11 جهێن گوزاری ل سیلاڤێ هاتنە سزادان
ئەڤرۆ نیوز، مەحمود نهێلی
پشتی كو هنده‌ك جهێن گوزاری ل هاڤینگەها سیلاڤێ پێگيرى ب رێنمایێن لژنەیا هاتیە پێكئینان بۆ رێكخستنا كەرتێ گەشتوگوزاری ل ئامێدیێ نەكرى، بریار هاتە دان 11 ژ وان جهان بهێنە سزدان.
حەمید ئەحمەد، بەرپرسێ نڤیسینگەها گەشتوگوزاری ل سیلاڤێ بۆ ئەڤرۆ نیوز دیاركر، بەری حەفتیەكی لژنەك هاتە پێكئينان ژبۆ رێكخستنا بازاری و لادانا زێدەگاڤیان و دانانا بهایی ل سەر كەرەستەیان و گۆت: ( چەندین جهێن گوزاری و خارنگەه و دكان هاتبوونە ئاگەهداركرن ل سەر وان سەرپێچیێن ژلایێ وان ڤە هاتینە ئەنجامدان و رێنمایێن تایبەت ب وان هاتبوونە دان ژبۆ خزمەتكرنا گەشتیاران و كەرتێ گوزاری ل دەڤەرێ).
ناڤهاتی ئاشكرا كر، پشتی دو بارە ڤێ لژنەیێ سەرا ڤان جهێن گوزاری دای كو پولیس و ئاسایش ژی دگەل دا بوون دیار بوویە گەلەك ژ وان ل دووڤ وان رێنمایان نەچوون، ژبەر وێ یەكی ژی بریارا سزادانا 11 جهان هاتە دەكرن كهێنه سزادان”.
بەرپرسێ نڤیسینگەها گەشتوگوزاری ل سیلاڤێ ديار كر، كو نوكە و وێڤە ئەو دێ بەردەوام ل سەر هەموو جهێن گوزاری یێن سەر ب نڤیسینگەها وان ڤە گەرن، تا گەلیێ شێرانە و گەلیێ بالندا ژی ب خوەڤه دگریت و هەر جهەكی ل دووڤ رێنمایان نەچیت دێ هێنە سزادان.
گۆت ژی ، مەرەم ژ كارێ ڤێ لژنێ بتنێ خزمەتكرنا گەشتیاران و پێشڤەبرنا كەرتێ گەشتیاریە ل دەڤەرێ و راكێشانا هژمارەكا پتر یا گەشتیاران بۆ سنورێ قەزا ئامێدیێ.
