942 كه‌س ئه‌ڤ ساله ل دهۆكێ بووينه قوربانيێن روودانێن هاتنوچوونێ
ئه‌ڤرۆ نيوز، نيوار محه‌مه‌د سه‌ليم:
ئه‌ڤرۆ رۆژا جيهانى يا قوربانيێن هاتنوچوونێ يه ل سه‌رانسه‌رى جيهانێ ژى ب ڤێ هه‌لكه‌فتێ چالاكى دهێنه كرن و ل دهۆكێ ژى رێڤه‌به‌ريا هاتنوچوونا پارێزگه‌ها دهۆكێ چه‌ند چالاكيه‌ك ئه‌نجام دان.
موقه‌دمێ مافپه‌روه‌ر، ئازاد تاها، به‌رپرسێ پشكا راگه‌هاندنێ ل رێڤه‌به‌ريا هاتنوچوونا پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز گۆت: “ب ڤێ هه‌لكه‌فتێ رێڤه‌به‌ريا وان ل دهۆكێ چه‌ندين چالاكى ئه‌نجام داينه”.
زێده‌تر گۆت: “مه ل سه‌ر جاددان رێنمايى ل سه‌ر شوفێران به‌لاڤكرينه، ديسا مه سه‌ره‌دانا قوتابخانا و باخچێن زارۆيێن كريه ژ بۆ وێ چه‌ندێ چه‌ند شيره‌ت و رێنمايان بده‌نه قوتابيان”.
ئاشكه‌را ژى كر كو ل گه‌ل پله‌دارێن هاتنوچوونێ ژى روونشتينه دا كو چاره‌يه‌كا گۆنجايى ببينن كو بشێن ڤان ئه‌گه‌رێن روودانێن هاتنوچوونێ ديار بكه‌ن و كێمتر لێ بكه‌ن.
ده‌رباره‌يى ئامارێن 10 هه‌يڤێن بۆرى ژى ئاشكه‌را كر كو د ماوێ 10 هه‌يڤێن بۆرى دا، 906 روودان هاتينه تۆماركرن و ژ وان ژى 606 لێكدان بووينه، 110 ژى وه‌رگه‌ريان و 184 ژى لێدان و شه‌ش ژى سۆتن بووينه.
به‌رپرسێ پشكا په‌يوه‌ندى و راگه‌هاندنێ ل رێڤه‌به‌ريا هاتنوچوونێ ل پارێزگه‌ها دهۆكێ نه‌ڤه‌شارت ژى كو 942 كه‌س بووينه قوربانى روودانێن هاتنوچوونێ كو ژ وان ژى 99 كه‌سان گيانێ خوه ژ ده‌ست دايه و 843 كه‌س ژى بريندار بووينه.