23% ژ كاره‌با هه‌رێما كوردستانێ بۆ پارێزگه‌ها دهۆكێ دهێته مه‌زاختن
دهۆك، نه‌وزاد هلۆری:
سالانه ل هه‌رێما كوردستانێ ژبه‌رخواسته‌كا زۆر بۆ كاره‌بێ، كاره‌با نیشتمانی كێم دبیت، له‌وا وه‌زاره‌تا كاره‌بێ د پلانێ دایه كو ره‌وشا كاره‌بێ باشتر بكه‌ت و 400 مێگاوات زێده‌كرن و هه‌ڤده‌م ل سه‌ر دانانا پیڤه‌رێ زیره‌ك ژی به‌رده‌وامه.
سه‌فه‌ر ته‌یب، رێڤه‌به‌رێ به‌لاڤكرنا كاره‌بێ ل دهۆكێ بۆ رۆژناما ئه‌ڤرۆ گۆت: (سالانه ل وه‌رزێ زڤستانێ ئاریشه ل كاره‌با نیشتمانی دروست دبیت ژبه‌ركو خواسته‌كا زۆر ل سه‌ر كاره‌با نیشتمانی دروست دبیت و مه‌زاختن زۆر دبیت، ئانكو كاره‌با نیشتمانی گرێدای پله‌یێن گه‌رمایێ یه و هه‌ر گورانكاریه‌ك دێ گورانكاریێ ل سه‌ر كاره‌بێ ژی كه‌ت، زێده‌باری كو 100 مێگاواتنێن كاره‌بێ د ماوه‌یێ هه‌یڤه‌كێ دا زێده‌بوینه به‌لێ ده‌مژمێرێن كاره‌بێ كێمتر بوینه كو ئه‌ڤه ژی ژ ئه‌گه‌رێ گورانكاریایه و خه‌لك بۆ گه‌رمكرنا مالێن خوه رێژه‌كا زورتر یا كاره‌بێ بكاردئینن وه‌كو پێدڤیه‌كا سه‌ره‌كی یا وه‌لاتیان د وه‌رزێ زڤستانێ دا).
زێده‌تر گۆت: (پێدڤی یه وه‌لای ل ده‌مێ دروستبوونا گورانكاریێن كه‌شوهه‌وای هه‌ڤكاربن ب تایبه‌تی د ڤه‌مراندنا گلوپ و ئامیرێن كاره‌بایی یێن نه پێدڤی داكو رێژه‌ییه‌كا كاره‌بێ جاره‌كا دی ڤه‌گه‌رێت بۆ تورا نیشتمانی).
ل بارا پیڤه‌رێ زیره‌ك ناڤبری گۆت: (هه‌تا نوكه پتری 60% پیڤه‌رێ زیره‌ك كارێن وێ دوماهی هاتینه، ل وێ باوه‌ریێ نه كو دێ كارتێكرنه‌كا زۆر باش ل سه‌ر ره‌وشا كاره‌بێ كه‌ت، ئانكو نوكه 60% زێده‌گاڤی ل سه‌ر كاره‌با نیشتمانی نه‌مایه كوپ ێشتر جوراجور ڤه زێده‌گاڤی ل سه‌ر دهاته‌كرن، بۆ نموونه ل هنده‌ك مالا ل پشت مێزانیێ گێزه‌ر و سپلێت هاتیه گرێدان، رۆژانه پتری 100 كه‌س سه‌ره‌دانا رێڤه‌به‌ریێ دكه نبۆ چاره‌سه‌ركرنا ئاریشه‌یێن كاره‌بی، هه‌رده‌مێ پیڤه‌رێ زیره‌ك هاته‌خوارێ د حاله‌تێ نورمال دا بخوه بلند دبیت ڤه، به‌لێ هنده‌ك ژ وان ئاریشه تێدا هه‌نه و هنده‌ك مالا سار و گه‌رم پێڤه هاتینه گرێدان و هه‌رده‌مێ ئاریشه‌كا بڤی ره‌نگی هه‌بوو ب رێیا تیمێن كاره‌بی چاره‌سه‌ریا وان دهێته‌كرن كو چوار تیمن و رۆژانه خه‌لك په‌یوه‌ندیێ دكه‌ن و چاره‌سه‌ریا كاره‌با وان دكه‌ن).
ب گوره‌ی نووچه‌یه‌كێ كو ژلایێ وه‌زاره‌تا كاره‌بێ یا حوكمه‌تا هه‌رێما كوردستانێ هاتیه به‌لاڤكرن، 400 مێگاواتێن دن یێن كاره‌بێ ل سه‌ر تورا نیشتمانی زێده‌بوینه و ئه‌ڤ یه‌ك دێ بیته ئه‌گه‌ر كو كاره‌با نیشتمانی باشتر بیت.
دڤی بیاڤی دا رێڤه‌به‌رێ به‌لاڤكرنا كاره‌با دهۆكێ دیاركر ژی كو زێده‌بوونا 400 مێگاواتێن كاره‌بێ ل سه‌ر تورا نیشتمانی دێ كارتێكرنه‌كا زۆر ل سه‌ر باشتربوونا كاره‌با نیشتمانی و ده‌مژمێرێن دانا كاره‌بێ هه‌بیت و گۆت ژی: (د نوكه دا ب رێژا 23% ژ كوما گشتی یا كاره‌با نیشتمانی یا هه‌رێما كوردستانێ بۆ پارێزگه‌ها دهۆكێ دهێته به‌ردان و مه‌زاختن، ب ئومێدین كو كارێن باشتر بۆ چاره‌سه‌ركرنا پرسا كاره‌با نیشتمانی بهێته‌كرن داكو وه‌لاتی بشێن مفای ژ كاره‌با نیشتمانی وه‌ربگرن وه‌كو ئێك ژ پێدڤیێن سه‌ره‌كی یێن ژیانا رۆژانه).
