ھەلبژارتنێن لقێن سەندیکا پارێزەرێن کوردستانێ دێ ھێنەکرن
ئەڤرۆ:
پشتی بۆرینا سالەک و پێنچ ھەیڤان ل سەر ھەلبژارتنێن سەندیکا پارێزەرێن کوردستانێ ژبۆ دیارکرنا نەقیب و ئەندامێن جڤاتا سەندیکایێ، ئەوژی ژبەر چەندین ناکوکیێن قانوونی کو دناڤبەرا لایەنێن پشکدار د ھەلبژارتنان دا ھاتبوونە روودان، ھەتا گەھشتیە رادەیێ تومارکرنا سکالایان ل سەر ھەڤدۆ، جارەک دن لایەنێن ناکۆک ل گۆرەی ئێتیفاقەکا سیاسی رێککەفتن کو ئەنجامێن ھەلبژارتنان بھێنە پەسەندکرن، لەورا بڕیار ھاتە دان ل رۆژا ١٩ی ئادارا ٢٠١٥ێ دەستەیا نوو کارێ خوە ئەنجام بدەت.
ئەندامێ جڤاتا سەندیکا پارێزەرێن کوردستانێ وەکو نوونەرێ دھۆکێ، پارێزەر عێمت عارف تایبەت بۆ ئەڤرۆ دیارکر کو ل رێککەفتی ١٩ی ئادارا ٢٠١٥ێ دەستەیا جڤاتا سەندیکا پارێزەرێن کوردستانێ دەستبکاربوو و نەقیبێ بەرێ کارێ خوە رادەستی نەقیبێ نوو کر ئەوژی پارێزەر (بەختیار حەیدەر) کاندیدی سەرکەفتی ل سەر لیستا پارتی دیموکراتی کوردستان و گۆت: ئەنجامێن ھەلبژارتنان ھاتنە پەسەندکرن و سوبەھی دێ کومبوونا جڤاتێ ھێتەکرن ژ بۆ دیارکرنا ژڤانێ ھەلبژارتنێن لقێن سەندیکایێ.
پارێزەر عێمت عارفی ئەوژی ئاشکراکر کو، ھەلبژارتن دێ ل پینج لقان ھێنەکرن ئەوژی ل ھەلولێر و دھۆک و سلێمانی و کەرکوک و حەلەبچە کو ڤێ دوماھیێ ھاتیە زێدەکرن، پارێزەری گۆتژی: ھندەک کێشە ھەنە دێ ل کومبوونا جڤاتێ دا ھێنە بەحس کرن مینا چاوانیا وەرگرتنا دەرچووێن قوتابیێن کولیژێن قانوونی ل سەندیکایێ، دیسا بەحسکرنا ئالیاتێن ئەنجامدانا ھەلبژارتنێن لقان.
