ل سلێمانیێ گەف ل نونەرێن پارتی دھێنەکرن
ئەڤرۆ نیۆز، قائید میرۆ:
بەرپرسەکێ پارتی دیموکراتی کوردستان ھۆشداریێ ددەت ل سلێمانیێ گەف ل نونەرێن پارتی دھێنەکرن و ھێزێن چەکدار دھێنە بکارئینان بۆ سەختەکاریان.
رزگار ئەژی گۆران، بەرپرسێ دەزگەھێ ھەلبژارتنێن پارتی ل سلێمانی و ھەلەبجە بۆ ئەڤرۆ نیۆز دیارکر” ژلایێ ئێکەتیێ ڤە گەف ل بریکارێن لایەنێن سیاسی و کارمەندێن کۆمسیۆنێ دھێنەکرن و سەختەکاریێن مەزن ھاتینەکرن ل دەنگدانا ئەڤرۆ دا، ژبەرکو بڕیارێن کۆمسیۆنێ وەکی خوە ناھێنە بجە ئینان و دەنگدەرێن لایەنەکێ سیاسی بێ بەلگە یێ دەنگی ددەن.
ئەڤی بەرپرسێ پارتی ئاشکراکر” گەف ل نونەرێن پارتی و لایەنێن سیاسی ھاتینەکرن و مە وەک پارتی دیموکراتی کوردستان چەندین سکالا تۆمارکرینە و دێ ب ڕێیا قانوونێ داخوازا مافێ وەلاتیان بکەین.
رزگار ئەژی گۆران ئاماژەکر” ل چەند بنگەھێن دەنگدانێ ھێزێن چەکدار ھاتینە کۆمکرن و تەقە ل بنگەھەکێ دەنگدانێ ھاتیە کرن، لەوڕا ھەگەر پڕۆسە بڤی شێوەی بڕێڤەبچیت دێ دەنگدان کەڤیتە بن پرسیارێ.
