497 ژن ل دھۆکێ تووشی پەنجەشێرا مەمکان بووینە
دھۆک، رەڤین سالح لاوەند:
سالانە ھەیڤا چریا ئێکێ چالاکیێن جورا و جور دھێنە ئەنجامدان ژ بۆ ھشیارکرنا ژنان ل دۆر رێکێن دەستنیشانکرن و چارەسەریا پەنجەشێرا مەمکان، ل دھۆکێ ژی پشتی ب دووماھی ھاتنا ھژمارەکا چالاکیان، 29\10\2014 ئامارێن نەخۆشیێ و رێکێن خوپاراستنێ ژ نەخۆشیێ و چاوانیا بەرھنگاریا وێ ھاتنە گەنگەشەکرن.
ل دەستپێکا رێ و رەسمان، د.ئەفراسیاب موسا، رێڤەبەرێ نەخۆشخانا ئازادی یا فێرکرنێ پەیڤا رێڤەبەریا گشتی یا ساخلەمیا پارێزگەھا دھۆکێ پێشکێشکر و دیارکر کو بزاڤێن وان بۆ بەرھنگاربوونا ڤێ نەخۆشیێ د بەردەوامن، لەورا ژی کلینیکەکا تایبەت ل نەخۆشخانێ ھەیە و ھەر تشتێ پێدڤی بۆ ژنێن تووشی نەخۆشیێ دوارێن چارەسەریێ دا دھێتە پێشکێشکرن.
د. زەکی عەلی، بەرپرسێ پشکا نەخوشیێن پەنجەشێرێ دیارکر کو ئەو نەخۆشێن سەرەدانا کلینیکا نەخوشخانا ئازادی یا تایبەت دکەن ھەموو چارەسەرێن پێدڤی بو دھێنە کرن و گۆت: ژوان دەستنیشانکرنا بلەز و ئەنجامدانا نشتەرگەریێ و پشکنینا دلنیابوونێ ل تاقیگەھێ، ھەروەسا بەردەوامیدان ب چارەسەریا وان ب رێیێن تیشکێ، کێمیاوی و رێکا دەرمانێن پێشکەڤتی.
بەرپرسێ پشکا نەخوشیێن پەنجەشێرێ، دیارکر ژی ئامارێن ل بەر دەست وەسا خویادکەن کو نوکە 497 نەخۆش ل دھۆکێ ھەنە و نەە نەخۆشان ل ئەڤ سالە گیانێ خوە ژئەگەرێ نەخۆشیێ ژ دەستدایە، رەنگە گەلەک نەخۆشان گیانێ خوە ژدەستدابیت بەلێ خەلکێ دەڤەرێن دەرڤەی ئیدارا ھەرێمێ بن و مە پێ نەزانیبیت، و گۆت: رێژا توشبوونێ ل وەلاتێ مەژی وەک ھەموو جیھانێ ھەر ژھەشت ژنان ئێک تووشی دبیتێ، بەلێ ژ 100 زەلامان ژی دو کەس دبنە قوربانێن ڤێ نەخوشیێ و ئەڤ نەخوشیە نە ب تنێ بو ژنانە بەلکی زەلام ژی تووش دبنێ.
د. سیروان محەمەد ئەسوەد، رێڤەرێ کاروبارێن خوپاراستنا ساخلەمیێ دیاکر کو ژبو بەرھنگاربوونا ڤێ نەخوشیێ ل سەرانسەری جیھانێ پێدڤیە خەلک بزانن بۆ خوپاراستنێ ژڤێ نەخوشیێ چەندین رێک ھەنە بو دەستنیشانکرنا وێ، وگۆت: پێدڤیە ھەر ژنەک دەما ژیێ وێ بگەھیتە ٤٠ سالی ب زووترین دەم پشکنینا خوە بکەت یان سەرەدانا کلینیکا تایبەت یا ڤێ نەخوشیێ بکەت ل نەخوشخانا ئازادی، داکو دلنیا بیت کا ئەڤ نەخوشیە لێ نینە و ھەکە ھەبیت ژی چارەسەریا زوو وەربگریت.
