یانەیێن كوردستانێ و باجا شاشیێن دادڤانان
ئیحسان حەسەن
یێ كو ل نێزیك بەرێ خوە ددەنە هەڤركیێن خولا ستێرێن ئیراقێ یا فوتبۆلێ لڤی وەرزی، ب چ رەنگان نەشێن چاڤێن خوە ژوێ رێژەیا مەزن یا شاشیێن دادڤانێن خولێ بگرن، ب تایبەتی ئەو شاشیێن كوژەك یێن كو ئەڤ دادڤانە دكەن، دژی یانەیێن كوردستانێ بۆ بەرژوەندییا یانەیێن دی یێن ئیراقێ، ئەڤە رامانا وێ نادەت، كو دیاریێن دژی دا دادڤانێن خولێ شاشییان ناكەن، یان ب دادی یاریان برێڤەدبەن، بەلێ پتر هەست پێ دهێتە كرن دەمێ تیمێن مە یاریان دكەن، ب تایبەتی دقۆناغا دویێ یا خولێ دا، ژبەر كو ئەگەر مە دقۆناغا ئێكێ دا هەست پێ كربیت كو دیاریێن تیمێن مە ژدەرڤی یاریگەهێ، بریارێن شاش دەرهەقێ وان دهێنە دان، دڤێ قۆناغێ دا هەتا لیاریگەهێن كوردستانێ ژی نەدادی و زۆلم ل تیم و یاریزانێن مە دهێتە كرن، ئەڤە بوویە جهێ حێبەتییا هەموو چاڤدێر و رەخنەگرو پشتەڤانان، بەلێ ئەڤە وێ چەندێ ناگەهینیت كو مە تێبینی نینن لسەر ئاستێ تەكنیكی و تەكتیكی یێ یانەیێن مە یێن كوردستانێ، یێن كو پێدڤی بوو لسەر باشتر هاتبانە دناڤا هەڤركییێ دا، ژبۆ پتر رازیكرنا پشتەڤانێن خوە، ئانكو ئەوژی بێ بەهرنینن ژڤێ پاشكەڤتنێ، ئەگەر ئەم تا رادەیەكی یانەیا هەولێرێ ژێ بینە دەر، ئەوا هێشتا دناڤا هەڤركییێ دا، بێ گومان یانەیێن پایتەختی تنێ بەرپرسیار نینن ژڤان شاشییان یێن كو دكەڤنە دبەرژوەندیا واندا و مفای ژێ دبینن، بەلكو گونەها مەزن دكەڤیتە لسەر ستوویێ فێدراسیونا فوتبۆلا ئیراقێ و لژنەیا دادڤانان یێن كو هەتا نها دبێدەنگ و چ پێنكاڤێن كرداری نەهاڤێژتین كو سنورەكی بۆ ڤان شاشییان و ڤێ نەدادیێ بدانن، سەرباری وان هەموو دەنگێن دهێنە بلندكرن، هەروەسا ئەو وێنێن دهێنە ئاشكراكرن، ژلایێ شرۆڤەكار و رەخنەگران و هەتا ستێرێن بەرێ یێن فوتبۆلێ، هەر ژ لاوازیا برێڤەبرنا یاریێ، دیسان ژۆرا ڤارێ یێن كو دكەڤنە دبەرژەوەندیا هژمارەكا یانەیان دا، ژبلی هندێ بوویە ئەگەر كو هندەك ژ بەرپرسێن یانەیان، دیسان راهێنەران ژی دەنگێن خوە یێن نەرازیبوونێ بلندبكەن، و هەست پێ بكەن كو ئێدی نەشێن بێدەنگ بمینن بەرامبەر ڤێ زۆلمێ ئەوا یانەیێن وان تێدا دبنە قوربانی، ژبەر كو ئەوا نها دهێتە دیتن و ئەم دبینین ب چ رەنگان یارەوا نینە لسەر یانەیێن مە یێن كو ب ملیاران پارەی خەرج دكەن بۆ هندێ پشكداریەكا سەرفەارز بكەن، بەلێ ڤێ نەدادیێ بەرامبەر شاشیێن سەرەتایی یێن دادڤانان دبینن، هەستكرنا وان ب بێدەنگی و بێ هەولێستی یا فێدرسیونا فوتبۆلێ یێن كو چ پێنگاڤ نەهاڤێژیتن كو ڤێ رەوشێ ڤەگەرینە لسەر رێرەوا خوە یا راست، وەكریە كو دادپەروەردی دناڤبەرا یانەیا دا بەرزەبیت، لدویماهییێ یامن دڤێت بێژم ئەگەر ئەڤ چاڤدێریە بەرزەبوو، هنگی یاسا چەند دتوند و هوور بن، نەشێن رێگریێ ل شاشییان و بەرزەبوونا مافان بگرن، ئەگەر یانەیێن مە یێن كوردستانێ بڤێن سننورەكی بۆ ڤێ نەدادپەروەریێ بدانن، پێدڤی هەلویستەكێ ئێكگرتی وەرگرن، هەلبژارتنا فیدارسیونا فوتبۆلێ یێن كو دێ پشتی چەند رۆژێن دێ هێنە ئەنجامدان، باشترین دەلیڤەیە ڤان كەسان دناڤا كارێ فوتبۆلێ دا نەهێلن.
