155 گه‌نج ل زاخۆ بوونه خودان كار و پێشه
ئه‌ڤرۆ نيوز ، نه‌وزاد هلۆرى:
ب مه‌ره‌ما دابینكرنا ده‌لیڤێن كارى و نه‌هێلانا بێكاریێ، رێڤه‌به‌ریا كار و راهێنانێن پێشه‌يى ب هه‌ڤكارى ل گه‌ل رێكخراوا ACF یا فه‌ره‌نسى 155 ده‌لیڤێن كارى پێشكێشى گه‌نجێن سنورێ قه‌زا زاخۆ كرن.
جوتیار خدر، رێڤه‌به‌رێ كار و راهێنانێن پێشه‌يى ل زاخۆ بۆ ئه‌ڤرۆ نيوز گۆت: (رێڤه‌به‌ریا كار و راهێنانێن پێشه‌يى ب هه‌ڤكارى ل گه‌ل رێكخراوا ACF یا فه‌ره‌نسى 155 ده‌لیڤێن كارى پێشكێشى گه‌نجێن سنورێ قه‌زا زاخۆ كرينه و بووينه خودان كار و پێشه‌یێن تایبه‌ت).
زێده‌تر گۆت: (ئه‌ڤ جۆره كار و پێشه‌یه ل سه‌ر هه‌شت جوۆران هاتبوونه دبه‌لاڤكرن و د هه‌موو پشكدار و خودانكارێن نوو د خۆل و راهێنانێن پێشه‌يى دا بۆ ده‌مێ 45 رۆژان پشكدار بووینه و هاتینه راهێنانكرن ل سه‌ر ده‌ستێ كه‌سانێن بسپور و شاره‌زا).
ناڤبرى د درێژیا ئاخڤتنێن خوه‌دا دیاركر ژى كو ئه‌ڤ هه‌موو ده‌لیڤێن كارى ل سه‌ر كچ و كوران هاتینه دبه‌لاڤكرن و زێده‌تر گۆت: (پشكه‌ك ژ وان گه‌نجان ل كۆمپانى و كارگه‌ه و ده‌زگه‌هێن حوكمه‌تێ و كه‌رتێ تایبه‌ت بووینه خودانكار و هنده‌ك ژى ژلایێ مه و رێكخراوا ناڤبرى پاره ب وان هاتیه‌دان وه‌كو قه‌رێن بچووك كو ب خوه پێ كار بكه‌ن و هنده‌ك ژى ب رێیا ئه‌و بسپورى و شاره‌زایا وان هه‌یى پشته‌ڤانى دێ بۆ هێته‌كرن داكو بشێن مفاى ژ شیان و به‌هره‌یێن خوه وه‌ربگرن و ببنه خودان كار و پێشه).
