ھەکە رێککەفتن نەھێتەکرن دێ دو ئیدارەیی پەیدابیت
ئه‌ڤرۆ نيوز:
کادرەکێ پێشکەفتیێ پارتی دیموکراتی کوردستان دبێژیت، سیاسەتا پارتی بۆ بەردەوامیا سەرۆک بارزانی بۆ دو سالێن دی د پۆستێ سەرۆکاتیا ھەرێمێ دا، د بەرژەوەندیا خەلکێ کوردستانێ دایە و رێککەفتنا ئێکەتیێ و گۆڕانێ ل سەر کیستێ پارتی یە، چونکی وان ل بەرە ھەکە پارتی رازی نەبوو ھەرێما کوردستانێ بکەنە دو ئیدارە و ئەز د ئاخڤتنا خوە بەرپرسم.
بەھمەن کاک عەبدولا، چاڤدێرێ سیاسی کادرێ پێشکەفتیێ پارتی بۆ ئەڤرۆ گۆت” سیاسەتا ئەڤرۆ یا پارتی سیاسەتەکا ھەنوکەیە و ل سەر رێڤەچوونا سیاسەتا دەڤەرێ یە، بەلێ د رەفتارا چار لایەنێن دی دا بڤی شێوەی ھزر ناکەن، جارێ ئێکەتی و بزاڤا گۆڕان ل سەر بنەمایێ رۆمانسی سیاسەتێ دکەن و تنێ بۆ دەمەکێ دیاری کری و راکێشانا سۆزا خەلکێ ھەرێما کوردستانێ یە، چونکی بەری نوکە ژی د ھەوێن ھەلبژارتناندا گۆڕان و ئێکەتیێ چو نەما ھەمبەر ئێک نەکەن، لێ نوکە ھەردوک یێن بووینە ئێک ھەمبەری پارتی، پارتی بەرژەوەندیا راستەقینەیا خەلکێ ھەرێما کوردستانێ دخوازیت، لەوڕا ھەتا نوکە ب شێوێ تەوافقێ پۆست ھاتینە بەلاڤکرن، ئێکەتیێ ل بەغدا کۆرسیێن وێ تنێ سەرۆک کۆمار بدەستڤەدئینا، ھەکە ل دووڤ ئەنجامێن ھەلبژارتنان بیت، پۆستێ سەرۆک کۆماری بەھرا پارتیە، ژ بەر کو پارتی ھێزا ئێکێ یە، ژبلی پۆستێ سەرۆک کۆماری، وەزارەتەکا زێدە مەدایە ئێکەتیێ، گۆڕان ژی ب ھەمان شێوەیە، بۆ زانیاریێن خەلکێ کوردستانێ نەوشیروان مستەفای ب تێلەفۆنێ داخواز ژ سەرۆک بارزانی کریە، جێگرێ سەرۆکێ جڤاتا نوونەران بدەنە بزاڤا گۆڕانێ، ھەتا دلێ ئێکگرتووی نەشکێت مە ل ھەرێمێ وەزارەتەک زێدە یا دایە ئێکگرتوویا ئیسلامی، ل ھەرێما کوردستانێ ژی ھەموو کابینا ھەشتێ ب رێککەفتن و سازان ھاتیە پێکئینان، بلا خەلک بزانیت ئێکەتیێ ب ھەژدە کورسیێن پەرلەمانێ کوردستانێ ھندی پارتی وەزارەت وەرگرتینە”.
بەھمەنی گۆت ژی” ئەم وەکی پارتی دخوازین ھەموو لایەنێن سیاسی د ناڤبەرا خوەدا رێککەڤن ، بەلێ ئەڤ لێک نێزیکبوون و رێککەفتنا د ناڤبەرا ئێکەتیێ و گۆڕانێ دا، بێگومان ل سەر کیستێ پارتی یە و نەکو دژی بەرژەوەندیێن پارتی یە، بەلکو دژی بەرژەوەندیێن مللەتێ کوردە، ھەتا دوھی ئێکەتی رازینەبوو دەستا ژ پۆستێ پارێزگارێ سلێمانیێ بەردەت، چاوا دێ نوکە بڤی رادەی خوە نێزیکی ئێک کەن، ب پشتڕاستی ڤە دبێژم و بوچوونا منا تایبەت ئەڤە، ئێکەتی و گۆڕان رێکەفتینە دژی پارتی، ھەکە رێککەفتنا وان سەرنەگرت، دێ ھەرێما کوردستانێ کەنە دو ئیدارە و تنێ ئەڤە مەرەما وانە”.
