256 بنگەھێن دەنگدانێ بۆ رێفراندومێ ل دھۆکێ دێ ھێنە ڤەکرن
ئه‌ڤرۆ نيوز:
رێڤەبەرێ فەرمانگەھا گشتی یا کۆمسیۆنا بلندا سەربخوەیا ھەلبژارتن و راپرسیێ ل پارێزگەھا دھۆکێ دیار کر کو ل سەرانسەری پارێزگەھا دھۆکێ 256 بنگەە کو دبنە ھزار و 667 وێستگەھێن دەنگدانێ بۆ پرۆسا دەنگدانا رێفڕاندومێ ل دھۆکێ دێ ھێنە ڤەکرن و دبێژیت: ھەموو بەرھەڤی بۆ ئەنجامدانا ریفڕاندۆمێ ھاتینە کرن.
عەلی سالح بەندی، رێڤەبەرێ فەرمانگەھا گشتی یا کۆمسیۆنا بلندا سەربخوەیا ھەلبژارتن و راپرسیێ ل پارێزگەھا دھۆکێ بۆ ئەڤرۆ ئاشکرا کر کو وان ل پارێزگەھا دھۆکێ دەست ب وەرگرتنا فەرمانبەران ب شێوێ گرێبەست بۆ ب رێڤەبرنا پرۆسا ریفڕاندۆما سەربخوەیا کوردستانێ کریە و گۆت: “مە پلانا دانای بۆ ھەر بنگەھەکێ دەنگدانێ شەش فەرمانبەر ب شێوێ گرێبەست بھێنە دامەزراندن، دیسا بۆ ھەر وێستگەھەکا دەنگدانێ ژی دێ پێنچ فەرمانبەر ب شێوێ گرێبەست ھێنە دامەزراندن، نوکە دەرگەھێ پێشکێشکرنێ یێ ھاتیە ڤەکرن و ھەر دەرچوویەکێ بڤێت ببیتە فەرمانبەر بۆ رۆژا ئەنجامدانا ریفڕاندۆمێ ل رۆژا 25/9 ل بەر بنگەھێن دەنگدانێ دشێت پێشکیش بکەت”.
رێڤەبەرێ فەرمانگەھا گشتی یا کۆمسیۆنا بلندا سەربخوەیا ھەلبژارتن و راپرسیێ ل پارێزگەھا دھۆکێ خویا ژی کر، پارێزەر و مافپەروەر ژی بۆ بنگەھێن دەنگدانێ دێ ھێنە وەرگرتن رەنگە ژی ئەو قوتابخانێن دبنە بنگەھێن دەنگدانێ پتر مامۆستایێن وان قوتابخانان بھێنە وەرگرتن.