22 پله‌یێن دامه‌زراندنێ ل دهۆكێ هاتنه راگه‌هاندن
ئه‌ڤرۆ نیوز ، نه‌وزاد هلۆرى:
حكومه‌تا هه‌رێما كوردستانێ هژماره‌كا پله‌یێن دامه‌زراندنێ لسه‌ر میلاكێ وه‌زاره‌تا په‌روه‌ردێ راگه‌هاندن كو دێ ماموستا ب شێوه‌یێ گرێبه‌ست هێنه دامه‌زراندن ، و 22 ژ وان پله‌یان دێ بو پارێزگه‌ها دهۆكێ بن.
ل گوره‌ى نڤیساره‌كا حكومه‌تا هه‌رێما كوردستانێ كو دانه‌یه‌ك ده‌ست ئه‌ڤرۆ نیوز كه‌فتیه و ئیمزا وه‌زیرێ په‌روه‌ردێ یا حكومه‌تا هه‌رێما كوردستانێ ل سه‌ره ، وه‌زاره‌تا په‌روه‌ردێ ب پالپشتیا نڤیساره‌كا سه‌روكاتیا جڤاتا وه‌زیران یا هژمار 3913 كو ل رێكه‌فتى 10/9/2017 ده‌رچویه و نڤیسارا وه‌زاره‌تا په‌روه‌ردێ ژى ل رێكه‌فتى 22/10/2017 ده‌رچویه تێدا دیاردبیت كو هژماره‌كا پله‌یێن دامه‌زراندنا ماموستایان ب شێوه‌یێ گرێبه‌ست ل هه‌رێما كوردستانێ هاتنه راگه‌هاندن.
هه‌ر ل گوره‌ى ئه‌وێ نڤیسارێ 27 پله ل رێڤه‌به‌ریا گشتى یا په‌روه‌ردا پارێزگه‌ها هه‌ولێر ، 20 پله ل رێڤه‌به‌ریا گشتى یا په‌روه‌ردا پارێزگه‌ها سلێمانیێ ، 22 پله ل رێڤه‌به‌ریا گشتى یا په‌روه‌ردا پارێزگه‌ها دهۆك ، 4 پله ل رێڤه‌به‌ریا گشتى یا په‌روه‌ردا كارگێریا گه‌رمیان ، 5 پله ل رێڤه‌به‌ریا گشتى یا په‌روه‌ردا پارێزگه‌ها هه‌له‌بچه و 6 پله ل رێڤه‌به‌ریا خواندنا كوردى ل پارێزگه‌ها كه‌ركوك.
دهێته زانین كو ئه‌و پله دێ تنێ بو ده‌رچویێن كولیژێن په‌روه‌ده و بنیات بن و دێ لسه‌ر هه‌ردوو قوناغێن ئاماده‌یى و بنه‌ره‌تى هێنه دابه‌شكرن ، ئه‌ڤ دامه‌زراندنه ژى بتنێ بو ده‌رڤه‌یێ باژێران یه و پێدڤى یه ئه‌و كه‌سانێن كو دخوازن ب هێنه دامه‌زاندن ب شێوه‌یێ گرێبه‌ست فورمان پربكه‌ن به‌را 30/10/2017.