یادگەها بارزانیێ نەمر دێ بزاڤا گەشتیاری ل دەڤەرێ خورت كەت
ئەڤرۆ، سالار دۆسكی:
یادگەها بارزانیێ نەمر ل دەڤەرا بارزان ب بەرهەڤبوونا سەرۆك بارزانی و سەركردێن عیراقێ و ناڤخوە و بیانی و كەساتیێن دەڤەرێ هاتەڤەكرن كو پێك دهێت ژ پشكێن (موزەخانە، پەرتوكخانە، گەلەری، مزگەڤت، كتێبخانە، پشكا دكیومێنتاری) و چەندین پشكێن خزمەت گوزاری و شارەزایەكێ گەشت و گۆزارێ ژی دبێژیت: ئەڤ مۆزەخانە دێ بزاڤا گەشتیاری ل هەرێما كوردستانێ خورت كەت و دێ بیتە دەرگەهەك وەلاتیێن دەڤەرێ متایێ خوە باشتر ژ جاران بفرۆشنە گەشتیاران.
سیروان بارزانی، سەرپەرشتێ پرۆژێ موزەخانا نشتیمانی یا بارزان گۆت: ئەرشیفەكێ مەزن د ڤێ موزەخانێ دا هاتیە كومكرن كو ڤەدگەریت بۆ ئەرشیفێ (ئوسمانیان و ئنگلیزی) ل دەڤەرێ و دێ پەرتوكخانەكا ئەلكترونی هێتەڤەكرن و بۆ جارا ئێكێ ئەو ژێدەرێن ل بەر دەست نەبووینە دێ ل ڤێ پەرتوكاخانا ئەلكترونی ل بەر دەست هەبن، بۆ هەر ڤەكۆلەرەك و قوتابیەكێ دكتورایێ یان ماستەرێ بخوینیت دێ ل بەر دەست بیت، پتریا مێژوویا گەلێ كوردستانێ ب دەستێن نەحەزێن كوردان هاتینە نڤێسین و هەبوونا ڤێ پەرتووكخانێ دێ وێ شاشیێ راستڤە كەت ڤە.
سیروان بارزانی گۆت ژی: ئەف كارە دێ بیتە پرۆژەك بۆ نفشێ نوو و خەلكێ بیانیێ سەرەدانا دەڤەرێ دكەن دا ببینن كا ئەڤ شورەش و ئازادی یە ژ چ هاتیە، ئەگەر ئەڤ خەبات و قارەمانی و خوینا شەهیدان نەبایە، ئەڤرۆ ئەم ب ئازادی نەدژیاین، نێزیكی 15 سالانە كاری ل سەر ڤی پرۆژەی دكەین، لێ ناگەهیتە خەباتا هەیڤەكێ یا ڤان قەهرەمانان و ناگەهیتە قەترەكا ماندیبوونا بارزانیێ نەمر، گرنگە ئاماژە پێ بهێتەكرن هەكە دایكا حمایل یا رەحمەتی نەبا و هزرا وێ نەبا ئەڤ هەمی دەربەدەری و ئاوارەیی یە و هەر تشتەكێ بارزانیێ نەمر هەر ژ دەمێ دامەزراندنا دەولەتا كوردستانێ ل مهابادێ هەتا رۆژا وەغەركرنێ هەمی رەحمەتی دایكا حەمایل پاراستی نە.
د. خلیل غازی، ئەندامێ ئەنجوومەنێ نووینەرێن عیراقێ، ل دور ڤەكرنا ڤێ موزەخانێ گۆت: ڤەكرنا ڤێ موزەخانێ گرنگیەكا مەزن بۆ خەلكێ كوردستانێ و دەرڤە هەیە، چونكە دیرۆك و مێژوویا مللەتێ كورد دوژمنێن كوردان نڤێسی یە و هەر كەسەكی ل گورەی بەرژەوەندیێن خوە، لەوما دبینم ئەڤ موزەخانا ب دیكومێنتاری دێ بۆ هەمی خەلكی ل دەرڤە و نافخوە سەلمینت كو مللەتێ كورد مللەتەكێ ئاشتی خوازە و نە شەرخوازە.
