یونانێ ب ڤی ره‌نگی هه‌لوه‌ستێ خوه بۆ رێفراندۆما سه‌رخوه‌بوونا كوردستانێ نیشان دا
ئه‌ڤرۆ نیوز:
وه‌زیرێ ده‌رڤه یێ یۆنان، نیكۆس كۆتزیاس د هه‌ڤپه‌یڤینه‌كێ دا دگه‌ل رادیۆیا ئه‌لفا یا وی وه‌لاتی دا باس ل ره‌وشا رۆژهه‌لاتا ناڤین كر و رۆناهی به‌ردا سه‌ر مژارا رێفراندۆما هه‌رێما كوردستانێ و گۆت: مانا ئیراقێ وه‌ك وه‌لاته‌كێ ئێكگرتی تشته‌كه كو پێدڤییه خه‌لكێ وی وه‌لاتی ب خوه بڤێت و حه‌ز بۆ هه‌بیت و چ ئالییه‌كێ دی یێ ژده‌رڤه ماف نینه ل سه‌ر وان بسه‌پینیت.
ئه‌ڤا ل خوارێ ده‌قێ گۆتنا وی يه ل دۆر كوردان:
“مژارا كوردی دو پێكهاته نها هه‌نه، یا ئێكێ هه‌رێما كوردستانا ئیراقێ یه، كو ئێكه‌تییا ئه‌ورۆپا دخوازیت ئیراقێ وه‌ك وه‌لاته‌كێ ئێكگرتی ببینیت، لێ وه‌كی دهێته زانین پێدڤییه خه‌لكێ وی وه‌لاتی ب خوه حه‌زا ئێكگرتنێ هه‌بیت و بخوازن، نه ئالیێ سێیێ وێ بریارێ بۆ بده‌ت و خواستا خوه سه‌ر بسه‌پینیت.
رێفراندۆم بۆ ئیلۆنا ئه‌ڤ ساله ل هه‌رێما كوردستانێ هاتییه راگه‌هاندن، مافێ ڤێ رێفراندۆمێ هه‌ر ژ ده‌ستپێكێ ژ ئالیێ رێككه‌فتنا ده‌ستوورێ ئیراقێ ڤه هاتییه بنه‌جهكرن، لێ هه‌تا نها ئه‌و ماف نه‌هاتییه پراكتیزه كرن و بكارئینان.
ژ ئالییه‌كێ دی ڤه مژارا هه‌رێما كوردی ل باكۆرێ سووریێ هه‌یه، كو ئاریشه‌یه‌كا مه‌زنه بۆ توركیا، وه‌لاتێن رۆژئاڤا ناخوازن ئێكگرتنا سووریێ تێكبده‌ن، ژبه‌ركو نها ئه‌م هه‌می ژناڤبرنا دكتاتۆریێ و هێزێن ئیسلامی یێن توندره‌و ل سووریێ دخوازین.
ره‌شنڤیسێ ده‌ستووره‌كێ نوو بۆ سووریێ هه‌یه ژ ئالیێ وه‌لاتێن ئه‌ورۆپی ڤه لێ هێشتا بۆ رایا گشتی نه‌هاتییه نیشاندان، رۆسیا ژی ره‌شنڤیسه‌ك ئاماده‌كرییه و هاتییه ئاشكرا كرن كو وه‌سا دانایه سووریا ببیته وه‌لاته‌كێ فێدرال وهه‌رێمه‌كا كوردی هه‌بیت.
لێ من دڤێت بێژم توركیا ل دژی یه كو ئه‌و ژی ماف و هه‌لبژارتنا وێ یا سیاسه‌تا ده‌رڤه یه، ل وان هه‌می وه‌لاتان پێدڤییه كوردان ئه‌و ماف هه‌بیت یێ كۆمارا قوبرسا یۆنانی ل به‌ره بده‌ته پێكهاته‌یا تورك ل قوبرسێ، ژبه‌ركو ل سه‌ر هنده‌ك ئاستان پێدڤییه ئه‌م هه‌ڤبه‌ریێ بكه‌ین دناڤبه‌را ئه‌وا توركیا و وه‌لاتێن دی ل دووڤ دگه‌رن و دخوازن هه‌ڤده‌م و ئه‌وا ئه‌و د ئاماده بده‌نه پێكهاته‌یێن مه‌زن د ناڤ وه‌لاتێن خوه دا.”
