ھەستیکەکێ نوو یێ مرۆڤێ نیاندەرتال ھاتە دیتن
ئەڤرۆ نیوز، نەوزاد ھلۆری:
پشتی کو دوھی تیمەکا ڤەکولینان یا زانکویا کامبریدج یا ئەلمانی ژ نێزیک سەرەدانا شکەفتا شانەدەر ل دەڤەرا بارزان کری، شیان د نووترین کار دا ھەستیکەکێ نوو یێ مرۆڤێ نیاندەرتال ل شکەفتا شانەدەر ببینن، بڤێ یەکێ ھژمارا ھەستیکێن مرۆڤێ نیاندەرتال بونە 10 ھەستیک.
سوران ئەمیر، رێڤەبەرێ شینوارێن مێرگەسوور بۆ ئەڤرۆ نیوز گۆت: (ب مەرەما زێدەتر ڤەکولین ل سەر شکەفتا شانەدەر و گەریان ب دوڤ کەڤنترین مرۆڤ ل جیھانێ بناڤێ مرۆڤێ نیاندەرتال، تیمەکا تایبەت یا زانکویا کامبریدج یا ئەلمانی ژ نێزیک سەرەدانا شکەفتا شانەدەر یا سەر ب دەڤەرا بارزان کر و دەست ب ڤەکولینا خوە کر).
زێدەتر گۆت: (دوێ ڤەکولینێ دا نووترین ھەستیکێ مرۆڤێ نیاندەرتال ھاتە دیتن، بڤێ یەکێ ھژمارا ھەستیکێن ھەتا نوکە ل شکەفتا شانەدەر ھاتینە دیتن بونە 10 ھەستیک، کو ئەڤ یەک ژی دەستکەفتەکێ دن یێ دیروکی و شارستانیە بو کوردستان و دەڤەرا بارزان ژی).
ناڤبری دیارکر ژی کو ئەڤە بو دەما پێنج سالایە ئەو تیم کار ل سەر ڤەکولینان ل شکەفتا شانەدەر دکەت و زێدەتر گۆت: (گرێبەستا لێگەریان ب دوڤ ھەستیکێن مرۆڤێ نیاندەرتال ل شکەفتا شانەدەر ب دەما پێنج سالێن دن ھاتە درێژکرن، ژبەرکو گرنگە ڤەکولین لسەر شکەفتێ ھەمویێ بھێتەکرن، دیروک و شارستانیا مرۆڤان ل جیھانێ دھێتە دیارکرن و نیشانە کو کوردستان ژ مێژە وارگەھێ ژیانێ بویە).
دھێتە زانین ب مەرەما گرنگیدان ب پاراستنا شینوار و شارستانیا شکەفتا شانەدەر کومەلا دوستانیا کوردی- بریتانی ھژمارەکا خزمەتگوزاریان ل شکەفتا شانەدەر دروستکرینە ب تایبەتی رێیا گەھشتنا شکەفتێ.
دھێتە زانین کو شکەفتا شانەەدەر دکەڤیتە گوندێ شکەفتێ یا سەر ب ناحیا گورەتو ل سنوورێ قەزا مێرگەسوور و نێزیکە ل رووبارێ زێ مەزن، جھێ ڤەکولینێ نێزیکێ 20مەترا ھاتیە کولان.
