600 خێزان دێ ژ چیایێ شنگالێ ھێنە ڤەگوھاستن
ئه‌ڤرۆ:
جێگرێ پارێزگارێ دھۆکێ بۆ کاروبارێن ئاوارەیان بۆ ئەڤرۆ دیار کر کو دەست ب قەرەبووکرنا ئاوارەیان ھاتە کرن و ھەر خێزانەکا ئاوەرە دێ کۆژمێ 250 دۆلاران وەرگریت و 20 ھزار خێزان دێ مفاداربن و 600 خێزان ژ چیایێ شنگالێ دێ بۆ کەمپا ماملیان ل ئاکرێ ھێنە ڤەگوھاستن و ھەموو حازری بۆ ڤەگوھاستنا وان ھاتینە کرن، ب تنێ ھەتا سەقا خۆش دبیت دێ ھێنە ڤەگوھاستن.
ئیسماعیل محەمەد جێگرێ پارێزگارێ دھۆکێ بۆ کاروبارێن ئاوارەیان دیار کر کو ل پارێزگەھا دھۆکێ ژمارا ئاوەرەیان یا گەھشتیە 820 ھزاران، ژ وانا 120 دەربەردەرێن کوردێن رۆژئاڤایێ کوردستانێ نە و یێن دی ژ مووسل و ئەنبار و پاریزگەھێن دی ھاتینە دھۆکێ و ل 2\8\2014 زێدەتر ژ 500 ھزار ئاوەریان ژ زومار و شنگال و دەڤەرێن دی ھاتینە دھۆکێ و نوکە ژی بریارا 600 خێزانان ھاتیە کو بۆ دھۆکێ بھێنە ڤەگوھاستن و گۆت “ھەردەمێ رەوشا کەش و بای باشتر لێھات ئەو 600 خێزان دێ ژ چیایێ شنگالێ بۆ کەمپا ماملیان ل ئاکرێ ھێنە ڤەگوھاستن و ھەمی ئامادەکاری بۆ پێشوازیا وان ھاتینە کرن و ئاھێن خوارنێ و پێدڤیێن دی ژی ھاتینە دابینکرن”.
ئیسماعیل محەمەد خویا ژی کر کو ل پارێزگەھا دھۆکێ 16 کەمپ ھەنە و نێزیکی 42 ھزار یەکێن ئاکنجیبوونێ ب خوە ڤە دگرن و ل دووڤ ئامار و ژمارێن وان د شیان دایە 240 ھەتا 250 ھزار کەسێن دی ڤەحەوینن و ل ڤان کەمپا ئاکنجی بکەن و گۆت “ھەر دەمێ ھەموو کەمپ ب دووماھی ھاتن ئەم دشێین رێژەکا زۆرا ئاوارەیان ڤەحەوینین و نوکە کار ل کەمپا بەردەرش و ئاکری دھێتە کرن و ل کەمپا ئیسیان ژی ژمارەکا باش ئاوەریان تێدا ھاتنە ڤەحەواندن”.
