ھەڤسەرۆکێ HDP: دێ ڤێ جارێ وەکو پارتی پشکداریێ د ھەلبژارتنێن پەرلەمانی دا کەین
ئەڤرۆ نيوز:
د ديداره‌كێ دا، بۆ رۆژناما ئه‌ڤرۆ كو سه‌رجان مه‌حمود نڤيسيه، سەلاحەین دەمیرتاش ھەڤسەرۆکێ پارتیا دیموکراتی یا گەلان HDP بۆ رۆژناما ئەڤرۆ دیار کر کو د ھەلبژارتنێن سەرۆک کۆماریێ دا دەنگێ پارتیا مە گەلەک زێدە بوون و مە شیا خوە نێزیکی ١٠% بکەین کو ئەڤە بۆ مە سەرکەڤتنەکا مەزن بوو، چونکو بەری نھا پارتێن مە نەدشیان ڤی رێژەیی بدەستڤە بینن و ژ بەر ڤێ یەکێ ژی مە وەک ئەندامێن سەربخوە پشکداری د ھەلبژارتنان دا دکر دا بشێین پاشی ل پەرلەمانی گرۆپێ خوە ئاڤا بکەین و گۆت: “لێ نھا مە دەست ب خەباتەکا گەلەک مەزن د ئاستێ ھەموو تورکیا دا کریە و نھا ل ٨١ پارێزگەە و باژارێن مەزن یێن تورکیا و باکورێ کوردستانێ مە لیژنە ئاڤا کرینە و ھەڤالێن مە دەست ب خەباتەکا مەزن کرینە، چونکو مە دڤێت ب ڤی رەنگی وەک پارتی پشکداریێ د ھەلبژارتنان دا بکەین و بەندا ١٠% کو ھەردەم ئاستەنگی بۆ کوردان دروست کریە دەرباز بکەین و ھەکە مە شیا رێژا دەنگێ خوە ژ ١٠% دەرباز بکەین دێ بشێن پتر ژ ٦٠ ئەندامێن خوە دەربازی ناڤ پەرلەمانی بکەین و ئەڤە دێ ھەموو ھەڤسەنگیێن سیاسی ل تورکیا دەتە گوھۆرین”.
ھەڤسەرۆکێ HDP ئەو یەک ژی دیار کر کو ژ بەر شەرێ سیە سالێن بۆری رێژەکا بەرچاڤ یا کوردان ل جە و وارێن خوە کۆچبەری گەلەک باژارێن مەزن یێن تورکیا بووینە و ژ بەر ڤێ یەکێ ژی کاریگەری ل دەنگێ مە دکەت و بەری نھا مە نەدشیا خوە بگەھیننە وان، لێ نھا مە دەست ب رێکخستنەکا ب ھێز د ئاستێ تورکیا کریە و مە دڤێت دەنگێ ھەموو کوردان و خەلکێ دی یێ دیموکراتیخواز یێ تورکیا بدەستڤە بینین و گۆت: “مە دڤێت ب ھێزەکا مەزن پشکداریێ د سیاسەتێ دا بکەین و ئێدی وەک جاران دەولەتا تورکیا نەشێت ئاستەنگیان ل ھەمبەر ئیرادا گەلێ کورد دروست بکەت، سەرکەڤتنا مە د ھەلبژارتنێن داھاتی یێ پەرلەمانێ تورکیا دێ رەوشا سیاسی دەتە گوھۆرین و ئێدی پرسا کوردی دێ ل پەرلەمانێ تورکیا رۆژانە ھێتە گەنگەشەکرن و دەولەتا تورکیا ژی دێ نەچار بیت کو پرسا کوردی چارە بکەت”.