ئحسان ئامێدی، بەرپرسێ ناڤەندا خانی یا رەوشەنبیری و راگەهاندنێ، ل دور ڤەكرنا موزەخانا بارزانیێ نەمر بۆ ئەڤرۆ گۆت: ئەڤرۆ رۆژەكا پر سەروەری یە كو خەباتا مللەتێ كورد ب رەنگەكێ دیكومێنتاری بووویە موزەخانەك، ئەڤە مەزنترین پەرتووكا مێژوو و خەباتا گەلێ كوردستانێ یە، ب تایبەت یا بارازان و گەلەك تشتێ گرنگ تێدا هەیە و تایبەت رێبازا بارزانی كا ل دەسپێكێ چەوا بوویە و گەهشتیە چ قوناغ و هەر كەسەكێ دڤێت تشتەكی ژ مللەتێ كورد بزانیت و تایبەت سەدێ بیستێ و هەتا نوكە دڤێت سەرەدانا ڤێ موزەخانێ بكەت و د ڤێ موزەخانێ دا دێ دیمەنا بینت، دا بزانیت ڤی مللەتی چو سەروەری كرینە هەتا ئەڤ مللەتە گەهشتیە ڤێ قوناغێ.
عەبدولرەزاق نهێلی بسپور و شارەزا د بیاڤێ گەشت و گوزارێ دا بەحسێ گرنگیا ڤێ موزەخانێ دكەت و بۆ رۆژناما ئەڤرۆ دبێژیت: زێدەباری پاراستنا وان پاشماوێن سەركردێن مەزن شورەش پێ كرین و بەرەڤانی ژ هەبوونێ كرین، وەرچەرخانەكا شارستانی و هەڤچەرخە بۆ پتر دانە نیاسینا شوناسا بزاڤا رزگاریخوازا مللەتێ كورد، هەبوونا ڤێ موزەخانێ گەنجینەكا مەزنە بۆ راكێشانا گەشتیارێن بیانی بۆ ناڤ هەرێما كوردستانێ ب گشتی و دەڤەرا بارزان ب تایبەتی، ب مەرجەكی دڤێت ب میكیانزم و رێكخستنەكا سەردەم سەرەدەری دگەل بهێتەكرن.
زێدەتر گۆت: ئەو كەسێن سەرەدانا موزەخانێ دكەن رۆژنامەڤان و گەروكێت جیهانی نە، ڤەكولەر و زانا، رەوشەنبیر و نڤیسەر، سەرۆك و مەزنە بەرپرسێن وەلاتان، مامۆستایێن زانكویێ، وەلاتیێن جیهانی و ناڤخۆ ب مەبەستێن گەشتیارییێ وەرگرتنا هندەك زانیاریان، چەوا دێ موزەخانە هێتە ناف دەولەتیكرن، دڤێت موزەخانە بچیتە د نەخشێ رێبەرێ گەشتیاریێ نافخوە و جیهانی دا، موزەخانە دەولەمەند بیت ب جۆرەیا پاشماوا، ب زمانێن بیانی بازاركرن و بازارگەری بۆ بهێتەكرن.
ل دور مفایێن موزەخانێ ژی، عەبدولرەزاق نهێلی گۆت: مفایێن موزەخانێ ژ روویێ گەشت و گوزارێ ڤە، دێ بزاڤا گەشتیاری ب گشتی ل هەرێما كوردستانێ خورت بیت، دێ ب هزران دەلیڤێن كاری بۆ وەلاتیێن دەڤەرێ پەیدابن، دێ بیتە دەرگەهەك وەلاتیێن دەڤەرێ متایێ خوە باشتر ژ جاران بفرۆشنە گەشتیاران، دێ بیتە هوكار بۆ پتر دانە نیاسینا مللەتێ كورد ل گەل گەشتیاران، دێ بیتەر دەرگەه وەبەرهێنەر پرۆژێن گەشتیاری ل دەڤەرێ بجه بینن و دێ ئابوورێ گەشت و گوزارێ ب هێز بیت.
