12 وه‌لات ژ يونسكۆ دخوازن نه‌ورۆز ببيته جه‌ژنه‌كا كه‌لتۆرى يا جيهانى
ئه‌ڤرۆ نيوز:
وه‌لاتێ قيرغزستان بانگه‌وازه‌ك دايه رێكخراوا يونسكۆ يا نێڤده‌وله‌تى دا كو جه‌ژنا نه‌ورۆزێ ئه‌وا ل چه‌ندين وه‌لاتێن جيهانا ئيسلامى دهێته كرن، بچيته د ناڤ بيره‌وه‌ريێن سه‌رده‌م يێن شارستانى يێن نه‌يێن ماددى بۆ مرۆڤاتيێ.
ئاخفتنكه‌رێ ب ناڤێ وه‌زاره‌تا ژ ده‌رڤه يا قيرغزستانێ راگه‌هاند كو بالوێزێ قيرغزستانێ ل ئيرانێ ئاسان بێك عوسمان عه‌لى ب ناڤێ قيرغزستانێ ئه‌ڤ بانگه‌وازه ئيمزا كريه.
ئاشكه‌را ژى كر كو رێوره‌سمێن ئيمزاكرنا ڤێ بانگه‌وازێ ئه‌وان ل نڤيسينگه‌ها رێكخستنا ئيرانى يا كه‌لتۆرى و شارستانى و پێشڤه‌چوونا گه‌لى و گه‌شتوگۆزارێ ب رێڤه چوون.
ب گۆره‌يى گۆتنێن فه‌رمانبه‌رێن نڤيسينگه‌هێ ئه‌فغانسان و ئازربيجان و هند و كوردێن عيراقێ و كازاخستان و تاجاكسان و پاكستان و توركيا و توركمانسان و ئوزپاكستان ئه‌وێن ئه‌ڤێ جه‌ژنێ دگێرن، به‌رى نوكه ئه‌ڤ بانگه‌وازه يا ئيمزا كرى.
ئاخفتنكه‌رێ ب ناڤێ حوكمه‌تا قيرغيزستان گۆت: “راگه‌هاندنا ڤێ بوونێ وه‌كو جه‌ژنه‌كا نێڤده‌وله‌تى يا كلتۆرێ شارستانيا جيهانى دێ هاريكار بيت هه‌ڤالينى و ئێكرێزيا مێژوويى د ناڤبه‌را ڤان وه‌لاتان دا دروست بكه‌ت”.
هه‌ژى ئاماژه‌پێكرنێ يه كو جه‌ژنا نه‌ورۆزێ ئه‌وا دكه‌ڤيته 21\3 ل 12 وه‌لاتێن ئاسيا دهێته گێران و ب نيشانه‌كێ بۆ هاتنا بهارێ و گوهۆڕينێن كه‌شوهه‌وايى و ده‌سپێكا ژيانا مرۆڤاتيێ و رابوون دژى زۆرداريێ دهێته هژماتن.
