ھەر دو رۆژان کەسەک ل ھەرێمێ دھێتە کوشتن
ئەڤرۆ نيوز:
ل گۆرەی ئاماژەکا دەستەیا سەربخوە یا مافێن مرۆڤی ل ھەرێما کوردستانێ، ب تنێ د ھەیڤا دووماھیا سالا بۆری دا 15 حالەتێن کوشتن و خوە کوشتنێ ل ھەرێما کوردستانێ ھاتینە تۆمارکرن و ئەگەرێ سەرەکی یێ ڤان تاوانان ژی دیاردا ھەلگرتنا چەکی یە.
ھەروەسا ل دووڤ ئامارا دەستەیا سەربخوە یا مافێن مرۆڤی د ھەیڤا 12 یا سالا بۆری دا 13 حالەتێن کوشتنێ و دو حالەتێن خوە کوشتنێ ل پارێزگەھێن ھەرێما کوردستانێ ھاتینە تۆمارکرن.
ئاماژە ب وێ چەندێ ژی کریە، ھەر د ھەیڤا 12 دا پێنج حالەتێن خەندقینێ، دو حالەتێن خوە سۆتنێ، حالەتەکێ سۆتنێ و حالەتەکێ ھاڤێتنا زارۆکی ھاتینە تۆمارکرن.
دەستەیا سەربخوە یا مافێن مرۆڤی ل ھەرێمێ د وێ ئامارێ دا خویا ژی کریە، ھەر د ھەیڤا 12 دا ب نارنجۆکێ ھێرش بۆ سەر مالا رێڤەبەرێ ئاسایشا قەرەتەپە ھاتیە کرن و پەقینەک ژی ل نێزیک بارەگەھێ (حدکا) ل باژێرێ کۆیە ھاتیە ئەنجام دان کو ھژمارەکا پێشمەرگێن وێ پارتێ و ئەندامێن ئاسایشێ شەھید و بریندار بوون.
دەستەیێ دایە زانین کو دیاردا ھەلگرتنا چەکی ئەگەرێ سەرەکی یێ ئەنجامدانا ڤان تاوانان بوویە، ھەروەسا لایەنێ ئابووری و جڤاکی ژی دو ئەگەرێن دی یێن حالەتێن کوشتن و خوە کوشتنێ نە ل ھەرێما کوردستانێ.
v
