بەحسێ رێککەڤتنەکا نوو د ناڤبەرا تورکیا و ئۆجەلانی دا دھێتە کرن
ئەڤرۆ:
ئه‌ڤرۆ د هژمارا 1539 يا رۆژناما ئه‌ڤرۆ سه‌رجان مه‌حمود بابه‌ته‌ك به‌لاڤكريه و تێدا دياركريه كو شاندێ پارتیا دیموکراتی یا گەلان دوھی د داخۆیانیەکێ فەرمی دا دیار کر کو وان ھەڤدیتنەک گرنگ ل گەل سەرۆکێ PKK ل زیندانا ئیمرالیێ پێک ئینانە و ئۆجەلانی دیار کریە کو ل گەل شاندێ دەولەتێ ل سەر گەلەک خالان تێگەھشتنەک باش دروست بوویە و ھەکە چو ئاریشە دروست نەبن دێ چار ھەتا پێنج مەھان گوھۆرینێن گەلەک مەزن ل تورکیا دروست بن و دێ پرسا کوردی ژی ھێتە چارەکرن.
پشتی شاندێ پارتیا دیموکراتی یا گەلان رۆژا 29\11\2014 سەرەدانا ئیمرالیێ کری و ل گەل عەبدوللا ئۆجەلان سەرۆکێ زیندان کری یێ PKK ھەڤدیتنەک پێک ئینان، د داخۆیانیەکا فەرمی دا راگەھاندن کو ھەڤدیتنا وان گەلەک باش دەرباز بوویە و گەلەک بابەتێن گرنگ سەبارەت ب پرسا کوردی ل تورکیا و گوھۆرینێن ل دەڤەرێ ھاتنە ئاخڤتن.
سری سورەیا ئۆندەر ئەندامێ شاندێ بۆ رۆژناما ئەڤرۆ دیار کر کو مە بۆ ماوەیێ چار دەمژمێران ل گەل ئۆجەلانی ھەڤدیتن کر و ئەم ل سەر ھەموو بابەتان ئاخڤتی و گۆت: “ئۆجەلانی بۆ مە دیار کر کو پشتی ئالۆزیێن ڤێ دووماھیێ ل تورکیا چەندین جاران شاندێ دەولەتێ سەرەدانا من کرینە و ئەم سەبارەت ب گەلەک بابەتان ئاخڤتینە و نھا تێگەھشتنەکا باش د ناڤبەرا مە دا دروست بوویە و ھەکە چو ئالۆزی دروست نەبن دێ چار ھەتا پێنج مەھان گوھۆرینێن گەلەک باش د بیاڤێ چارەکرنا پرسا کوردی ل تورکیا روو بدەن و ژ بەر ڤێ یەکێ ژی دڤێت گەرەنتیا قانوونی بۆ بجە ئینانا پرۆسا چارەکرنا پرسا کوردی ھەبیت”.
ئۆندەر ھەروەسا دیار کر کو ئەم گەشبینین حوکمەتا تورکیا ژی د بیاڤێ پراکتیکی دا ھندەک تشتێن نوو بکەت، چونکو ھەتا نھا گەلەک تشت ھاتینە گۆتن و د بیاڤێ پراکتیکی دا چو نەھاتیە کرن و خەلکێ کورد ئەڤرۆکە چاڤەرێ ھندێ دکەت دەولەتا تورکیا بۆ چارەکرنا پرسا کوردی ھندەک تشتان بکەت دا دلێ خەلکێ خوەش بیت و مە د ھەڤدیتنا خوە یا ل گەل ئۆجەلانی بەحسێ ڤێ یەکێ ژی کر و گۆت: “ئەم باوەرین پشتی روودانێن ڤێ دووماھیێ و ب تایبەتی ژی رەوشا کۆبانێ و گوھۆرینێن کو دروست بووینە دێ ئەو یەک کاریگەریا خوە ل سەر ھەلویستێ تورکیا بکەت و بەرپرسێن تورکیا ژی باش دزانن کو ھەکە د چارەکرنا پرسا کوردی دا گیرو کەڤن دێ گەلەک دەلیڤەیێن زێرین ژ دەستێ وان بچیت و ئۆجەلانی ژی دیار کر کو د ھەڤدیتنێن خوە یێن ل گەل شاندێ دەولەتێ وی ژی ئەو یەک بۆ وان دیار کریە، ڤێجا مە ژی دڤێت ئێدی ھندەک پێنگاڤێن پراکتیکی بھێنە ئاڤێتن دا باوەریا کوردان ب حوکمەتا تورکیا بھێت، چونکو براستی ژی نھا باوەری نینە”.
ل ئالییێ دی حسێن یەمان رۆژنامەڤانێ ناڤدارێ تورکیا و ئێک ژ کەسێن نێزیکی ئەحمەد داوود ئوگلۆ سەرۆک وەزیرێن تورکیا ژی د بەرنامەکا کەنالێ خەبەر تورک ئاخڤی و دیار کر کو د راستی دا رێککەڤتنەک د ناڤبەرا ئۆجەلانی و دەولەتا تورکیا دا ھاتیە کرن و ل گۆر وێ رێککەڤتنێ دەولەتا تورکیا دێ لێبۆرینەکا گشتی بۆ ئەندامێ PKK دەرخینیت و ھندەک سەرکردێن وێ پارتیێ کو نەشێن ڤەگەرنە تورکیا دێ بچنە ئورۆپا یان ژی وەلاتەکێ دی و کادیرێن کو ڤەدگەرنە تورکیا دێ ل ناڤ رێزێن پارتیا ھەرێمێن دیموکراتیک خەباتێ بکەن و دەولەت ژی ئاستەنگیان بۆ وان دروست نەکەت و گۆت: “ل ھەمبەر ڤێ یەکێ ژی دێ ئۆجەلان داخواز ژ PKK کەت کو ل ڤێ بھارێ ھەموو ھێزێن خوە یێن چەکدارێ ژ ئاخا تورکیا دەرخینن و دێ چەک ب تەمامی ھێنە بێدەنگ کرن و حوکمەت دێ گوھۆرینێن مەزن د دەستوری دا کەت و دێ دەستھەلاتا ھەرێمێن کوردی ل تورکیا وەک یێن ئورۆپا زێدە بیت و ب ڤی رەنگی ژی دێ کار بۆ ڤێ یەکێ ھێتە کرن کو PKK ب تەمامی دەستان ژ چەکی بەردەت”.