ب وێنه فره‌نسا ب ئاسته‌كێ لاواز سه‌ركه‌فتن توماركر
ئه‌ڤرۆ نیوز، زنار زوبێر:
هه‌لبژارتیێ فره‌نسا ب ئاسته‌كێ لاواز و به‌روڤاژى پێشبینیان سه‌ركه‌فتنه‌كا ب زه‌حمه‌ت لسه‌ر هه‌لبژارتیێ ئوسترالیا دا توماركر ب دو گۆلان به‌رامبه‌ر گۆله‌كێ د چارچوڤێ یاریێن كوما سیێ دا.
د نیڤا ئێكێ دا ئه‌و ئاستێ د هاته چاڤه‌رێ كرن ژ هه‌لبژارتیێ فره‌نسا نه‌هاته دیتن و نه‌شیان چو هێرشێن مه‌ترسیدار لسه‌ر گۆلا ئوسترالیا په‌یدا بكه‌ن تنێ هێرشه‌ك نه‌بیت كو ئه‌و ژى هاته به‌رزه‌كرن برێكا كیلیان مبامبى، به‌رامبه‌ر هه‌لبژارتیێ ئوسترالیا ئاستێ وێ باشتر د هاته دیتن د ڤێ نیڤێ دا و شیان دو ده‌لیڤه‌یێن مه‌ترسیدار لسه‌ر گۆلا فره‌نسا په‌یدا بكه‌ن لێ گۆلچیێ فره‌نسا هوگۆ لوریس شیا ب شیانێن خوه ڤان هێرشان ژ گۆلا خوه دوربێخیت و نیڤا ئێكێ بێ گۆل ب دوماهى هات.
د نیڤا دویێ دا فره‌نسا هه‌مى هه‌ولێن خوه ئێخستنه كار بۆ توماركرنا گۆله‌كێ و ئه‌ڤ چه‌نده ل ده‌قیقه‌یا 58 بجه هات ده‌مێ دادڤانێ یاریێ په‌نه‌لتیه‌ك بۆ فره‌نسا هژمارتى و تێدا هێرشبه‌رێ وێ ئه‌نتوان گریزمان شیایى ب سه‌ركه‌فتیانه گۆلا ئێكێ بۆ وه‌لاتێ خوه تومارتوماربكه‌ت، پشتى ڤێ گۆلێ ب دو ده‌قیقه‌یان دادڤانێ یاریێ په‌نه‌لتیه‌كا دى هژمارت لێ ڤێ جارێ بۆ هه‌لبژارتیێ ئوسترالیا پشتى به‌ره‌ڤانێ فره‌نسا ئومتیتى ته‌په ب ده‌ستى ژ گۆلا خوه دورخستى و د ئه‌نجامدا كاپتنێ ئوسترالیا جیدناك شیا گۆلا وه‌كهه‌ڤیێ بۆ وه‌لاتێ خوه ئوسترالیا ل ده‌قیقه‌یا 61 توماركر بكه‌ت، پشتى ڤێ گۆلێ هه‌ردو هه‌لبژارتیان هه‌مى بزاڤ كرن بۆ گۆلا سه‌ركه‌فتنێ تایبه‌ت یاریزانێن فره‌نسا و راهێنه‌رێ وێ دیدێ دیشامپ چه‌ند گوهۆرین كرن پێخه‌مه‌ت توماركرنا گۆلا سه‌ركه‌فتنێ به‌رامبه‌ر یاریزانێن ئوسترالیا ب هه‌مى شیانێن خوه به‌ره‌ڤانى ژ گۆلا خوه دكر پێخه‌مه‌ت ب دوماهى ئینانا یاریێ ب وه‌كهه‌ڤى لێ ئه‌ڤ چه‌نده ب جه نه‌هات ده‌مێ یاریزانێ فره‌نسا پول بوگبا ل ده‌قیقه‌یا 81 شیاى گۆلا دویێ بۆ وه‌لاتێ خوه توماربكه‌ت و یاریێ ب دوماهى بینت ب سه‌ركه‌فتنا فره‌نسا ب دو گۆلان به‌رامبه‌ر گۆله‌كێ بۆ هه‌لبژارتیێ ئوسترالیا و سێ خالێن گرنگ بۆ فره‌نسا مسوگه‌ر كرن.
