10 رۆژه فرۆكێن توركیا گوندێ شاجا بوردومان دكه‌ن
ئه‌ڤرۆ نیوز، نه‌وزاد هلۆرى:
نێزیكێ 10 رۆژایه فروكێن شه‌ركه‌رێن توركى گوندێ شاجا یا سه‌ر ب ده‌ڤه‌را نێروه‌ورێكان بوردومان دكه‌ت و د ئه‌نجام دا هه‌موو پوش و پاوان و ئاقار و ره‌ز و بیستانێن گوندى هاتینه سوتن و گوندى سه‌ر و سیمایه‌كێ ره‌ش بخوڤه گرتیه.
دڤى واریدا” زیاد حسێن شاجى” كو ئێكه ژ وه‌لاتیێن گوندێ شاجا بو ئه‌ڤرۆ نیوز گۆت: (ئه‌ڤه نێزیكێ 10 روژایه گوندێ مه ل ده‌ڤه‌را نێروه‌ورێكان یا سه‌ر ب ناحیا شێلادزێ روژانه ژلایێ فروكێن شه‌رى یێن توركى دهێته بوردومانكرن و چوو كه‌س نوكه نه‌شێن قه‌ستا گوندى بكه‌ن)
زێده‌تر گۆت: (ژئه‌نجامێ بوردومانكرنا چه‌ند روژێن بورى بو گوندێ شاجا ، هه‌موو پوش و پاوان و ژینگه و ئاقار و داروبار و ره‌ز و بیستانێن گوندێ مه هاتینه سوتن ، و هه‌ر كه‌سێ سه‌ره‌دانا گوندى بكه‌ت ژبلى ده‌شت و دول و چیایێن ره‌ش كو هه‌موو خولى و ره‌ژى یه چوو تشته‌كێ دن ناهێته دیتن)
ناڤبرى د درێژاهیا ئاخفتنێن خودا دیاركر ژى كو ژبلى ره‌ز و بیستان و ژینگه‌هێ دهه‌مان ده‌م دا هژماره‌كا زور یا مێشه‌ڤانان مێشێن خوه بربوونه ده‌ڤه‌رێ به‌لێ ژ ترسا سوتنێ هه‌مو مێشه‌ڤان جاره‌كا دى بو شێلادزێ و سیریێ هاتینه زڤراندن و گۆت ژى: (دخوازین كو حوكمه‌تا ناڤه‌ندى یا عیراقێ و حوكمه‌تا هه‌رێما كوردستان و لایه‌نێن شوله‌ژێ ب جدى كار بكه‌ن بو زڤراندنا ئارامیه‌كا باشتر بو گوندێ مه و هه‌موو گوندێن ده‌ڤه‌را نێروه‌ورێكان ، چونكى ژێده‌ره‌یێ سه‌ره‌كیێ ژیان و گوزه‌رانیا خه‌لكێ ده‌ڤه‌رێ لسه‌ر وان گوندایه ، بو نموونه ئه‌ڤ ساله و سالێن بورى ژى هژماره‌كا خه‌لكێ ده‌ڤه‌رێ بیستانێن خوه كربوونه ده‌رامه‌ت و هژماره‌كا زور یا ره‌ز و بیستانان هاتینه درۆستكرن، به‌لێ ژبه‌ر بوردومانێ هه‌مووان ده‌ست ژ بیستان و ره‌زێن خوه به‌رداینه و ماینه بێ كار)
