن و شکەستن ئینا
ئه‌ڤرۆ نيوز:
ئەندامەکێ سەرکرداتیا پارتی دیموکراتی کوردستان بەحسێ پێکئینانا حوکمەتا ھەرێما کوردستانێ یا بھێت و دروستکرنا دەستەکا نوو بۆ سەرۆکاتیا پەرلەمانێ کوردستانێ و ئاشکرادکەت کو کاراکرنا پەرلەمانێ کوردستانێ نە ب زڤراندنا سەرۆکێ پەرلەمانی یە.
ھێمن ھەورامی ئەندامێ سەرکرداتیا پارتی دیموکراتی کوردستان د ھەڤدیتنەکێ دا ل گەل ڕۆژناما ئەڤرۆ لدۆر ڕەوشا سیاسی ل کوردستانێ گۆت” بڕیار ئەوە کاودانێ کوردستانێ بگەھیتە ڕەوشا خوە یا ڕاست و قەیرانا نوکە یا سیاسی ئەوا پەیوەندی ب پرسا سەرۆکاتیا ھەرێما کوردستانێ و ب کاراکرنا پەرلەمانێ کوردستانێ ھەی، کاراکرنا پەرلەمانێ کوردستانێ ب تنێ ڤەگەراندنا سەرۆکێ پەرلەمانی نینە، دڤێت پەرلەمان بشێت قانوونان ڕاستڤەکەت و دەربکەت و چاڤدێریا حوکمەتێ بکەت و بۆ ڤێ چەندێ پێدڤی ب ڕێککەفتنەکا نوویە و بنیاتێ ڤێ ڕێککەفتنا نوو پارتی دیموکراتی کوردستان و ئێکەتی نشتیمانی کوردستان دشێن بکەن وەکو دو پارتێن سەرەکی، بەلێ مە دڤێت پارتێن دی ژی پشکداربن و خەلکێ دی ژی پشکداری بیت”.
ھێمنی زێدەتر گۆت” ڕێککەفتنا سیاسی یا ل گەل بزاڤا گۆڕان مە ھەلوەشاند، ئەم دبەرھەڤین ڕێککەفتنەکا نووتر ل گەل گۆڕانێ بکەین، بەلێ ھەکە گۆڕان نەھێت، ئەم ل سەر ڤێ چەندێ کار ناکەین”.
ل دۆر دەستنیشانکرنا دەمەکێ دیارکری بۆ پێکئینانا کابینا نوو یا حوکمەتێ، ھێمنی گۆت” دیار نینە و چو دەمێن دەستنیشانکری ژی بۆ پێکئینانا حوکمەتێ نەھاتینە دیارکرن، چونکی ڤێ چەندێ پەیوەندی ب ڕێککەفتنا پارتی دیموکراتی کوردستان و ئێکەتی نشتیمانی کوردستان و کابینا نوکە یا حوکمەتێ ھەیە، بەلێ بۆ کاراکرنا پەرلەمانێ کوردستانێ، مە پێدڤی ب دەستەکا نوو یا سەرۆکاتی یا پەرلەمانێ کوردستانێ یا ھەی، پێدڤیە سەرۆکەکێ نوو بۆ پەرلەمانی بھێتە دانان و بزاڤا گۆڕان شکەستن ئینا د رێڤەبرنا پەرلەمانێ کوردستانێ دا و مە پێ باشە ل دەرڤەی گۆڕان دەستەیا سەرۆکاتیا پەرلەمانێ کوردستانێ بھێتە پێکئینان”.
ھێمن ھەورامی، ئەندامێ سەرکرداتیا پارتی دیموکراتی کوردستان ئەوژی گۆت”نە مەرجە وەزیر دکابینا نوو دا یا حوکمەتا ھەرێما کوردستانێ بھێنە گوھۆڕین، ب تنێ دێ چاڤخشاندن دحوکمەتا نوو دا ھێتەکرن و نە گوھۆڕینا کابینا حوکمەتێ ب گشتی یە،”.
سەبارەت ھەلویستێ پارتێن دی بەرامبەر حوکمەتا داھاتی، ھەورامی گۆت” نوکە ئێکگرتوو ئیسلامی کوردستان یا دناڤ حوکمەتێ دا و نەچوویە دەرڤەی حوکمەتێ و گۆڕان گەلەک گڤاشتن کرن کو ئێکگرتوو ئیسلامی کوردستان و کۆمەلا ئیسلامی ل گەل دەرکەڤن ژ حوکمەتێ، بەلێ ئەو نە دەرکەفتن، بەلێ پشت بەستن دێ ل سەر ڕێککەفتنا نوو یا حوکمەتێ بیت”.
ل دۆر گرنگیا ڕێککەفتنا نوو د ناڤبەرا پارتی و ئێکەتی دا بۆ کاودانێن نوکە، دبێژیت” پارتی دیموکراتی کوردستان و ئێکەتی نشتیمانی کوردستان دو پارتێن سەرەکی نە و گرنگە پێکڤە بن بۆ ڤێ قوناغێ و بەرپرسیارەتیا دیرۆکی و لەشکری وسیاسی و سەنگا وان گەلەکە و بەرپرسیارەتیا پارتی و ئیکەتی زێدەترە، لەوما پارتی وئێکەتی پێکڤەبن باشترە”.
