شانده‌كێ هه‌رێما كوردستانێ ئه‌ڤرۆ دێ چيته به‌غدا
ئه‌ڤرۆ نيوز:
ژێده‌ره‌كى ژ جڤاتا وه‌زيرێن هه‌رێما كوردستانێ راگه‌هاند كو ئه‌ڤرۆ رۆژا شه‌مبى شانده‌كێ هه‌رێما كوردستانێ دێ سه‌ره‌دانا به‌غدا كه‌ت.
ئه‌وى ژێده‌رى ئاشكه‌را كر كو ئه‌ڤرۆ رۆژا شه‌مبى شانده‌كێ هه‌رێما كوردستانێ ب سه‌رۆكاتيا كه‌ريم شنگالى وه‌زيرێ ناڤخۆيێ هه‌رێمێ و مه‌ولود باوه‌موراد وه‌زيرێ ڤه‌گوهاستن و گه‌هاندنێ دێ سه‌ره‌دانا به‌غدا كه‌ن.
ئاماژه ب وێ چه‌ندێ ژى كر كو شاندێ ناڤبرى دێ ل گه‌ل وه‌زيرێ ناڤخۆ يێ عيراقێ و به‌رپرسێن وه‌زاره‌تا ڤه‌گوهاستن و گه‌هاندنێ كۆم بن و به‌حس ل ڤه‌كرنا فرۆكخانێن هه‌رێمێ كه‌ن ب روويێ گه‌شتێن نێڤده‌وله‌تى دا.
گه‌شتێن نێڤده‌وله‌تى يێن هه‌ردو فرۆكخانێن هه‌ولێر و سلێمانيێ ل 29ى ئيلۆنا 2017ێ هاتينه راگرتن، ب به‌هانه‌يا ئه‌نجامدانا ريفراندۆمێ ل هه‌رێما كوردستانێ و ده‌ڤه‌رێن كێشه‌دار.
