ھەشت پشکێن نوو ل زانینگەھا ئەمریکی کوردستان ل دھۆکێ ھاتنە ڤەکرن
ئەڤرۆ نيوز:
د رێورەسمەکێ تایبەت دا ل زانینگەھا ئەمریکی کوردستان ل دھۆکێ و ب ئامادەبوونا فەرھاد ئەمین ئەترووشی، پارێزگەرێ دھۆکێ و چەند کۆنسلێن گشتی یێن وەلاتان و سەرۆکێن زانکۆیان و سەرمایەدار و بەرسێن میری دوھی 24/10/2016 ڤەکرنا ھەشت پشکێن نوو ل ناڤ زانینگەھێ ھاتنە ڕاگەھاندن.
د. مایکل، سەروکێ زانینگەھا ئەمریکی کوردستان ل دھۆکێ بەحسێ رەوشا زانینگەھێ و گرنگیا ڤەکرنا وان ھەشت پشکێن نوو کر و گۆت: “ب ڤەکرنا ڤان پشکێن نوو زانینگەھا ئەمریکی شیا پێنگاڤێن نوو یێن زانستی ل پارێزگەھێ ب ھاڤێژیت، دیسا سوپاسیا وان ھەموو لایەنان کر یێن بووینە پشتەڤان بۆ ڤەکرنا زانیگەھا ئەمریکی ل پارێزگەھا دھۆکێ”.
ھەروەسا د. ھونەر، جێگرێ سەرۆکێ زانینگەھا ئەمریکی کوردستان ل دھۆکێ دیارکر کو بۆ سالا نوو یا خواندنێ 2016 – 2017 وان ھەشت پشکێن نوو ل ھەمبەر قوتابیان ڤەکرینە، بڤێ چەندێ ژی ھژمارا پشکێن خواندنێ دێ بنە 13 پشکێن زانستی یێن جودا جودا و گۆت: “بۆ سالا بھێت ھەردو پشکێن زانستێن پەروەردەیی و ساخلەمی ژی دێ ھێنە ڤەکرن”.
ژ لایێ خوەڤە پارێزگەرێ دھۆکێ د پەیڤەکێ دا دەستخوشی ل زانینگەھا ئەمریکی کوردستان ل دھۆکێ کر بۆ ڤەکرنا پشکێن نوو، ھەروەسا پیرۆزباھی ل قوتابیێن زانینگەھێ کر ب ھاتنا سالا نوو یا خاوندنێ و ڤەکرنا پشکێن نوو و ھیڤی خواستن دەرچوویێن زانینگەھا ئەمریکی کوردستان ل دھۆکێ خزمەتا خەلکێ کوردستانێ بکەن.
