ھەکە ل زڤستانێ چادرێن نوو یان کەرەڤانە نەھێنە دانان، دێ زیانێن مەزن گەھنە ئاواران
ئه‌ڤرۆ نيوز: قائیمقامێ قەزا شنگال بۆ ئەڤرۆ راگەھاند، بایێ ب ھێز یێ شەڤا ٧ ل سەر ٨/٩/ ھاتی زیان گەھاندنە ھەموو خێڤەتێن ئاواران ل چیایێ شنگال کو خیڤەتێن وەختی ھاتبوونە دانان بۆ ماوێ چەند ھەیڤانە، نەکو بۆ سالان ھاتبوونە دانان، ھەکە کەرەڤانە یان خێڤەتێن نوو نەھێنە دانان ل وەرزێ زڤستانا ئەڤ سالە دێ گەلەک زیان گەھنە ئاواران، ل کۆمەلگەھا خانکێ ژی ١٥٠ چادرێن ئاواران کەڤتنە خارێ.
دھۆک، لەزگین جۆقی:
میەسەر حەجی، قائیمقامێ قەزا شنگال دیار کر، ئەو ھڕ و بایێ شەڤا ٧-٨/٩ ھاتی، زیانێن گەلەک مەزن گەھاندنە ئاواران، ب تایبەتی ئاوارێن ماینە ل چیایێ شنگال و پرانیا خیڤەتێن وان ئێخستین و بێی سەروبەرکرن و گۆت ژی: خێڤەت بۆ ماوێ ھەیڤەکێ یان دو ھەیڤان ھاتبوونە دانان نە بۆ سالەکێ، لەورا ژی بایێ بھێز ل شەڤا بۆری ھاتی گەلەک زیان گەھاندنە ئاواران، ھەکە خێڤەتێن نوو یان کەرەڤانە بۆ ئاواران نەھێنە دانان، دێ ئەڤ سالە زیانێن مەزن گەھنە ئاواران و دێ ژیانا خوە د ناڤ زڤستانەکا گەلەک سەخت و دژوار دا بۆرینن، ئەم داخوازێ ژ حوکمەتا ھەرێما کوردستانێ و رێکخراوان دکەین، خێڤەتێن نوو یان کەرەڤانە بۆ ئاواران بھێنە دابینکرن، ب تایبەتی ژی ئەو ئاوارێن ماینە ل چیایێ شنگال.
زێدەتر گۆت: زیان یێ گەھشتینە ھەموو خیڤەتێن چیایی شنگال وگەل وپەلین ئاواران پووچکرینە راستی ژی َخیڤەت ھاتبوونە دانان وەختی بوون بۆ ماوی چەند ھەیڤان لەورا ئەز پیشبینی دکەن ل زڤستانا ئەڤ سالە گەلەک زیان بگەھنە ئاوارێن بن خیڤەتاندا ئەم داخوازی دکەن کارڤانە بھێنە دانان بۆ ھەموو ئاواران شوونا خیڤەتان چونکو کارڤانە زور باشترە ژ خێڤەتی چەند بای بھیز بھێت زیان بھێت زیان مەزنتر دی گەھنە ئاواران دبن خێڤەتان دا.
عەمار حسێن، ھاریکارێ رێڤەبەرێ کەمپا خانکی بۆ ئەڤرۆ دیار کر، ژ بەر ھاتنا بایێ بھێز و بارانێ، ١٥٠ چادرێن وان کەڤتنە خوارێ و گەلەک زیان گەھشتنە ئاواران و گەلەک کەل و پەلێن وان ژناڤچوون و بەلگەنامێن وان ب فەرمی ژی ھاتنە تەرکرن، ئەڤ ئاواران چادرێن وان کەڤتینە خوارێ ل سەر خانیێن ھەیکەل و ناسیارێن خوە، یێ د ناڤ کەمپێ دا ھاتنە بەلاڤکرن و دەملدەست مە گازیا ئاواران گەھاندە جھێن پەیوەندیدار بۆ دابینکرنا چادرێن نوو بۆ وان خێزانێن ئاوارە یێ چادرێن وان کەڤتینە خوارێ.
عەنتەر کەلو، بەرپرسێ بنگەھێ لالش یێ رەوشەنبیری و جڤاکی ل خانکێ دیار کر، ئاڤ چوو ناڤ چادرێن ھندەک ئاوارێن دی دا و د ئەنجام دا ئاھێن وان یێن خارنێ و کەل و پەلێن وان تێکدان و بێ سەروبەرکرن، ئەو ئاوارێن چادرین وان کەفتین ژی ھەموو ھاتنە بەلاڤکرن ل سەر خەلکی.
جەلال لەزگین، بەرپرسێ بنگەھی لالش تایێ شاریا بۆ ئەڤرۆ گۆت: ئەو ئاوارێن بێ رێکخستن بۆ خوە چادر ل ناڤ کۆمەلگەھێ داناین، ژ ئەنجامێ ھاتنا بایێ بھێز و گەلەک زەرەرمەند بووینە، ھەکە رێیێن چارەسەریێ نەھێنە دیتن و خیڤەت یان کەرەڤانە نەھێنە دانان بۆ وان، ئاوارێن ژ دەرڤەی کەمپا بۆ خوە بەتەنی و نایلون داناین چووینە بنڤە ئاکنجی بووینە باش کاری خوە نەکرینە بۆ وەرزی زڤستانێ، لەورا ژی ھاتنا ئێکەم بایێ بھێز و بارانێ گەلەک زیان گەھشتنە وان ئاوارێن شاریا یێن ژ دەرڤەی کەمپێ ئاکنجی.
ناڤبری ئەو ژی دیار کر، ھەکە چو چارەسەری و ھاریکاریا وان ھەموو ئاواران نەھێتە کرن، یێ ژ دەرڤەی کەمپان ئاکنجی دێ تووشی سەخترین و دژوارترین رەوش بن ل وەرزێ زڤستانێ.
