یەختەک ب 104 پەنابەرڤە یا بەرزەیە
ئەڤرۆ نیوز:
یەختەک ل کەنارێن دەریایەکێ نێزیک وەلاتێ نەرویجێ کەفتیە بن ئاڤێ و ل گۆر پێزانینێن رۆژناما ئەڤرۆ ھژمارەک وەلاتیێن کورد تێدانە و چارەنڤیسێ وان دیار نینە، رێڤەبەرێ کۆچ و رەڤەندا کوردی ژی دبێژیت “غەواسێن نەرویجی سەد مەترا چووینە بن ئاڤێ و تەرمێ وان پەنابەران نەدیتینە”.
نەزھەت حسێن، رێڤەبەرێ کۆچ و رەڤەندا کوردی ل ھەرێما کوردستانێ بۆ رۆژناما ئەڤرۆ گۆت “بەری چەند رۆژان یەختەکا تژی پەنابەر ل دەریایەکێ رێیا ئورۆپا بەرزەبوویە کو 104 پەنابەر تێدا بوون بەر ب ئورۆپا چووینە و خەندقینە، ل گۆر پێزانینێن گەھشتینە حوکمەتا ھەرێما کوردستانێ پەنابەرێن ناڤا یەختا بەرزە کورد و ئیرانی و عەرەبن، بەلێ ھژمارا پەنابەرێن کورد یێن خەندقی نەھاتیە زانین، تنێ مە پێزانین ھەنە ھژمارەکا وەلاتیێن کورد تێدانە و خەندقینە”.
نەزھەتی گۆت ژی “ئەڤە چەندین رۆژە ئەم ل سەر خەتین بۆ ڤەدیتنا تەرمێ پەنابەرێن کورد و چەندین بزاڤێن جۆراوجۆر ھاتینە کرن، ھەتا مە ھەماھەنگی دگەل وەلاتێ نەرویج کری و حوکمەتا نەرویج تیمەکا غەواسێن خوە ھنارتینە جھێ روودانێ و پشتی لێگەڕیانەکا زۆر چارەنڤیسێ وان پەنابەران یێ بەرزەیە و نەرویج حوکمەتا ھەرێمێ ھایدار کریە، کو تیما غەواسێن وان پتری سەدمەترا چووینە بن ئاڤا دەریای، بەلێ مخابن چ تەرم نەھاتینە دیتن، لەوڕا ئەم بێ ئومێد بووینە ژ دیتنا تەرمێ وان پەنابەران”.
