33 مین سالرۆژا كومكوژیا بارزانیان ل بارزان هاته ساخكرن
بارزان ، نه‌وزاد زاده هلورى:
ب به‌رهه‌بڤوونا هژماره‌كا به‌رپرسێن حكومى و حزبى و نوونه‌رێن وه‌لاتێن بیانى و كه‌س و كارێن جینوسایدكرنا و جه‌ماوه‌ره‌كێ زۆر ده‌ربازبوونا 33 سالان لسه‌ر جینوسایدكرن و كومكوژیا 8 هزار بارزان ل بارزان هاته ساخكرن.
رێبوار ره‌مه‌زان رێڤه‌به‌رێ كاروبارێن شه‌هید و ئه‌نفالكریێن بارزان بۆ ئه‌ڤرۆ نیوز گۆت : ( وه‌كو وه‌فادارى و رێزگرتن بو خوونا 8000 بارزانیان ئه‌ڤرۆ ئێكشه‌مبى 31/7/2016 چه‌ند چالاكى مه وه‌كو رێڤه‌به‌ریا شه‌هید و ئه‌نفالكرێن بارزان بهه‌مهه‌نگى یا چه‌ند سازى و دام و ده‌زگه‌هێن كارگێریێن ده‌ڤه‌را بارزان 33 سالیا كومكوژیا بارزانیان ل بارزان ب چه‌ند چالاكى و رێورسم و دانانا تاجه گولینه‌یان ساخكر )
زێده‌تر گۆت : ( ژبه‌ر قه‌یرانا دارایى وه‌زاره‌تا شه‌هید و ئه‌نفالكریان نه‌كارى وه‌كو هه‌ر سال چالاكیێن مه‌زن رێكبێخیت ، به‌لێ وه‌كو نه‌ریته‌كێ سالانه ئه‌ڤ یه‌ك هه‌ر هاته ئه‌نجامدان ژ به‌ركو ئه‌نجامنه‌دانا ئه‌ڤان جوره چالاكیان دبیته سه‌ده‌م كو ماندبوون و قوربانیدانا گه‌لێ كورد بهێته ژبیركرن ب تایه‌بتى بو جیلێ نوك و چوو ژ داب و نه‌ریت و قه‌بات و قوربانیدانا مله‌تێ خوه نوزانن )
ژ هه‌ژیه بێژین كو لرۆژا 31/7/1983 ژلایێ رژێما به‌عس 8000 بارزانى ب تومه‌تا كوردبوونێ ب ساخى هاتن بن ئاخكرن ، و دوڤدا ژلایێ دادگه‌ها نیڤده‌وله‌تى ئه‌ڤ كومكوژیه ب جینوساید هاته ناساندن و به‌رى 8 سالان هه‌ستیكێن نێزیكێ 6500 ژ روفاتێن ئه‌وێ كومكوژیێ بو بارزان هاتنه زڤراندن و ل گوندێ بارزان هاتن ڤه‌شارتن و وه‌كو نه‌ریته‌ك لسه‌ر گورستانا جینوسایدكریان ئه‌ڤ رۆژ ب چه‌ند چالاكى و رێورسمه‌كان دهێته ساخكرن.
