38 گرۆپێن چه‌كدار دێ پشكدارى هه‌لبژارتنان بن و عه‌بادى نه‌شێت كۆنترۆل بكه‌ت
ئه‌ڤرۆ نيوز، نه‌وزاد زاده:
دناڤەندێن راگەھاندن و سیاسیێن بەغدا بەحس ل وێ یەکێ دھێتەکرن کو حەشد شەعبی د ھەلبژاردنێن داھاتیێن عیراقێ دا دێ پشکدار بیت ، سەروک وەزیرێن عیراقێ و موقتەدا سەدر ژی ب روونی ڤێ یەکێ رەت دکەن و دخوازن وەکو ھێزەکا ئەمنی بمینیت ، بەلێ پرانیا سەرکردە و گرۆپێن حەشد شەعبی کو ژ 38 گروپان پێکدھێن ب تایبەتی ئەو گروپێن کو ئێکسەر ژلایێ ئیرانێ ڤە دھێنە بنچاڤکرن دخوازن کو پشکدارێ د ھەلبژاردنێن داھاتیێن عیراقێ ببن.
ل گورەی زانیاریان ، گرۆپێن حەشد دخوازن کو بناڤێ لیستا ” مونەسیرون ” پشکداریێ تێدا بکەن کو بریارە ل سالا 1018 بھێتە ئەنجام دان ب تایبەتی گرۆپێن ” کەتیبەیێن ئیمام عەلی ، کەتیبەیێن حزبولا ، عەسائیبێن ئەھلول حەق تەڤگەرا ئیسلامی ل عیراقێ ، رێکخراوا بەدر و کەتیبەیێن سەید ئەلشوھەدا “، و بزاڤ دھێتەکرن کو بازنا لیستا ناڤبری بھێتە مەزنکرن و پرانیا گرۆپێن حەشد تێدا پشکداربن ب تایبەتی ئەو گرۆپێن کو د شەرێ داعش دا پشکداربوین.
ل گورەی قانونێن کومسیوونا بلند یا سەربخوەی یا ھەلبژاردنان ل عیراقێ بو چوو حزب و لایەنێن سیاسی نینە کو مفای ژ گروپێن سەربازی و ئێمناھیێ وەربگرن ب تایبەتی بو چونا دناڤ ھەلبژاردنان د ا، ژێدەرێن میدیایی دوپات ل وێ یەکێ دکەن کو پەیوەندیەکا بھێز دناڤبەرا نوری مالیکی و ئەوان گرۆپان ھەیە و ئەگەر ھەیە کو ئەگەر بگەھن ئارمانجێ چەند دەرفەت و پوستان ب حەشد بدەن و بھێنە ناڤا پەرلەمانی و دەستخوڤە ئینانا زورینەیا سیاسی ل گەل مالیکی.
لیستا مونتەسیرون ب ناڤێ شەرێ داعش دخوازە خوە بگەھینیت پەرلەمانی و بزاڤێن خورت بو بەرفرەھکرنا ھێزێن خوە بدەت ب تایبەتی ژ روویێ دبلوماسی و کارگێری و بەرفەرھبوونا وان ژی لسەر وەلاتێن ھەرێمی یە ، و بڤێ یەکێ ژی ئەگەر ھەیە کو حەیدەر عەبادی نەکاریت ئەوان گروپان کونترول بکەت کو رولەکێ سەرەکی ھەبویە کو ئەو گروپ ب ھێز بکەڤن ب تایبەتی د پشتەڤانیکرنا قانونا حەشد شەعبی و بکارئینانا وان ھێزان ژ بو پاراستنا عیراقێ.
