10 ھزار خێزانێن شەھید و ئەنفالکریان دێ پارچێن ئەردی وەرگرن
ئەڤرۆ نيوز:
رێڤەبەرێ گشتیێ شەھید و ئەنفالکریان ل وەزارەتا شەھید و ئەنفالکریان راگەھاند، جڤاتا وەزیران بڕیارەکا نوو بۆ دانا پارچێن ئەردی ل سەر خێزانێن شەھید و ئەنفالکریان دایە و ل گۆرەی ڤێ بریارێ پتر ژ 10 ھزار خێزانان دێ مفاداربن
بەرەڤان حەمدی، رێڤەبەرێ گشتیێ شەھید و ئەنفالکریان ل وەزارەتا شەھید و ئەنفالکریان بۆ رۆژناما ئەڤرۆ دیار کر کو بەری نوکە جڤاتا وەزیران، 10 ھزار و 49 خێزانێن شەھید و ئەنفالکریان فەرمانا وەرگرتنا پارچە ئەردان ھەبوون و 11 ھزار و 140 کەسان بریارا نوو بۆ وان دەرچوویە بۆ وەرگرتنا پارچە ئەردان و ل گۆرەی بریارا نوو یا جڤاتا وەزیران پێدڤیە ب زووترین دەم ئەڤ خێزانە ھەموو مفادارببن و باژێرڤانیێن وان ژی ئەردان بۆ وان دابین بکەن.
ناڤھاتی ئاماژە دا وێ چەندێ کو ژ ڤی سەرجەمی دێ پێنچ ھزار و 69 پارچە ئەرد بۆ خێزانێن کەسوکارێن ئەنفالان بن و سێ ھزار و 398 پارچە بۆ شەھیدێن سەنگەرێ جینۆسایدێ و دو ھزار و 674 پارچە ئەرد ژی بۆ زیندانیێن سیاسی بن و گۆت: “ل گۆرەی ھەر دو قانوونێن ژمارە نەە و 11 یێن ماف و ئیمتیازاتێن شەھید و ئەنفالکریان و زیندانیێن سیاسی، دێ پارچە ئەرد ب وان خێزانان ھێنە دان یێن ھەتا نوکە مفادارنەبووین، ئەڤە د دەمەکی دایە ھەتا نوکە نێزیکی 70 ھزار کەسوکارێن شەھید و ئەنفالکریان ل وەزارەتا مە ھاتینە تۆمارکرن و پتریا وان مفاداربووینە”.