پارتی: بریارا دادگه‌ها فیدرالى د به‌رژه‌وه‌ندیا خه‌لكێ كوردستانێ دایە
ئه‌ڤرۆ نیوز، نه‌وزاد هلۆرى:
پشتى كو دادگه‌ها فیدرالى یا عیراقێ ئه‌ڤرۆ پێداچۆن د سكالا و تانێن نه‌رازیێن هه‌لبژاردنێن هه‌یڤا بورى یا په‌رله‌مانێ عیراقێ دا كرى و ئه‌ڤرۆ چه‌ند بریار لسه‌ر ئه‌نجامێن هه‌لبژاردنان داى ژ وانان ره‌تكرنا هه‌موو ئه‌وان سكالایێن كو به‌حس ل هه‌لوه‌شاندنا ده‌نگێن ئاواره و پێشمه‌رگه و ره‌ڤه‌ندا كورد ل ده‌رڤه دكه‌ت ، ئاخفتنكه‌رێ پارتى ئه‌ڤێ بریارێ د به‌رژه‌وه‌ندیا گه‌لێ كوردستان و پێشمه‌رگه‌ى دبینیت.
مه‌محود محه‌مه‌د ئاخفتنكه‌رێ پارتى دیموكراتى كوردستان ب رێیا راگه‌هاندنه‌كێ دیاركر كو بریارێن ئه‌ڤرۆ یێن دادگه‌ها فیدرالى یا عیراقێ د به‌رژه‌وه‌ندیا خه‌لكێ دلسووزێ كوردستان و هێزێن پێشمه‌رگه‌ى دایه و گۆت: (پشتى راگه‌هاندنا ئه‌نجامێن هه‌لبژاردنێن هه‌یڤا بورى یێن په‌رله‌مانێ عیراقێ بوچونێن جوداجودا هاتنه به‌لاڤكرن ، و مه وه‌كو پارتى پێشتر راگه‌یاند بوو كو بو نه‌هێلانا گومانان لسه‌ر ئه‌نجامێن هه‌لبژاردنان پێدڤى یه پێرابوونێن قانونى و ده‌ستوورى بهێنه هاڤێتن ، و ژ ئه‌نجامێ سكالا و دوڤچوونێن مه ، دادگه‌ها عیراقێ نه‌شیا شه‌رعیه‌تێ ب بریارێن حه‌قد و كین بده‌ت و ل داویێ بریار د به‌رژه‌وه‌ندیا خه‌لكێ دلسووزێ كوردستان و پێشمه‌رگه و هێزێن نافخوه ده‌رچوو و هه‌لویست و سكالا مه ژى لسه‌ر ڤێ یه‌كێ بتنێ بوویه)
زێده‌تر گۆت: (په‌رله‌مانێ عیراقێ ل ده‌ستپێكا راگه‌هاندنا ئه‌نجامێن هه‌لبژاردنان ، ب بریاره‌كێ پاشان ب قانون هژمارتنا ده‌نگان ، جڤاتا دادوه‌ریێ راسپارد داكو راستى بهێنه دیاركرن و گومان بهێنه ره‌ڤاندن ، و مه ئه‌ڤ یه‌ك ب پاراستنا سه‌قامگیریێ ب شێوه‌یه‌كێ گشتى ب مافێ هه‌موو لایه‌نه‌كێ زانى ، به‌لێ ب لێبورین ڤه په‌رله‌مانێ عیراقێ لژێر فشارێن چه‌ند لایه‌نه‌كان و ب مه‌به‌ستا لێدانا ناڤ و ده‌نگیێن پێشمه‌رگه‌ى و هێزێن نافخوه ، مه‌رجێن پشكداریا دكومبوونێن په‌رله‌مانێ عیراقێ ، و تمامكرنا نیسابا قانونى كومبوون ئه‌نجامدا ئه‌و ژى ب زێده‌كرنا خاله‌كێ د پرۆژه قانونێ كو ئه‌و ژى ده‌نگێن پێشمه‌رگه و هێزێن نافخوه بێى ڤه‌كولین و هژمارتن ب هێنه هه‌لوه‌شاندن ، به‌لێ مه وه‌كو پارتى هه‌ر زوو ئه‌ڤ ره‌فتاره ب نه‌قانونى و نه ده‌ستوورى زانى و مه ئه‌ڤ چه‌نده وه‌كو ئاماژه‌یه‌ك بو كه‌رب و كین و حقدێ زانى به‌رامبه‌ر قاره‌مانى و قوربانیدان و خوه‌راگریا وان هێزا ، و بلى ڤێ خواندنێ چوو خواندنێن دن بو ڤێ یه‌كێ نه‌دهاتنه‌كرن)
ئاخفتنكه‌رێ پارتى دیموكراتى كوردستان د درێژاهیا راگه‌هاندنا خوه دا دیاركر ژى كو دپێناڤ دلسووزیا وان بو گه‌ل و وه‌فادارى بو پێشمه‌رگێن قاره‌مان و هێزێن نافخوه ل سه‌رانسه‌رێ هه‌رێما كوردستانێ ئه‌وان هه‌لویستێ خوه راگه‌هاند و زێده‌تر گۆت: (د رێیا قانونى و د چارچوڤێ ده‌ستوورى دا مه سكالا توماركر لسه‌ر وێ یه‌كێ چه‌وا چێدبیت بێى ڤه‌كولین و هژمارتنا ده‌نگان ئه‌و بهێنه ڤه‌ده‌ركرن ، تنێ داكو حه‌زێن هه‌ند لایه‌ن بهێنه به‌رچاڤكرن ، و غه‌در ل وان هێزێن دلسووزێن كوردستانێ بهێته‌كرن، و ژ ئه‌نجامێ سكالا و دوڤچونێن مه ئه‌وان نه‌شیا شه‌رعیه‌تێ ب بریارێن حقد و كین بده‌ن ، و ژ ئه‌نجام دا دادگه‌ها فیدرالى یا عیراقى د ڤه‌كولینێن خوه دا بریار د به‌رژه‌وه‌ندیا خه‌لكێ دلسووزێ كوردستان و پێشمه‌رگه‌ى ده‌ركر كو ئه‌و ژى ژ ئه‌نجامێ سكالایا مه بوو)
لرۆژا 12/5/2018 هه‌لبژاردنێن په‌رله‌مانێ عیراقێ هاتنه كرن و د ئه‌نجام دا پارتى دیموكراتى كوردستان ژهماره‌كا زور یا كورسیان ده‌ستخوڤه ئینان ، و هه‌ر تنێ ل پارێزگه‌ها دهۆكێ 10 كورسى ده‌ستخوڤه ئینان.
