200 پۆستێن كوردان هێشتا ل به‌غدا نه‌هاتیه پڕكرن
ئه‌ڤرۆ:
جێگرێ سه‌رۆكێ لژنه‌یا ئاسایش و به‌رگریێ ل جڤاتا نوونه‌رێن ئیراقێ ڕاگه‌هاند، به‌هرا كوردان ژ پۆستێن دناڤ حوكمه‌تا ئیراقێ دا 380 پۆستن ژوان ژی 200 پۆست هه‌تا نوكه نه‌هاتینه پڕكرن كو ئێك ژ وان پۆستا سۆپا سالارێ ئیراقێ یه كو دبیته به‌هرا پارتی دیموكراتی كوردستان.
سه‌گڤان یوسف، ئه‌ندامێ جڤاتا نوونه‌رێن ئیراقێ، ژ فراكسیۆنا پارتی دیموكراتی كوردستان كو دهه‌مان ده‌م دا جێگرێ سه‌رۆكێ لژنه‌یا ئاسایش و به‌رگریێ یه ل جڤاتا نوونه‌ران گوت” هه‌ژماره‌كا مه‌زن یا پۆستێن حوكمه‌تا ئیراقێ ل به‌ر كوردان دكه‌ڤیت، ب گۆره‌ی وێ چه‌ندێ ژی كو كورد پشكه‌كن ژ حوكمه‌تا ئیراقێ، هه‌ژمارا وان پۆستێن بۆ كوردان دكه‌ڤن، یان باشتر بێژین به‌هرا كوردانه، دبیته 380 پۆست ژ پۆستێن مه‌زن هه‌تاكو پۆستێن خوارێ، ژ وێ هه‌ژمارێ ژی گه‌له‌ك به‌رپرسێن كورد ده‌ست بكاربوونه و پۆستێن كوردان گه‌له‌ك ژێ یێن هاتینه پڕكرن، به‌لێ هه‌تا نوكه زێده‌تر ژ 200 پۆستێن كوردان نه‌هاتینه پڕكرن”.
جێگرێ سه‌رۆكێ لژنه‌یا ئاسایش و به‌رگریێ ل جڤاتا نوونه‌رێن ئیراقێ ئه‌وژی گوت” ئیچك ژ وان پۆستێن گرنگ د حوكمه‌تا ئیراقێ و به‌هرا كوردایه و دناڤ كوردان ژی دا به‌هرا پارتی دیموكراتی كوردستانه، پۆستێ سوپاسالارێ ئیراقێ یه كو چه‌ندین سالان ئه‌و پۆسته یێ پارتی بوو و بابه‌كر زێباری بڕێڤه‌دبر، به‌لێ نوكه ئه‌و پۆسته ل ده‌ف پارتی نینه و مه داخوازا پڕكرنا پۆستێ سوپاسالارێ ئیراقێ و هه‌موو ئه‌و پۆستێن دی یێن ماین كریه”.
سه‌گڤان یوسف ڕۆهنكر ژی” هه‌ر پۆسته‌كێ د ناڤ حوكمه‌تا ئیراقێ دا به‌هرا كوردان بیت، پێدڤیه ژ ئالیێ كوردان ڤه بهێته پڕكرن و نوكه كورد د بزاڤێ دانه ئه‌و 200 پۆستێن ماین ئه‌وژی بهێنه پڕكرن، چونكه ئه‌و پۆسته مافێ كوردانه و پێدڤی ب كوردایه بۆ بڕێڤه‌برنا وان و ل خۆلێن دی ژی ئه‌و كێشه‌یه هه‌بوو كو گه‌له‌ك پۆست پشكا كوردان بوون و نه‌هاتبوونه پڕكرن”.