عەرەفات کەره‌م ئەندامێ پەرلەمانێ عیراقێ دیارکر کو حەشد شەعبی لژێر کونترولا دەولەتا عیراقێ و سەروک وەزیرێن عیراقێ نینە و فەرمانا خوە ل ئیرانێ و چەند سەرکردەیەکێن دن وەردگرن ، و دیسان ئەمریکا ژی ب فەرمی داخوازا ھەلوەشاندنا حەشد شەعبی کریە ، ئەڤە سەرەرای کو پێشتر موقتەدا سەدر ژی داخوازا ھەلوەشاندنا حەشد کریە و گۆت: ( حەشد دخوازە کو د ھەلبژاردنێن داھاتیێن عیراقێ پشکدار بیت ، دخوازن ژی کو پوستێ سەروک وەزیرێن عیراقێ وەربگرن ، بەلێ ژلایێ حەیدەر عەبادی و ھژمارەکا بەرپرسان ھاتیە رەتکرن و رێک ب وان و بەرپرسێن وان ژی ناھێتەدان کو خوە بەربژێر بکەن ، حەشد شەعبی نھا مەترسیە بو سەر حەیدەر عەبادی ).
ژلایێ خوڤە حەیدەر عەبادی سەروک وەزیرێن عیراقێ دیارکر کو حەشد شەعبی دامەزراوەیەکا ئێمناھیێ یە و مافێ وێ یەکێ نینە کو پشکداریێ د ھەلبژاردنان دا بکەت ، ئەڤە زێدەباری ھەموو ئەوان پارتان ژی مافێ ھەلبژاردانان نینە کو بالەک ژ بالێن سەربازی ھەبیت ، ئاماژە ب وێ یەکێ ژی دکەت کو حەشد شەعبی دخوازە ب ناڤێ ژناڤبرنا داعش خوە بگەھینیت دەستھەلات و سیاسیەتێ وەکو ھێزەکا شیعە.
عبدولرەحمان لوێزی ئەندامێ پەرلەمانێ عیراقێ ل بەرەیێ سونە دیارکر کو ئەگەر ھەیە کو د ھەلبژاردنێن داھاتیێن عیراقێ دا دوو تەوەر ھەڤرکیێ بکەن و گۆت: ( تەوەرێ ئێکێ ھەڤپەیمانیا حەیدەر عەبادی و رەوتا سەدر و رەوتا حیکمە و ئەیاد عەلاوی و ھندەکێن دن ، و تەوەری َدوویێ ژی ھەر ئێک ژ دەولەتا قانون ، حەشد شەعبی و ھژمارەکا ھێزێن دن).
ل گورەی زانیاریێن کومسیوونێ ژی پشکداریا حزبێن شیعە دھەلبژاردنێن داھاتیێن عیراقێ دا زورینەیا رەھا پێکدینن و خودانێن گروپێن چەکدارن ، ھندەک ژ وان گروپان رەزامەندی لسەر ھاتیەدان مینا گروپێن سەر ب ھادی عامری و قەوارەیێ سادیقونی ، کو ھەموو ئەو گروپ ژ 38 گروپێن ژێکجودا پێکدھێن و دێ پشکداریی َد ھەلبژاردنێن داھاتیێن عیراقێ کەن.
ئەمیر کەنانی سەرکردەیێ رەوتا سەدر دڤی واریدا راگەهاند کو حەیدەر عەبادی ئەو شیان نینن کو گروپێن حەشد شەعبی ل ھەلبژاردنان دویر بێخیت و گۆت: ( پەیاما حەیدەر عەبادی ل بارا رەتکرنا پشکداریا وان گروپان بتنێ ناڤە و پشتراستیەکە بو وەلاتێن جیھانی کو ژ داھاتیێ حەشد بترسن ، بەلێ ب کریار ژی دکارم بێژم کو حەشد شەعبی دێ پشکداریی َد ھەلبژاردنان کەن ).
دھێتە چاڤەرێکرن کو رێکەفتی 15 ئایارا 2018 ھەلبژاردنێن عیراقێ بو پەرلەمان و سەروکاتیا کومارا عیراقێ ب رێڤە بچن.
