ئەڤرۆ بڕیار ل سەر دەستپێکرنا گەشتێن فرۆکخانێن ھەرێمێ دێ ھێتە دان
ئەڤرۆ نيوز:
بڕیارە ئەڤرۆ سێشەمبی 23ى كانوونا دويێ 2018، شاندەکێ تەکنیکی یێ دەستەیا فرۆکەڤانیا مەدەنی یا عیراقی و وەزارەتا ڤەگۆھاستنا عیراقی سەرەدانا ھەرێما کوردستانێ و ھەردو فرۆکخانێن ھەولێرێ و سلێمانیێ بکەت، ئارمانج ژ وێ سەرەدانێ ئەوە کو بڕیار ل دۆر دەستپێکرنا گەشتێن نێڤدەولەتی ل وان ھەردو فرۆکخانان بھێتە دان.
ژێدەرێن دەنگوباسێن عیراقی ژ زارێ ژێدەرەکی ژ شاندێ دانوستاندکارێ تەکنیکی یێ دەستەیا فرۆکەڤانیا مەدەنی یا عیراقی بەلاڤکر، بڕیارە ئەڤرۆ سێشەمبی، شاندەکێ تەکنیکی یێ تایبەت ب فرۆکخانە و دەستەیا فرۆکەڤانیا مەدەنی و وەزارەتا ڤەگۆھاستنا عیراقێ سەرەدانا ھەرێما کوردستانێ بکەت و بڕیارا دووماھیێ ل دۆر ڤەکرنا فرۆکخانێن ھەرێمێ بدەت.
وی ژێدەری ئاماژە ب وێ چەندێ ژی کر کو چو ئاریشە ل بەردەم دەستپێکرنا گەشتێن نێڤدەولەتی نەماینە و ھەردو لایەن ل سەر ھەماھەنگیێ و شێوازێ ب رێڤەبرنا فرۆکخانان یێن رێککەفتین و گەھشتینە ئەنجامێ دووماھیێ، لەو پێدڤی ناکەت زێدەتر فرۆکخانێن ھەولێر و سلێمانیێ گرتی بمینن.
