ھەر دو مووچێن سالا بۆری دێ ھێنە بەلاڤکرن
ئه‌ڤرۆ نيوز:
سەرۆکێ سەنتەرێ کوردستان بۆ پرسێن ئابووری ئاشکرا کر کو حوکمەت دێ یا بەردەوام بیت ل سەر بەلاڤکرنا مووچێن دو ھەیڤێن سالا بۆری و ھەتا ب دووماھی نەھێت حوکمەت دەست ب بەلاڤکرنا مووچێ ھەیڤا کانوونا دویێ یێ ئەڤ سالە ناکەت و گۆت: “ئەڤ سالە دێ پێداچوون د خشتێ مووچێ فەرمانبەران دا ھێتەکرن”.
دکتۆر ئاراس خۆشناو، سەرۆکێ سەنتەرێ کوردستان بۆ پرسێن ئابووری بۆ رۆژناما ئەڤرۆ دیار کر کو حوکمەتا ھەرێما کوردستانێ ئەڤ سالە دێ ل سەر بەلاڤکرنا مووچێن ھەیڤێن 11 و 12 یێن سالا بۆری یا بەردەوام بیت و ناھێنە پاشکەفتکرن لەوڕا حوکمەتا لەز د بەلاڤکرنا مووچێ ھەیڤا 10 یێ سالا بۆری دا کر و گۆت: “ھەتا مووچێن سالا بۆری نەھێنە بەلاڤکرن حوکمەت دەست ب بەلاڤکرنا مووچێ ھەیڤا کانوونا دویێ یێ ئەڤ سالە ناکەت”.
ناڤھاتی خویا کر کو ئەڤ سالە حوکمەت دێ پێداچوونێ د خشتێ مووچێ فەرمانبەران دا کەت و دێ گھۆرین ب سەر شێوازێ بەلاڤکرنا مووچێ فەرمانبەران دا ھێن و گۆت: “بێ گۆمان ئەڤ سالە رەوشا بەلاڤکرنا مووچێ فەرمانبەران دێ ژ سالا بۆری باشتر بیت”.
